Писмо таро Водечко тело

Мангле пхраљален хем пхењален,

„Секогаш благодаринаја е Јеховаске баши туменде кеда спомнинаја тумен ко амаре молитве, соске стално иси амен ки годи адава со керена поттикниме тари вера хем со трудинена тумен поттикниме таро мангипе хем тумари истрајност која со авела тари тумари надеж ко амаро Господари о Исус Христос, англо амаро Девел хем Дад“ (1. Сол. 1:2, 3). Акала лафија шукар сикавена со осетинаја баши туменде! Благодаринаја е Јеховаске баши туменде хем баши тумари шукар служба. Соске?

О берш со накхља, керѓен бут буќа „поттикниме тари вера“ хем бут трудинѓен тумен „поттикниме таро мангипе“ башо Царство. Бут џене тумендар размислинѓе сар шај побутер те џан ки служба. Несаве селинѓе пе те служинен ко јавера тхана, хем чак ко јавера пхувја коте со иси побари потреба таро објавителија. Јавера бајрарѓе пумари служба адалеа со сине ко сведочибе ко прометна тхана. Бут џене пријавинѓе пе те служинен сар помошна пионерија ко периоди кеда сине и Спомен-свеченост, ко масек кеда сине лен посета таро покраинско надгледнико или кеда сине и посебно акција ко август 2014 берш. Иако тумаре околностија тане различна, амен дикхаја кај служинена е Јеховаске таро цело вило хем адалеске мангаја те пофалина тумен (Кол. 3:23, 24). „Адава со керена поттикниме тари вера“ тано шукар причина те благодарина е Јеховаске!

Исто аѓаар, бут ценинаја адава „со трудинена тумен поттикниме таро мангипе“ те поможинен кеда градинена пе дворане, подружнице хем јавера објектија ко цело сумнал. Адалеске со о број е Јеховаскере сведоконгоро стално бајрола, итно ваљани аменге асавке објектија (Иса. 60:22). О берш со накља сине амен најбаро број објавителија 8.201.545 хем секова масек водинена пе сине ко просек по 9.499.933 библиска студие. Акава сикавела кај бут подружнице ваљани те проширинен пе или те реновиринен пе, хем исто аѓаар кај ваљани аменге побутер дворане. Ко бут пхувја иси потреба таро преведувачка канцеларие те шај о преведувачија те овен ко тхана коте со керела пе ленгири чхиб лафи хем адатхар те превединен.

Адалеске, шукар тано те пуча амен: ‚Сар шај те поможинав кеда градинена пе асавке објектија?‘ Несаве амендар шај доброволно ка пријавинен пе те поможинен кеда градинела пе. Хем, бизи разлика дали џанаја те градина или на, саринен иси амен прилика те да материјална средства башо акала важна проектија (Изр. 3:9, 10). Кеда ваљани сине те градинел пе о шатори, о Израелција денѓе добором бут прилогија со мора сине те вакерел пе ленге ма те ден побутер (2. Мој. 36:5-7). Акала примерија тари Библија ресена џи ко амаро вило хем мотивиринена амен. Адава „со трудинена тумен поттикниме таро мангипе“ ко акала важна буќа тари амари свето служба тани панда јекх причина те благодарина е Јеховаске.

Исто аѓаар, бут сием бахтале кеда дикхаја кобор тане истрајна амаре пхраља. Те спомнина сар пример амаре пхрален тари Јужно Кореја. Таро 1950 берш, е терне пхрален тари акаја пхув пхандена лен башо адава со на мангена те џан ки војска. Бершенцар, амаре пхраља издржинена хем ачховена верна. Ленгоро пример керела позорали амари вера!

Ки Еритреја трин амаре пхраља тане пханле побутер таро 20 берш. Јавера сине пханле похари време, а машкар ленде сине пхења да пумаре чхавецар. О пхраља бут трудинена пе те ослободинен лен, ама џи акана панда нане нисаве резултатија. Амаре пхраља ки Еритреја ачховена верна ко асавке да пхаре ситуацие. Амен на бистраја те молина амен ленге (Рим. 1:8, 9).

Бут џене тумендар на сиен ко пханлипе баши тумари вера. Ама, бут тумендар боринена пе пхурипаја, насвалипаја, брачно партнереа или фамилијаја со нане е Јеховаскере сведокија, или јавере лично проблеменцар со џанена лен само тумен. Иако иси тумен са акала проблемија, тумен понадари да служинена верно е Јеховаске! (Јак. 1:12). Заслужинена пофалба башо адава. Благодаринаја е Јеховаске башо адава со ачховена верна.

Оја, тумари верно служба, адава со трудинена тумен поттикниме таро мангипе хем тумари истрајност тане силно причина ‚те ова благодарна е Јеховаске, соске ов тано шукар!‘ (Пс. 106:1). Искрено мангаја тумен саринен хем молинаја е Јехова те дел тумен сила, те поможинел тумен хем те благословинел тумен те шај те служинен леске вечно.

Тумаре пхраља,

Водечко тело е Јеховаскере сведоконгоро