Џивдинаја спрема и вера, а на спрема адава со дикхаја
Англедер те овел уништимо о Ерусалим, о апостол Павле пишинѓа е христијаненге, кај сар шукар војникија е Исусескере ваљани те овен спремна те трпинен пхарипе, а на те овел ленге најважно о уживање хем о задоволство (2. Тим. 2:3, 4). Акава сумнал тано пхердо проблеменцар, адалеске ваљани аменге зорали вера те шај те чхива о духовна буќа ко прво тхан (2. Кор. 4:18; 5:7). Дикх о видеофилми Џивдинаја спрема и вера, а на спрема адава со дикхаја (Џа ко jw.org, менин и чхиб ко српски, хем роде ко ПУБЛИКАЦИЈЕ > ФИЛМОВИ). Забележин сар о Нахам хем и Авитала нашавѓе пло џивдипа адалеске со бут мангена сине о материјална буќа. Пало адава, одговорин ко акала пучиба:
1) Која сине ко прво веко и „гадотија... со терѓола ко свето тхан“, хем со ваљани сине одма те керен о христијања кола со џивдинена сине ко Ерусалим? (Мат. 24:15, 16). 2) Соске е христијаненге ваљанѓа вера те шај те нашен тари диз? 3) Саве жртве ваљани сине те керен те шај сине те нашен? 4) Соске о Нахам хем и Авитала сине кој дуј гоѓа дали те нашен? (Мат. 24:17, 18). 5) Саво искушение сине е Рахела кеда ваљани сине те икљол таро Ерусалим? (Мат. 10:34-37; Мар. 10:29, 30). 6) Сар о Етан денѓа шукар пример баши вера хем доверба ко Јехова? 7) Кола проблемија сине е христијанен ки Пела? 8) Сар е Нахамескири хем е Авиталакири вера хари похари тикнили? 9) Сар о Јехова грижинѓа пе е христијаненге со џивдинена сине ки Пела? (Мат. 6:33; 1. Тим. 6:6-8). 10) Сар шај те ова сар о Авраам хем и Сара џикоте аџикераја о крајо акале сумналескоро? (Евр. 11:8-10). 11) Сар о Нахам хем и Авитала убединена пе сине коркори пес кај ваљани те иранен пе ко Ерусалим, хем соске адава сине погрешно? (Лука 21:21). 12) Саво сине чаче о џивдипе ко Ерусалим кеда ола иранѓе пе? 13) Соске ваљани те кера амари вера позорали акана — англедер те авел о крајо акале сумналескоро? (Лука 17:31, 32; 21:34-36).
Те џивдина вераја значинела: 1) те овел амен доверба ко е Јеховаскере упатствија, 2) те мукха ов те водинел амен хем 3) те сикава кај аменге тане поважна о духовна буќа, а на о материјална. Те ачхова одлучна те џивдина вераја, хем те овел амен доверба кај „о сумнал накхела хем лескири желба, а окова со керела е Девлескири волја ачхола засекогаш“ (1. Јов. 2:17).