Соске тано важно прво те смирине тут тле пхралеа?

Замислин туке кај живинеа ки Галилеја ко време е Исусескоро. Аљан ко Ерусалим те славине о Празнико е сениценгоро. И диз тани пхерди манушенцар со але таро дур тхана башо акава празнико. Ту мангеа те де жртва е Јеховаске. Адалеске лељан туја бузни, хем џаја џи ко храми таро тесна улице кола сој пхерде манушенцар. Кеда ресеа, ко храми иси бут јавера да мануша кола со исто аѓаар аџикерена те ден жртва. Конечно, ало тло редо те де и бузни е свештениконге. Ко адава моменти сетинеа тут кај то пхрал, кова со шај тано негде адатхе или ки диз, иси ле нешто против туте. О Исус објаснинѓа со ваљани те кере. (Читин Матеј 5:24.) Сар шај ту хем то пхрал сој туке хољамо те овен ко мир сар со вакерѓа о Исус? Ки рамка сој теле, обележин о точна одговорија.

ТУ ВАЉАНИ...

• те кере лафи тле пхралеа само ако мислинеа кај иси ле шукар причина те овел туке хољамо

• те трудине тут те испрајне тле пхрале ако дикхеа кај тано бут чувствително или вакерела кај ту да сиан криво башо проблеми

• те шуне шукар тле пхрале џикоте вакерела туке сар осетинела пе, па чак ако на хаљовеа ле шукар, искрено извинин тут башо адава со осетинела пе аѓаар или башо адава со поврединѓан ле ненамерно

ОВ ВАЉАНИ...

• те родел о јавера таро собрание те поддржинен ле аѓаар со ка вакерел ленге кобор грешинѓан леске

• те критикујнел тут, те вакерел секова детали тари тли грешка, хем те родел те признајне кај сиан криво

• те дикхел и понизност хем и храброст со аљан ки лесте те пхене тли грешка, хем те простинел туке таро вило

Иако авдиве на даја животинска жртве, спрема о лафија е Исусескере, сар амаро однос е пхраленцар влијајнела упри амари служба башо Јехова?