Сар шај те бајрара амаро мангипе спрема о Девел хем спрема амаре паше?

Иако сар христијања на икераја амен ко е Мојсеескоро закони, о дуј најбаре заповедија, те манга е Девле хем амаре паше, панда важинена (Мт 22:37-39). О мангипе на авела коркори пестар, ваљани те бајрара ле. Сар те кера адава? Ваљани те читина и Библија секова диве. Кеда читинаја башо шуже особине е Девлескере, тегани шај те дикха „кобор тано шукар о Јехова“ (Пс 27:4). Ко асавко начин, амаро мангипе спрема лесте бајрола хем почминаја те размислина сар лесте. Акава ка поттикнинел амен те икера е Девлескере заповедија а јекх лендар тани и заповед те сикава самопожртвувано мангипе е јаверенге (Јвн 13:34, 35; 1Јо 5:3). Аке некобор предлогија сар о читибе е Библијакоро те овел аменге поинтересно:

• Замислин туке о настанија хем вклучин тле чувствија. Замислин кај сиан ко адава тхан. Дикх, шун, кханде. Пробин те шај те хаљове о чувствија е манушенгере сој ко адава настан.

  

• Менин тло пристап. Аке некобор идее: Читин ко гласо или следин ки Библија џикоте шунеа и аудиоснимка. Читин башо несаво лико или тема тари Библија наместо те читине ла редоја. На пример, шај те читине башо живото е Исусескоро аѓаар со ка користине и брошурка Да ја истражуваме Божјата Реч, 4 хем 16 дело. Читин цело поглавје котар сој лендо о дневно стихо. Читин о библиска лила спрема хронолошко редо — спрема о време кеда тане пишиме.

  

• Читин те хаљове. Бут пошукар тано те читине јекх поглавје, те хаљове ле хем те размислине баши лесте него те читине бут поглавја кобор те накхаве повише материјали. Дикх о контекст. Пробин те дикхе о деталија. Користин о карте хем о маргине. Истражин барем јекх мисла со на хаљовеа ла шукар. Ако шај, трудин тут те размислине башо материјали исто време кобор со ваљанѓа туке те читине о материјали.