6 ЛЕКЦИЈА

Објаснин соске читинеа о стихо

Јован 10:33-36

СО ТЕ КЕРЕ: Ма читин само о стихо бизо те објаснине ле. Трудин тут о јавера јасно те хаљовен сар адава стихо тано поврзимо адалеа со мангеа те вакере.

САР ТЕ КЕРЕ АДАВА:

Истакнин о главна лафија. Откеда ка читине о стихо, истакнин о лафија сој директно поврзиме е главно мислаја со мангеа те вакере ла. Акава шај те кере аѓаар со ка повторине адала лафија или ка пуче пучибе со ка поможинел е јаверенге коркори те хаљовен кола тане о главна лафија.

Ако мангеа те повторине о стихо тле лафенцар, трудин тут о јавера јасно те хаљовен сар о лафија тари Библија поддржинена и главно мисла со вакереа ла.
Истакнин и главно мисла. Ако вакерѓан и причина соске читинеа о стихо, објаснин сар о важна лафија таро стихо тане поврзиме адале причинаја.

Џикоте кереа лафи башо стихо, и Библија нека овел туке пхравди. Аѓаар ка поможине е манушенге те поврзинен тле лафија е стихоја со читинѓан ле.
Објаснин о стихо ко едноставно начин. Избегин те објаснине деталија со нане поврзиме е главно мислаја. Размислин башо адава кобор о јавера џанена баши тема со кереа лафи. Адава ка поможинел туке те одлучине кобор информацие те вакере те шај полокхе те хаљовен и главно мисла.