2 ЛЕКЦИЈА

Ов природно

2. Кор. 2:17

СО ТЕ КЕРЕ: Кер лафи природно хем искрено те шај адала со шунена тут те дикхен кај чаче грижинеа тут ленге хем кај сиан уверимо ко адава со вакереа.

САР ТЕ КЕРЕ АДАВА:

Спремин тут шукар хем молин тут англедер те кере адава. Молин е Јехова те поможинел туке те концентририне тут ко адава со ка вакере, а на ки тли трема. Нека овен тут ки годи о главна мисле со ваљани те вакере лен. Вакер о мисле тле лафенцар; а на само те пхене таро лафи џи ко лафи адава сој пишимо.

Кеда мангеа те читине нешто тари Библија или тари јавер публикација, спремин тут англедер те шај шукар те читине. Ако тане цитириме некаскере лафија, читин лен чувствонцар хем ко начин сар нормално со керена о мануша лафи.
Кер лафи искрено хем таро вило. Размислин соске тано важно о јавера те шунен адава со мангеа те вакере. Мислин ки ленде. Тегани тло начин сар терѓовеа, тле гестија хем изразија ко муј ка сикавен кај искрено интересинеа тут ленге.

Те ове природно на значинела кај на ваљани те пазине сар кереа лафи. Адава со вакереа ваљани те овел достоинствено. Адалеске, трудин тут те кере лафи јасно хем точно.
Дикх ко адала со шунена тут. Дикх е јаверен ко јакхја кеда кереа лафи. Џикоте икереа говор, понекогаш дикх некасте тари публика наместо цело време те дикхе ко јекх мануш или само кратко те накхе јакхенцар е публика.