8 ТЕМА
Кеда авена пхаре диве
„Овен бут бахтале, иако шај ка ваљани хари време те овен тажна таро разна искушенија со иси тумен“ (1. Петрово 1:6).
Кобор те трудине ту то брако хем ти фамилија те овен бахтале, шај те авен несаве буќа со ка керен ту тажно (Проповедник 9:11). О Девел мангела те поможинел амен кеда аменге пхаро. Ако икереа о советија тари Библија, ту хем ти фамилија ка шај те икљовен ко крајо чак кеда туменге најпхаро.
1 ТЕ ОВЕЛ ТУ ДОВЕРБА КО ЈЕХОВА
СО ВАКЕРЕЛА И БИБЛИЈА: „Са тумаро пхарипе фрден леске, соске ов грижинела пе туменге“ (1. Петрово 5:7). Никогаш ма бистре кај о Девел нане криво башо лошна буќа со аракхена ту (Јаков 1:13). Кобор попаше овеа е Јеховаја, ов ка поможинел ту најшукар со шај (Исаија 41:10). „Пхравен тумаро вило леске“ (Псалм 62:8).
Исто аѓаар, ту шај те аракхе утеха кеда секова диве читинеа и Библија хем проучинеа ла. Тегани, ту коркори ка дикхе сар о Јехова утешинела амен кеда аменге пхаро (2. Коринќаните 1:3, 4; Римјаните 15:4). Ов ветинела кај ка дел ту „о мир. . . кова со и упредер секоја мисла“ (Филипјаните 4:6, 7, 13).
СО ШАЈ ТЕ КЕРЕ:
Молин е Јехова те поможинел ту те ачхове смиримо хем те дикхе о буќа сар со и.
Дикх са о буќа со шај те кере лен хем бирин адава со и туменге најшукар.
2 ГРИЖИН ТУ ТУКЕ ХЕМ ТЕ ФАМИЛИЈАКЕ
СО ВАКЕРЕЛА И БИБЛИЈА: „О вило околескоро со хаљовела кхедела песке џандипе, хем о кан е гоѓаверенгоро родела џандипе“ (Изреки 18:15). Размислин башо са о буќа со шај те керен пе ки тумари ситуација. Дикх со ваљани секаске посебно ки ти фамилија. Кер ленцар лафи хем шун лен (Изреки 20:5).
Со ако муло тутар некој со мангеа ле? Ма дара те сикаве сар осетинеа ту. Сетин ту кај о Исус да рунѓа (Јован 11:35; Проповедник 3:4). Бут тано важно доволно те одморине ту хем те сове (Проповедник 4:6). Аѓаар ка овел туке полокхо кеда туке пхаро.
СО ШАЈ ТЕ КЕРЕ:
Редовно кер лафи те фамилијаја панда англедер те авен пхаре диве. Тегани, кеда ка авен проблемија, ка овел ленге полокхо те керен туја лафи.
Кер лафи околенцар со сине ки слично ситуација сар тли.
3 ПРИФАТИН ПОМОШ ТАРО ЈАВЕРА
СО ВАКЕРЕЛА И БИБЛИЈА: „О чачутно амал сикавела мангипе ко секова време хем пхрал овела ко пхаре диве“ (Изреки 17:17). Те амала мангена те поможинен ту, ама шај на џанена со те керен. Вакер ленге со чаче ваљани туке (Изреки 12:25). Исто аѓаар, роде помош таро адала со хаљовена и Библија. О советија со ка ден ту тари Библија ка поможинен ту (Јаков 5:14).
Кеда редовно дружинеа ту манушенцар со чаче иси лен вера ко Девел хем ко адава со вакерела ов, тегани ка аракхе и помош со ваљани туке. Исто аѓаар, ка аракхе утеха кеда поможинеа јавере манушенге со ваљани ленге охрабрување. Вакер ленге баши ти вера ко Јехова хем башо лескере лафија со ка пхерѓон. Накхав то време те поможине е јаверенге хем ма циде ту таро мануша со мангена ту хем со грижинена пе туке (Изреки 18:1; 1. Коринќаните 15:58).
СО ШАЈ ТЕ КЕРЕ:
Кер лафи несаве амалеа со и туке паше хем мукх ле те поможинел ту.
Ов искрено хем вакер точно со ваљани туке.