Дали иси тут корист тари брошурка Дивескоро стихо?

Дали иси тут навика те читине о библиско стихо хем о коментари тари брошурка Дивескоро стихо? Ако на, дали шај те почмине те кере адава? Бут џене читинена о стихо сабајле, хем аѓаар шај те размислинен баши лесте цело диве (ИсН 1:8; Пс 119:97). Сар шај те овел тут панда побари корист таро читибе е дивескоро стихо? Читин о контекст котар сој лендо те шај те џане нешто повише. Трудин тут те сетинен тут ко несаво библиско извештај сој тано поврзимо е библиско начелоја кова сој истакнимо ко стихо. Пало адава размислин сар шај адава библиско начело те применинеле ко тло живото. Кеда анеа одлуке ко склад е Девлескере Лафеа, тегани мукхеа ов те водинел тут ко живото хем шај чаче те користинел туке (Пс 119:105).

О бетелска фамилие ко цело свето разглединена е дивескоро стихо ки Сабалутни библиско програма. Ко последна берша, ко повише чхибја сине чхивде коментарија тари сабалутни програма ко JW Broadcasting^® ко дело КОНГРЕСИЈА ХЕМ НАСТАНИЈА. Кеда последно пути дикхљан несаве лендар? Шај несаве информацие сој тане вакерде адатхе баш туке ваљанена. На пример, сар шај о извештај башо Лот те поможинел туке кеда анеа одлуке?

ДИКХ О ВИДЕОКЛИПИ МА МАНГЕН О СВЕТО (1ЈО 2:15), А ПАЛО АДАВА ОДГОВОРИН КО АКАЛА ПУЧИБА:

• Ко кова библиско начело темелинела пе сине акаја Сабалутни библиско програма?

• Сар о извештај башо Лот сикавела аменге кобор тано опасно те манга о свето или адава сој ки лесте? (1Мо 13:12; 14:12; 19:3, 12, 13, 24-26).

• Сар сикаваја кај мангаја е Јехова, а на о свето или о буќа сој ки лесте?