Ов храбро сар о Садок

1-2. Кој сине о Садок? (1. Летописи 12:22, 26-28).

РАЗМИСЛИН баши акаја ситуација. Кхединѓе пе повише таро 340.000 мурша те шај те керен е Давиде цари упро Израел. Трин диве тане упре ко планине паше ко Хеврон, коте со асана, керена песке лафи хем радосно гиљавена гиља коленцар со фалинена е Јехова (1. Лет. 12:39). Машкар адала мануша сине хем о терно Садок. Бут џене на би приметинена ле сине, ама о Јехова приметинѓа ле хем ов мангља амен да те џана кај о Садок сине адатхе. (Читин 1. Летописи 12:22, 26-28.) Кој сине о Садок?

² О Садок сине свештенико кова со паше соработинела сине е првосвештеникоја е Авијатареа. Исто аѓаар, о Девел денѓа ле бари мудрост хем способност те хаљовел лескири волја (2. Сам. 15:27). Кеда е манушенге ваљани сине мудро совет, ола родена сине адава таро Садок. Ов исто аѓаар сине храбро мануш. Ки акаја статија ка кера лафи баши акаја лескири особина.

3. а) Соске е Јеховаскере слуге ваљани те овен храбра? б) Со ка дикха ки акаја статија?

³ Ко акала последна диве, о Сатана са повише нападинела е Девлескере народо (1. Пет. 5:8). Адалеске, ваљани те ова храбра џикоте аџикераја о Јехова те чхивел крајо е Сатанаске хем лескере лошно светоске (Пс. 31:24). Те дикха трин начинија сар шај те ова храбра сар о Садок.

ПОДДРЖИН Е ДЕВЛЕСКЕРЕ ЦАРСТВО

4. Соске е Јеховаскере слугенге ваљани храброст те шај те поддржинен е Девлескере Царство? (Дикх хем и слика.)

⁴ Сар слуге е Јеховаскере, амен цело душаја поддржинаја е Девлескере Царство. Ама бут пути башо адава ваљани аменге храброст (Мат. 6:33). На пример, ко акава лошно свето, ваљани аменге храброст те шај те живина спрема е Девлескере мерилија хем те шај те проповедина о шукар хабери (1. Сол. 2:2). Хем, бут пути ко акава свето колесте со са повише хем повише овена поделбе, ваљани аменге храброст те шај те ачхова неутрална кеда керела пе лафи баши политика (Јован 18:36). Бут џене таро е Девлескоро народо доживинѓе економска проблемија, сине физички малтретириме или чхивде ко затвор адалеске со одбинѓе те мешинен пе ки политика или те џан ки војска.

5. Соске е Садокеске ваљанѓа храброст те шај те поддржинел е Давиде?

⁵ О Садок на гело ко Хеврон само те шај те славинел адава со о Давид уло цари. Ов леља пеа пло оружје хем сине спремно те боринел пе (1. Лет. 12:38). Ов сине спремно те џал е Давидеа ки борба хем те бранинел е Израелцон таро ленгере душмања. Шај фалинела леске сине искуство сар војнико, ама сигурно на фалинела леске сине храброст.

6. Сар о Давид сине шукар пример баши храброст е Садокеске? (Псалм 138:3).

⁶ Со поможинѓа јекхе свештеникоске сар о Садок те овел добором храбро? Ов пенџарела сине буте манушен кола со сине силна хем храбра. Сигурно, сиклило бут таро ленгоро пример. Машкар ленде сине хем о Давид. Адава со о Давид сине храбро водачи хем војнико, поттикнинѓа цело народо те поддржинел ле цело вилеа (1. Лет. 11:1, 2). О Давид секогаш родела сине помош таро Јехова кеда боринела пе сине пле душманенцар. (Пс. 28:7; читин Псалм 138:3.) О Садок сиклило хем таро јавера храбра мурша, сар со сине о Јодај хем лескоро чхаво о Венај, кова со сине војнико, хем таро 22 заповедникија кола со сине тари е Давидескири страна (1. Лет. 11:22-25; 12:26-28). Са акала мурша сине одлучна те поддржинен е Давиде сар цари хем те заштитинен ле.

7. а) Таро кола современа примерија баши храброст шај те сикљова? б) Со сикљовеа таро пример е пхралескоро Нсилу сар сој сикавдо ко видеоклипи?

⁷ Кеда размислинаја сар о јавера сикавѓе храброст те шај те ачховен верна е Јеховаске хем лескере Царствоске, амен да сием поттикниме те ова храбра. Амаро Цари, о Исус Христос, одлучно одбинѓа те овел дело таро политичко систем ко е Сатанаскоро свето (Мат. 4:8-11; Јован 6:14, 15). Ов секогаш молинела сине е Јехова те дел ле и храброст со ваљани леске. Ко амаро време, исто аѓаар иси бут примерија таро терне пхраља кола со одбинѓе те џан ки војска или те учествујнен ко политичка активностија. Ки jw.org шај те читине несаве таро ленгере искуствија.a

ПОМОЖИН ТЛЕ ПХРАЛЕНГЕ

8. Кеда шај ка ваљани храброст е старешиненге те шај те поможинен е пхраленге хем е пхењенге?

⁸ Е Јеховаскере слуге мангена те поможинен песке јекх јекхеа (2. Кор. 8:4). Ама, понекогаш башо адава ваљани храброст. На пример, кеда ка почминел несави војна, о старешине таро адава тхан хаљовена кај е пхраленге хем е пхењенге ваљани охрабрување хем поддршка. Освен адава, хаљовена кај шај ка ваљани те организиринен е пхрален хем е пхењен те овен лен Библие хем библиска публикацие хем те овел лен хајбаске, шеја хем тхан коте со ка бешен. Адалеске со мангена пумаре пхрален, о старешине грижинена пе ленге чак кеда адава тано бут опасно (Јован 15:12, 13). Кеда керена акава, ола џана пало е Садокескоро пример кова со сине храбро.

9. Спрема 2. Самоилова 15:27-29, со вакерѓа о Давид е Садокеске те керел? (Дикх хем и слика.)

⁹ Размислин башо адава сар о Садок поможинѓа пле пхраленге ко јекх опасно периоди. О Авесалом мангља те мударел пе даде е Давиде те шај те лел лескоро престол (2. Сам. 15:12, 13). О Давид мора сине одма те нашел таро Ерусалим. Адалеске, ов вакерѓа пле слугенге: „Уштен, те наша, соске никој амендар ка нашти те спасинел пе таро Авесалом!“ (2. Сам. 15:14). Џикоте о слуге џана песке сине, о Давид халило кај некој ка ваљани те ачхол ко Ерусалим те шај те вакерел леске со планиринела понадари о Авесалом. Адалеске, бичхалѓа е Садоке заедно јавере свештениконцар те иранен пе ки диз. (Читин 2. Самоилова 15:27-29.) Ола ваљани сине бут те пазинен. Адава со о Давид вакерѓа акале свештениконге те керен, сине бут ризично, чак ленгоро живото сине ки опасност. О Авесалом сине насилно хем себично мануш кова со сине спремно чак пе даде те мударел. Замислин со би керела сине е Садокеске хем е јавере свештениконге ако откринела сине кај ола шпиониринена ле те шај те заштитинен е Давиде!

10. Сар о Садок хем окола со сине леа заштитинѓе е Давиде?

¹⁰ О Давид керѓа јекх плани коте со сине вклучиме о Садок хем о Хусај, јекх јавер верно амал е Давидескоро (2. Сам. 15:32-37). О Хусај ваљани сине те керел пе кај поддржинела е Авесаломе хем те дел ле совет сар те нападинел е Давиде. Аѓаар, е Давиде ка овел ле сине време те спреминел пе башо напад. Пало адава, о Хусај вакерѓа е Садокеске хем е Авијатареске со планиринела те керел о Авесалом (2. Сам. 17:8-16). А ола о дуј вакерѓе адава е Давидеске (2. Сам. 17:17). Адалеске со о Јехова поможинѓа е Садокеске хем е јавере свештениконге, ола керѓе бут те шај те заштитинел пе е Давидескоро живото (2. Сам. 17:21, 22).

11. Сар шај те ова храбра сар о Садок кеда поможинаја амаре пхраленге?

¹¹ Ако сием замолиме те поможина амаре пхраленге кеда тане ки опасност, сар шај те сикава храброст сар о Садок? 1) Шун о упатствија. Ко асавке околностија важно тано те ачхова ко јекхипе. Спремно шун о упатствија тари тли подружница (Евр. 13:17). О старешине ваљани редовно те разглединен о локална упатствија башо адава сар те спреминен пе баши катастрофа хем о упатствија тари организација башо адава со те керен кеда иси несави катастрофа (1. Кор. 14:33, 40). 2) Ов храбро, ама пазин (Изр. 22:3). Размислин англедер те кере нешто. Ма чхив тут ко ризик бизи потреба. 3) Роде помош таро Јехова. Ма бистре кај о Јехова мангела ту хем те пхраља те овен безбедна. Ов шај те поможинел туке те де и помош со ваљани тле пхраленге ко јекх безбедно начин.

12-13. Со сикљовеа таро Виктор хем таро Виталиј? (Дикх хем и слика.)

¹² Размислин башо Виктор хем о Виталиј, дуј старешине кола со ингарена сине хајбаске хем пани е пхраленге хем е пхењенге ки Украина. О Виктор вакерела: „Родаја сине сегде коте со сине хајбе. Бут пути шај сине те шуна сар пукајнена околу аменде. Јекхе пхрале со сине ле повише храна гаравди ки страна, денѓа ла е пхраленге. Таро адава хајбе, бут објавителија добинѓе адава со ваљанѓа ленге те шај те преживинен несаво време. Џикоте чхиваја сине о буќа ко амаро камиони, само 20 метре амендар пели јекх бомба. Ко цело адава диве молинава сине е Јехова те дел ман и храброст со ваљанѓа манге те шај те продолжинав те поможинав е пхраленге хем е пхењенге“.

¹³ О Виталиј вакерела: „Ваљанѓа аменге бари храброст. О прво пути ваљанѓа манге 12 саатија те патујнав. Цело време молинава ман сине е Јеховаске“. О Виталиј сине храбро, ама исто аѓаар бут пазинела сине. Ов понадари вакерела: „Цело време молинава сине е Јехова те поможинел манге те овав мудро хем скромно. Возинава сине само таро друмија котар со сине дозволимо. Мли вера бут барили кеда дикхљум сар о пхраља хем о пхења соработинена заедно. Ола расчистинена сине о друмо те шај амен те накха, кхедена сине хем товаринена сине и хуманитарно помош хем грижинена пе сине ман хем е Викторе те овел амен хајбаске хем тхан одморибаске“.

АЧХОВ ВЕРНО Е ЈЕХОВАСКЕ

14. Сар шај те влијајнел упри аменде ако некој кас со мангаја мукхела е Јехова?

¹⁴ Јекх таро најпхаре буќа со шај те случинел пе аменге тано ако некој тари амари фамилија или несаво паше амал мукхела е Јехова (Пс. 78:40; Изр. 24:10). Кобор попаше сием леа, добором попхаро шај те овел аменге те истрајна ки адаја ситуација. Ако ту да доживинѓан асавко пхаро искуство, о пример е верно Садокескоро шај те керел тут позорало.

15. Соске е Садокеске ваљанѓа храброст те шај те ачхол верно е Јеховаске? (1. Царевите 1:5-8).

¹⁵ О Садок ачхило верно е Јеховаске кеда лескоро паше амал о Авијатар одлучинѓа те на овел више верно е Девлеске. Акава случинѓа пе ко крајо таро е Давидескоро владибе. Кеда о Давид сине бут пхуро хем аџикерела пе сине те мерел, лескоро чхаво о Адонија мангља те овел цари, иако о Јехова више одлучинѓа о Соломон те овел цари (1. Лет. 22:9, 10). О Авијатар одлучинѓа те поддржинел е Адонија. (Читин 1. Царевите 1:5-8.) Адале постапкаја, о Авијатар на само со на сине верно е Давидеске, него хем е Јеховаске. Шај ли те замислине туке кобор сине тажно хем разочаримо о Садок? Ов хем о Авијатар соработинѓе заедно сар свештеникија повише таро 40 берш (2. Сам. 8:17). Ола заедно грижинена пе сине башо „ковчег е чачутне Девлескоро“ (2. Сам. 15:29). Ко почеток, о солдуј поддржинена сине е Давиде сар цари хем керена сине бут јавер буќа ки служба е Јеховаске (2. Сам. 19:11-14).

16. Со шај поможинѓа е Садокеске те ачхол верно?

¹⁶ О Садок ачхило верно е Јеховаске иако о Авијатар анѓа појавер одлука. О Давид џанља кај секогаш шај те овел ле доверба ко Садок. Кеда шундило со мангља те керел о Адонија, о Давид денѓа задача е Садокеске, е Натанеске хем е Венајеске, те чхивен е Соломоне те овел цари (1. Цар. 1:32-34). О Садок сигурно сине бут охрабримо таро пример е јавере верна слугенгоро, сар со сине о Натан кова со исто аѓаар сине верно е Јеховаске хем поддржинела сине е царе е Давиде (1. Цар. 1:38, 39). Кеда о Соломон уло цари, ко тхан е Авијатареске сине чхивдо о свештенико о Садок (1. Цар. 2:35).

17. Сар шај те џа пало е Садокескоро пример ако некој кас со мангеа мукхела е Јехова?

¹⁷ Сар шај те џа пало пример е Садокескоро? Ако некој кас со мангеа одлучинѓа те мукхел е Јехова, сикав кај ту сиан одлучно те ачхове верно е Девлеске (Ис. Нав. 24:15). О Јехова ка дел тут и сила хем и храброст со ваљанена туке. Нека овел тут доверба ко Јехова аѓаар со ка молине тут леске хем ка ачхове паше околенцар со верно служинена леске. О Јехова бут ценинела тли верност хем ка наградинел тут башо адава (2. Сам. 22:26).

18. Со сикљовеа таро Марко хем тари Сидсе?

¹⁸ Размислин башо Марко хем баши лескири ромни и Сидсе, коленгере солдуј возрасна чхаја одлучинѓе те мукхен о чачипа. О Марко вакерела: „Панда таро прво диве кеда бијанѓовена те чхаве, ту бут мангеа лен. Ка кере са те шај те заштитине лен. Адалеске, тли душа дукхала тут ако ола одлучинена те мукхен е Јехова“. Понадари ов вакерела: „Ама о Јехова секогаш тано узи аменде. Ов дела сила ме ромњаке кеда ме сиум слабо, а дела сила манге кеда ој тани слабо“. И Сидсе вакерела: „Нане сине те истрајна ако о Јехова на дела амен сине и сила со ваљанѓа аменге. Мучинела ман сине и мисла кај ме сиум криво хем адалеске вакерава сине е Јеховаске сар осетинава ман. Пало кратко време, јекх пхен колаја со бершенцар на дикхлем амен, али узи манде, астарѓа ман ко пиќе, дикхља ман ко јакхја хем вакерѓа манге: ’Ма бистре Сидсе, на сиан ту криво!‘ Адалеске со о Јехова поможинѓа ман, успејнѓум те ачховав радосно џикоте служинава леске“.

19. Со сиан одлучно те кере?

¹⁹ О Јехова мангела са лескере слуге те овен храбра сар о Садок (2. Тим. 1:7). Сепак, ов на мангела те овел амен доверба ки амари сила, него мангела те овел амен доверба ки лесте. Адалеске, кеда ка аракхљове ки ситуација коте со ка ваљанел туке храброст, роде помош таро Јехова. Шај те ове сигурно кај ов ка поможинел туке те ове храбро исто сар со сине о Садок (1. Пет. 5:10).