Паше узо Вавел, сине јекх диз, со викинела пе сиен Ур. Ки адаја диз о мануша служинена сине јавере девленге, а на е Јеховаске. Ама ко Ур живинела сине јекх мануш со служинела сине само е Јеховаске. Лескоро анав сине Авраам.

О Јехова вакерѓа е Авраамеске: „Џа туке таро тло кхер хем тари тли фамилија, хем џа ки пхув со ка сикавав ла туке“. Пало адава, о Девел ветинѓа леске: „Тутар ка овел баро народо, хем преку туте ка керав шукарипе буте манушенге ки цели Пхув“.

О Авраам на џанља коте ваљани те џал, ама лесте сине ле доверба ко Јехова. О Авраам, лескири ромни и Сара, лескоро дад о Тара хем о унуко о Лот кхединѓе пе буќа хем послушно цидинѓе ко баро друмо.

О Авраам сине ле 75 берш кеда пле фамилијаја ресља ки пхув со мангља о Јехова те сикавел ла леске. Адаја пхув викинела пе сине Ханаан. Адари о Девел ветинѓа е Авраамеске: „Цело акаја пхув со дикхеа ла, ка дав ла тле чхавенге“. Ама, о Авраам хем и Сара сине пхуре хем на сине лен чхаве. Сар о Јехова ка исполнинел акава ветување?

О Авраам хем и Сара сине ко брако бут берша. Ола мукхле пумаро шужо кхер ко Ур хем живинена сине ко шаторија. Ама, и Сара на жалинела пе сине башо адава соске сине ла доверба ко Јехова.

И Сара добором бут мангела сине те овел ла чхаво со вакерѓа е Авраамеске: „Ако ми слугинка и Агара бијанела чхаво, ка овел сар мло“. Пало несаво време, и Агара бијанѓа мурш чхаво. Лескоро анав сине Исмаел.

Пало бут берша, кеда е Аврааме сине ле 99 берш а е Сара 89 берш, але ки ленде трин мурша те посетинен лен. О Авраам викинѓа лен те џан те бешен тело јекх каш те одморинен пе хем те дел лен те хан. Џанеа ли кој сине адала? Ола сине ангелија! Акала ангелија вакерѓе е Авраамеске: „Јавер берш акава време, ту хем ти ромни ка овел тумен чхаво“. И Сара сине ко шатори, ама шунѓа лен со керена лафи. Асандили ки песте хем вакерѓа песке: Сар шај ман те овел ман чхаво кеда сиум добором пхури?

Пало јекх берш, и Сара чаче бијанѓа мурш, сар со вакерѓа е Јеховаскоро ангели. О Авраам чхивѓа лескоро анав Исак, со значинела „асајбе“.

Кеда о Исак сине ле околу панџ берш, и Сара дикхља сар о Исмаел асала леске. Ој мангља те заштитинел пле чхаве, адалеске гели ко Авраам хем вакерѓа леске те палдел е Агара хем е Исмаеле. Ко почеток, о Авраам на мангља те керел адава. Ама, о Јехова вакерѓа леске: „Шун е Сара. Ме ка грижинав ман е Исмаелеске. А мле ветувања ка исполнинен пе преку о Исак“.