О Лот живинела сине пе какоја е Авраамеа ки пхув Ханаан. Сар со накхела сине о време, о Авраам хем о Лот сине лен добором бут животне со на сине лен више тхан сариненге. О Авраам вакерѓа е Лотеске: „Нашти повише те живина заедно ко јекх тхан. Прво ту бирин сави страна мангеа те џа, а ме ка џав ки јавер страна“. Акава со керѓа о Авраам сикавела кај ов на сине себично, нели?

О Лот дикхља кај и пхув узи диз Содом тани бут шужи. Адатхе сине бут пани хем зелено чар башо лескере животне. Адалеске биринѓа адава тхан, хем гело пе фамилијаја те живинел адари.

О мануша таро дизја Содом хем Гомор сине бут лошна. Ола сине добором лошна со о Јехова одлучинѓа те уништинел акала дуј дизја. Ама о Девел мангља те спасинел е Лоте хем лескере фамилија. Адалеске, бичхалѓа дуј ангелија, хем ола пхенѓе ленге: „Сиѓарен! Нашен тари акаја диз! О Јехова ка уништинел ла!“

Ама, о Лот на иклило одма кеда вакерѓе леске о ангелија. Адалеске ола астарѓе е Лоте таро вас, лескере ромња хем лескере дује чхаен хем икалѓе лен аври тари диз. Тегани вакерѓе ленге: „Прастан! Нашен те шај те спасинен тумен. Хем ма иранен тумен те дикхен палал, ако иранена тумен ка мерен!“

Кеда ресле ки диз Сигор, о Јехова таро небо мукхља јаг хем сулфур упро Содом хем Гомор. Акала дуј дизја сине целосно уништиме. Ама и ромни е Лотескири на сине послушно е Јеховаске хем иранѓа пе те дикхел палал, адалеске ули стубо таро лон. Ама, о Лот хем лескере дуј чхаја спасинѓе пе адалеске со сине послушна е Јеховаске. Сигурно сине ленге бут пхаро со ленгири дај на ачхили послушно. Чаче тано бут важно секогаш те шуна адава со вакерела аменге о Јехова.

О Авраам сикавѓа пе чхаве е Исако те мангел е Јехова хем те овел ле доверба ко лескере ветувања. Ама, кеда о Исак сине ле околу 25 берш о Јехова денѓа е Авраамеске бут пхари задача. Со ваљани сине те керел?

О Девел вакерѓа е Авраамеске: „Молинава тут, ле те единствено чхаве хем де ле сар жртва ки јекх планина ки пхув Морија“. О Авраам на џанља соске о Јехова родинѓа лестар те керел адава. Ама, ов ачхило леске послушно.

Тајсутно диве, рано сабајле, о Авраам, о Исак хем лескере дуј слуге цидинѓе те џан ки Морија. Пало трин диве пхирибе, ола шај сине дурал те дикхен о планине. О Авраам вакерѓа пе слугенге те аџикерен ле џикоте ов хем о Исак џана те ден жртва. О Авраам денѓа е Исакоске те пхиравел о кашта баши јаг хем ов леља и чхурик. О Исак пучља пе даде: „Кај тано о бакхро со ваљани те да ле жртва?“ О Авраам одговоринѓа: „О Јехова ка грижинел пе башо адава мо чхаво“.

Кеда ресле ки планина, керѓе о жртвенико. Тегани о Авраам пханља о васта хем о пре е Исакоскере хем чхивѓа ле ко жртвенико.

Кеда о Авраам леља и чхурик, тегани шунѓа сар е Јеховаскоро ангели вакерела: „Авраам! Ма кер е чхавеске ништо. Акана џанава кај иси тут вера ко Девел соске сиан сине спремно те де жртва те чхаве“. Тегани о Авраам дикхља јекх бакхро шингенцар заглавимо ки јекх грмушка. Одма пхравѓа е Исако хем ко лескоро тхан денѓа жртва е бакхре.

Таро адава диве о Јехова вакерѓа е Авраамеске кај тано лескоро амал. Џанеа ли соске? О Авраам сине спремно те керел са со ка родел лестар о Јехова, чак кеда на хаљола сине соске те керел адава.

О Јехова палем вакерѓа пло ветување е Авраамеске: „Ка благословинав тут хем ка керав те авел тутар баро потомство, или баро народо“. Исто аѓаар, о Јехова ветинѓа кај преку о Авраам хем лескере чхаве ка овен благословиме са о шукар мануша.