Кеда е Исако сине ле 40 берш, женинѓа пе е Ребекаја. Ов бут мангела ла сине. Пало несаво време, бијандиле ленге дуј мурша, близнакија.

Прво бијандило о Исав, а после о Јаков. О Исав бут мангела сине те овел аври, хем ов сине шукар ловџија. Ама, о Јаков повише мангела сине те овел кхере.

Ко адава време кеда ка мерел сине о дад, о најбаро чхаво добинела сине о најбаро дело тари пхув хем таро паре. Адава викинела пе сине наследство. Ки фамилија е Исакоскири, дело таро наследство исто аѓаар сине о ветувања со денѓа ле о Јехова е Авраамеске. Е Исавеске акала ветувања на сине бут важна, ама е Јаковеске сине важна.

Јекх диве ало песке о Исав бут уморно соске сине цело диве ко лов. Кеда дикхља кај о Јаков керела сине нешто шукар хајбаске пхенѓа леске: „Бут сиум бокхало, де ман те хав хари тари адаја лоли чорба“. О Јаков пхенѓа леске: „Ка дав тут, ама прво ветин манге кај ка де ман тло наследство“. О Исав вакерѓа: „Сој манге гајле башо наследство? Шај те ле ле. Само де ман те хав“. Со мислинеа, дали адава со керѓа о Исав сине мудро? На, на сине. О Исав мукхља нешто бут вредно, баши јекх обично чорба.

Кеда о Исак сине бут пхуро, ваљани сине те благословинел е прво чхаве. Ама, и Ребека поможинѓа е Јаковеске те добинел ов о благослов. Кеда о Исав шунѓа башо акава, хољанѓа бут хем мангља те мударел пе пхрале е близнако. Те шај те заштитинен е Јакове, о Исак хем и Ребека вакерѓе леске: „Џа ко то вујко, ко Лаван, хем ачхов адари са џикоте на смиринела пе о Исав“. О Јаков шунѓа о совет пле родителенгоро хем нашља те шај те спасинел пе.

О Јехова ветинѓа е Јаковеске кај ка заштитинел ле исто сар со заштитинѓа е Аврааме хем е Исако. О Јаков гело те живинел ко јекх тхан со викинела пе сине Харан, адари женинѓа пе, сине ле бари фамилија хем уло бут барвало.

Јекх диве, о Јехова вакерѓа е Јаковеске: „Иран тут ки тли пхув“. Тегани о Јаков хем лескири фамилија цидинѓе ко баро друмо. Џикоте сине панда ко друмо, несаве мануша вакерѓе е Јаковеске: „То пхрал о Исав авела акари, хем леа иси 400 мурша!“ О Јаков дарандило кај о Исав ка керел нешто лошно леске хем лескере фамилијаке. Ов молинѓа пе е Јеховаске: „Молинава тут спасин ман таро мо пхрал“. О јавер диве, о Јаков бичхалѓа е Исавеске сар поклонија бут бакхре, бузња, гурумња, камиле хем хера.

Адаја рат, кеда о Јаков сине коркори, дикхља јекх ангели! Адава ангели почминѓа те боринел пе леа. Ола боринѓе пе џи сабајле! Иако о Јаков сине повредимо, ов на чхинавѓа те боринел пе. О ангели вакерѓа: „Мукх ман“. Ама, о Јаков вакерѓа леске: „Нане те мукхав тут џикоте на благословинеа ман“.

Тегани о ангели благословинѓа ле. Аѓаар о Јаков џанља кај о Јехова нане те мукхел о Исав те керел леске нешто лошно.

Адава диве сабајле, о Јаков дикхља дурал сар авела о Исав заедно лескере 400 манушенцар. Ов гело поангле тари пли фамилија, хем ефта пути поклонинѓа пе англо по пхрал. О Исав прастандило џи ко Јаков хем гушнинѓа ле. Тегани о солдуј рунѓе хем смиринѓе пе. Со мислинеа, сар сине е Јеховаске кеда дикхља кобор шукар постапинѓа о Јаков ки акаја ситуација?

Пало адава, о Исав иранѓа пе кхере, а о Јаков продолжинѓа ко пло друмо. Е Јакове сине ле 12 мурша. О анава ленгере сине Рувим, Симеон, Леви, Јуда, Дан, Нефталим, Гад, Асер, Исахар, Завулон, Јосиф хем Бенјамин. Преку о Јосиф, о Јехова покасно спасинѓа пле народо. Џанеа ли сар? Те дикха.