О Јосиф сине јекх таро потикне чхаве е Јаковескере. Лескере попхуре пхраља дикхле кај ленгоро дад највише мангела ле. Со мислинеа сар осетинена пе сине лескере пхраља башо адава? Ола сине љубоморна е Јосифеске хем мрзинена ле сине. Кеда о Јосиф дикхља несаве чудна суне, вакерѓа лен пе пхраленге. Акала суне значинена сине кај јекх диве ола ка поклонинен пе леске. Адалеске ола мрзинена ле сине панда повише!

Јекх диве е Јосифескере пхраља аракхена сине е бакхрен паше узи диз Сихем. О Јаков бичхалѓа е Јосифе те дикхел дали тане шукар. Кеда дикхле ле дурал сар авела вакерѓе: „Аке авела акава со дикхела суне, ајде те мудара ле!“ Кеда ало, астарѓе ле хем фрдинѓе ле ки јекх хор дупка. Ама, о Јуда, јекх таро лескере пхраља, вакерѓа: „Ма мударен ле, пошукар тано те бикина ле сар робо“. Аѓаар бикинѓе ле башо 20 сребреникија несаве трговцонге таро Мадијам кола со џана сине ко Египет.

Пало адава, е Јосифескере пхраља топинѓе лескере шеја ко рат тари бузни, бичхалѓе лен ко ленгоро дад хем вакерѓе: „Акала нане ли о шеја те чхавескере?“ Тегани о Јаков мислинѓа песке кај несаво диво животно мударѓа е Јосифе. Адалеске сине бут тажно. Никој нашти сине те утешинел ле.

Ко Египет, о Јосиф сине бикимо сар робо јекхе важно манушеске со сине службенико, о анав лескоро сине Петефри. Ама, о Јехова понадари да сине е Јосифеа. О Петефри дикхља кај о Јосиф шукар керела пи бути хем кај шај те овел ле доверба ки лесте. Пало кратко време, ов чхивѓа ле те овел главно упро са со сине ле.

И ромни е Петефријаскири дикхља кај о Јосиф сине шужо хем силно. Секова диве пучела сине е Јосифе те совел лаја. Со керѓа о Јосиф? Ов одбинѓа ла хем вакерѓа: „На! Адава нане шукар. Мо господари иси ле доверба ки манде, а ту сиан лескири ромни. Ако суќум туја, ка грешинав е Девлеске!“

Јекх диве, е Петефријаскири ромни пробинѓа силаја те чхивел е Јосифе те совел лаја. Астарѓа ле таро шеја, ама ов нашља. Кеда о Петефри ало кхере, ој вакерѓа леске кај о Јосиф нападинѓа ла. Ама, адава на сине чаче. О Петефри сине бут хољамо, хем нарединѓа те чхивен е Јосифе ко затвор. Ама, о Јехова на бистерѓа е Јосифе.

Џикоте о Јосиф сине ко затвор, о фараони, о цари таро Египет, дикхља суне со никој нашти сине те вакерен леске со значинена. Јекх лескоро слуга вакерѓа леске кај о Јосиф шај те вакерел леске со значинена о суне со дикхља лен. О фараони вакерѓа одма те анен леске е Јосифе.

О фараони пучља ле: „Шај ли те објаснине манге со значинена о суне со дикхљум лен?“ О Јосиф вакерѓа е фараонеске: „Ко Египет ка овел ефта берш бут храна, а пало адава ефта берш ка овел баро бокхалипе. Бирин несаве мудро мануше кова со ка кхедел бут храна, аѓаар нане те мерен о мануша таро бокхалипе“. О фараони вакерѓа: „Ов ту адава мануш! Ту ка ове о дујто најмоќно мануш ко Египет“. Котар џанља о Јосиф со значинена сине о суне е фараонескере? О Јехова поможинѓа ле ко адава.

Пало адава, ефта берш о Јосиф кхедела сине храна. Кеда накхле адала ефта берш, ки цели Пхув сине бокхалипе, баш аѓаар сар со вакерѓа о Јосиф. О мануша таро разна тхана авена сине те кинен храна таро Јосиф. Кеда лескоро дад, о Јаков, шунѓа кај иси храна ко Египет, бичхалѓа деш таро пле чхаве те џан хем те кинен храна.

Кеда е Јаковескере чхаве геле ко Јосиф, ов одма пенџарѓа лен. Ама лескере пхраља на пенџарѓе ле. Ола поклонинѓе пе леске, баш аѓаар сар со дикхља о Јосиф ко суно кеда сине потерно. О Јосиф мангља те џанел дали лескере пхраља тане панда лошна. Адалеске вакерѓа ленге: „Тумен сиен шпиоња. Мангена те дикхен коте амари пхув нане заштитими“. Ола вакерѓе: „На, нане аѓаар! Амен сием 12 пхраља таро Ханаан. Јекх амаро пхрал муло, а о најтикно ачхило кхере амаре дадеа“. Тегани о Јосиф вакерѓа ленге: „Анен тумаре најтикне пхрале акате хем ка верујнав туменге“. Тегани ола иранѓе пе кхере ко пумаро дад.

Кеда е Јаковескири фамилија ачхили бизи храна, ов палем бичхалѓа пе чхавен те џан ко Египет. Ама, акава пути, леле пеа е најтикне пхрале, е Бенијамине. Те шај те дикхел дали лескере пхраља менинѓе пе, о Јосиф вакерѓа те чхивен лескири сребрено чаша ки торба е Бенјаминескири коте со сине гив, а пало адава ов вакерѓа кај ола чорѓе ла. Кеда о слуге е Јосифескере аракхле и чаша ки торба е Бенјаминескири, о пхраља лескере нашти сине те верујнен. Тегани почминѓе те молинен е Јосифе те казнинел лен, а на е Бенијамине.

О Јосиф дикхља кај лескере пхраља менинѓе пе. Ов нашти сине више те издржинел. Почминѓа те ровел хем вакерѓа ленге: „Ме сиум о Јосиф, тумаро пхрал. Дали мо дад тано панда џивдо?“ Лескере пхраља сине бут изненадиме. Адалеске вакерѓа ленге: „Ма секиринен тумен башо адава со керѓен манге. О Девел анѓа ман акате те шај те спасинел тумен. Акана џан посигате хем анен ме даде акате“.

Ола иранѓе пе кхере хем вакерѓе пе дадеске са со уло хем сарине заедно геле ко Египет. Пало бут берша, о Јосиф хем о дад лескоро сине палем заедно.