Ки пхув Уз, живинела сине јекх мануш со служинела сине е Јеховаске. Лескоро анав сине Јов. Ов сине бут барвало хем сине ле бари фамилија. Ов сине бут шукар, поможинела сине е чороле манушенге, е ромњенге со муле ленгере рома, хем е чхавенге со сине бизо родителија. Ама, дали адалеске со керела сине шукар буќа, на сине ле нисаве проблемија ко живото?

О Сатана дикхела сине е Јове, ама о Јов на џанела сине адава. О Јехова вакерѓа е Сатанаске: „Дикхљан ли ме слуга е Јове? Нане нијекх сар лесте ки Пхув. Ов шунела ман хем керела шукар буќа“. О Сатана пхенѓа леске: „Нормално кај ка шунел тут. Ту заштитинеа ле хем наградинеа ле. Деа ле пхув хем животне. Ле лестар са, па ка дикхе дали ка служинел туке“. О Јехова вакерѓа: „Шај те искушине ле. Ама на смејнеа те мударе ле“. Соске о Јехова мукхља о Сатана те искушинел е Јове? Адалеске со сине ле доверба кај о Јов нане те откажинел пе лестар.

О Сатана керѓа е Јове те овен ле некобор пхаре неволје. Прво, бичхалѓа манушен со викинена пе сине Савејција те чорен е Јовескере гурувен хем е херен. Пало адава, појавинѓа пе јаг таро небо хем тхабиле са е Јовескере бакхре. А јавера мануша, со викинена пе сине Халдејција, чорѓе лескере камилен. О слуге со аракхена сине акале животнен сине мударде. Пало адава, али и најбари неволја. Са о чхаве е Јовескере муле кеда о кхер коте со сине кхедиме те хан хем те пиен, пело упри ленде. Е Јовеске сине бут пхаро, ама на откажинѓа пе таро Јехова.

О Сатана мангља о Јов те цидел панда побаре муке, адалеске керѓа ко цело тело те овен ле чирија. Е Јове сине ле бут баре дукха. Ов на џанела сине соске овена леске са акала лошна буќа. О Јов понадари да служинела сине е Јеховаске. О Јехова дикхља са со уло е Јовеске, хем сине бут радосно со ачхило леске верно.

Пало несаво време, о Сатана бичхалѓа трине манушен те искушинен е Јове. Ола вакерѓе леске: „Сигурно керѓан несаво грево, ама гаравеа. Адалеске, о Девел казнинела тут“. О Јов вакерѓа: „На керѓум ништо лошно“. Ама, тегани почминѓа те мислинел кај о неволје тане таро Јехова, хем вакерѓа кај о Јехова нане праведно спрема лесте.

Јекх терно со викинела пе сине Елиу шунела сине со керена лафи. Ко крајо ов вакерѓа: „Адава со вакерена нане точно. О Јехова тано бут побаро таро адава со амен мислинаја. Ов никогаш на керела нешто лошно. Дикхела са хем поможинела е манушенге кеда иси лен проблемија“.

Тегани почминѓа о Јехова те керел лафи е Јовеа хем вакерѓа леске: „Кај сиан сине ту кеда керѓум о небо хем и Пхув? Соске вакереа кај на сиум праведно? Вакерѓан бут лафија, ама на џанеа соске овена акала буќа“. О Јов признајнѓа кај нане ко право хем вакерѓа е Јеховаске: „Грешинѓум. Ме порано само шунѓум баши туте, ама акана чаче пенџарава тут. Ту шај са те кере. Жал манге башо адава со вакерѓум“.

Кеда завршинѓе о искушенија, о Јехова керѓа о Јов палем те овел састо хем денѓа ле повише таро адава со сине ле поангле. О Јов живинѓа панда бут берша хем сине среќно. О Јехова наградинѓа е Јове со сине леске послушно чак кеда адава на сине локхо. Ка ове ли ту да послушно сар о Јов? Ка ачхове ли верно е Јеховаске било со те овел?

Ко Египет, и фамилија е Јаковескири ули пенџарди сар Израелција. Пало мерибе е Јаковескоро хем е Јосифескоро, почминѓа те владинел нево фараони. Ов дарандило кај о Израелција шај те овен посилна таро Египќајна. Адалеске, акава фараони керѓа о Израелција те овен робија. Ов чхивела лен сине те керен цигле хем те керен бут пхари бути ко ниве. Кобор повише теринела сине е Израелцон те керен бути, добором овена сине са побаро народо. Е фараонеске адава на свиџинела пе сине, адалеске денѓа наредба те овен мударде са о израелска мурша чхаве со ка бијанѓовен. Шај ли те замислине туке кобор дарандиле о Израелција?

Јекх Израелка со викинела пе сине Јохаведа бијанѓа бут шужо мурш чхаво. Те шај те заштитинел ле, чхивѓа ле ки јекх корпа хем гаравѓа ле машкаро трске ки река Нил. Е бебескири пхен, и Маријам, терѓола сине ки страна те дикхел со ка овел леа.

Е фараонескири чхај али те нанѓол ки река хем дикхља и корпа. Андре аракхља е бебе сар ровела хем ој бут жалинѓа ле. И Маријам пучља ла: „Мангеа ли те аракхав туке ромни со ка аракхел е чхаве?“ Кеда е фараонескири чхај вакерѓа кај мангела, и Маријам гели хем викинѓа пе даја, е Јохаведа. Е фараонескири чхај вакерѓа лаке: „Ле акале бебе хем аракх ле, ме ка платинав туке башо адава“.

Кеда барило хари о чхаво, и Јохаведа ингарѓа ле ки е фараонескири чхај. Ој денѓа ле о анав Мојсеј хем бајрарѓа ле сар пло чхаво. О Мојсеј барило ко е фараонескоро кхер хем шај сине те овел ле са со мангела. Ама, о Мојсеј никогаш на бистерѓа е Јехова. Ов џанела сине кај тано Израелцо, а на Египќани. Хем ов биринѓа те служинел е Јеховаске.

Кеда сине ле 40 берш, о Мојсеј одлучинѓа те поможинел пле народоске. Јекх диве кеда дикхља сар јекх Египќани марела јекхе Израелцо, о Мојсеј кхувѓа е Египќане добором силно со мударѓа ле. Пало адава, гаравѓа е манушескоро тело ки пошик. Ама, кеда о фараони шунѓа со керѓа о Мојсеј, мангља те мударел ле. Адалеске, о Мојсеј нашља ки пхув Мадијам. О Јехова грижинела пе сине леске адари.