О Мојсеј живинѓа ко Мадијам 40 берш. Адари женинѓа пе хем сине ле чхаве. Јекх диве, џикоте аракхела сине е бакхрен узи планина Синај, дикхља нешто чудно. Јекх грмушка сине ла јаг, а на тхабљол сине! Кеда о Мојсеј гело попаше те дикхел сој адава, ов шунѓа гласо тари грмушка сар вакерела леске: „Мојсеј! Ма ава попаше. Икал те сандале соске терѓовеа ко свето тхан“. Адава сине о Јехова со керела сине лафи преку јекх ангели.

О Мојсеј дарандило, хем адалеске учхарѓа по муј. О гласо пхенѓа: „Ме дикхљум кобор тане мучиме о Израелција. Ме ка спасинав лен таро Египќајна хем ка ингарав лен ки шукар пхув. Ту ка икале мле народо таро Египет“. Со мислинеа, дали о Мојсеј изненадинѓа пе кеда шунѓа акава?

О Мојсеј пучља: „Со ка вакерав кеда о мануша ка пучен ман кој бичхалѓа ман?“ О Девел одговоринѓа леске: „Вакер ленге кај бичхалѓа тут о Јехова, о Девел е Авраамескоро, о Девел е Исакоскоро, хем о Девел е Јаковескоро“. Ама, о Мојсеј пхенѓа: „Со ако о мануша на шунена ман?“ Тегани о Јехова керѓа чудо те шај те докажинел е Мојсејеске кај ка поможинел ле. Ов пхенѓа е Мојсејеске те фрдел о каш ки пхув. Тегани, о каш уло сап! Кеда о Мојсеј астарѓа е сапе тари порик, ов уло палем каш. О Јехова вакерѓа: „Кеда ка дикхен о мануша акава, ка верујнен кај ме бичхалава тут“.

О Мојсеј вакерѓа: „Ама ме на керава шукар лафи“. Адалеске о Јехова ветинѓа леске: „Ме ка вакерав туке со те вакере, хем ка бичхалав те пхрале е Ароне те поможинел тут“. Адалеске со џанља кај о Јехова тано леа, о Мојсеј леља пле ромња хем пле чхавен, хем гело ко Египет.

О Израелција сине робија хем мора сине те керен пхари бути. О Јехова бичхалѓа е Мојсеје хем е Ароне ко фараони те вакерен леске: „Мукх ме народо те џал ки пустина те дел манге жртва“. О фараони гордо вакерѓа: „Со интересинела ман со вакерѓа о Јехова. Нане те мукхав е Израелцон“. Тегани, о фараони чхивѓа лен те керен панда попхари бути. Ало време о Јехова те сикавел е фараонеске кој тано о Девел. Џанеа ли сар керѓа адава? Ов керѓа ко Египет те овен деш неволје. О Јехова вакерѓа е Мојсејеске: „О фараони на шунела ман. Тајса, рано сабајле, ов ка овел ки река Нил. Џа ки лесте хем пхен леске кај адалеске со на шунѓа ман хем на мукхља ме народо те икљол тари акаја пхув, цело пани ки река Нил ка овел рат“. О Мојсеј шунѓа ле хем гело ко фараони. О фараони дикхља сар о Арон кхувела е каштеа ко Нил, хем и река ули рат. И река почминѓа те кхандел, о мачхе ки лате муле, хем повише нашти сине те пиел пе латар пани. Ама, о фараони панда на мукхела сине е Израелцон те џан песке.

Пало ефта диве о Јехова палем бичхалѓа е Мојсеје ко фараони те вакерел леске: „Ако на мукхеа ме народо те џал песке тегани цело Египет ка овел пхердо жамбенцар“. О Арон ваздинѓа о каш хем цело пхув почминѓа те пхерѓол жамбе. О мануша аракхена сине жамбе ко ленгере кхера ко креветија хем ко чиние. Сегде сине жамбе! О фараони вакерѓа е Мојсејеске те молинел е Јехова те чхинавел акаја неволја. Ов ветинѓа кај ка мукхел е Израелцон те џан песке. Аѓаар, о Јехова чхинавѓа и неволја, хем о Египќајна кхединѓе са о жамбе со муле ко купе. И пхув почминѓа лошно те кхандел. Ама, о фараони палем на мукхља е Израелцон те џан песке.

Тегани о Јехова вакерѓа е Мојсеске: „О Арон ваљани те кхувел е каштеа ки пхув, хем и прашина ка овел комарција“. Таро јекх пути сегде летинена сине комарција. Несаве таро е фараонескере слуге вакерѓе леске: „Акаја неволја тани таро Девел“. Ама, о фараони акава да пути на мангља те мукхел е Израелцон те џан песке.