О Мојсеј хем о Арон геле те вакерен е фараонеске адава со вакерѓа ленге о Девел: „Ако на мукхеа мле народо те џал песке, ка мукхав грастане макхја те овен ки цело пхув“. Тегани, јекх купа макхја нападинѓе о Египет, хем е чоролен хем е барвален. Цело пхув сине пхерди асавке макхјенцар. Ама, ко Гесем, коте со живинена сине о Израелција, на сине макхја. О прва трин неволје сине хем е Египќаненге хем е Израелцонге, а о јавера неволје сине само е Египќаненге. О фараони вакерѓа: „Молинен тумен е Јеховаске те цидел акала макхја. Тегани ка мукхав тумаре народо те џал песке“. Ама, кеда о Јехова цидинѓа е макхјен, о фараони палем на мангља те мукхел е народо те џал песке. Пало са адава со уло, о фараони понадари да ачхило инатчија.

О Јехова вакерѓа: „Ако о фараони на мукхела ме народо, тегани о животне е Египќаненгере ка насваљовен хем ка мерен“. О тајсутно диве, о животне почминѓе те мерен. Ама, о животне е Израелцонгере на муле. Акава да пути о фараони на мукхља е народо те џал песке.

О Јехова вакерѓа е Мојсејеске те џал ко фараони, те лел право хем те фрдел ле ко воздух. О право со фрдинѓа ширинѓа пе хем учхарѓа цело египетско пхув. Тегани е Египќаненге хем ленгере животненге иклиле ране со бут дукхана лен сине. Ама о фараони, ни пали акаја неволја на мангља те мукхел лен.

Адалеске о Јехова палем бичхалѓа е Мојсеје ко фараони те пхенел леске: „Панда ли на мангеа те мукхе ме народо? Тајса ка перел бари кукуди ки акаја пхув“. О тајсутно диве о Јехова мукхља кукуди, громија хем јаг. Адава сине најстрашно невреме со некогаш доживинѓе о Египќајна. Са о кашта хем о растенија сине уништиме, а ко Гесем на уло ништо. О фараони вакерѓа: „Молинен е Јехова те чхинавел акава! Пало адава ка мукхав тумен“. Ама, кеда чхинавѓа те перел и кукуди хем о бршим, о фараони палем на мукхља е народо те икљол таро Египет.

Тегани о Мојсеј вакерѓа: „А акана, о скакулција ка хан са со ачхило таро адава со уништинѓа о невреме“. Пало адава, појавинѓе пе бут скакулција хем хале са со ачхило ко ниве хем ко кашта. О фараони палем вакерѓа: „Молинен е Јехова те спасинел амен таро скакулција“. Ама, иако о Јехова цидинѓа е скакулцен, о фараони палем на мангела сине те мукхел е народо.

О Јехова вакерѓа е Мојсејеске: „Вазде то вас упре ко небо“. Ко адава моменти, о небо калило. Трин диве о Египќајна сине ки темница, нашти сине ништо те дикхен. Само коте со живинена сине о Израелција сине светло.

О фараони вакерѓа е Мојсејеске: „Ту хем тло народо шај те џан туменге. Мукхен само тумаре животнен акате“. О Мојсеј вакерѓа леске: „Мора те ла амаре животнен те шај те да жртве амаре Девлеске“. О фараони сине бут хољамо. Почминѓа те викинел: „Циде тут мандар! Ако панда јекх пути иклиљан англо ме јакхја, ка мударав тут!“

О Мојсеј ветинѓа е фараонеске кај нане те авел палем ки лесте. Ама, англедер те џал песке лестар, вакерѓа леске: „Ки екваш и рат, секова првобијамо чхаво ко Египет, таро е фараонескоро чхаво па са џи ко чхаве е робонгере ка мерен“.

О Јехова вакерѓа е Израелцонге те керен јекх посебно хајбе. Ов вакерѓа ленге: „Чхинен јекх бакхро или бузни, мурш, пхуро јекх берш, хем таро лескоро рат макхен о авруне удара таро кхера“. Пекен о мас хем хан ле мареа бизо квасацо. Џикоте хана, овен уравде, о сандале нека овен туменге ко пре хем овен спремна те циден. Акаја рат ка ослободинав тумен“. Шај ли те замислине туке кобор сине радосна о Израелција?

Ки екваш и рат, е Јеховаскоро ангели накхља таро секова кхер ко Египет. Ко удара коте со на сине рат, мударѓа е првобијаме чхавен. Ама, ко кхера со сине макхле ратеа на керѓа ништо. Ко секова египетско кхер, барвало или чороло, муло лендар чхаво. Ама, са е Израелцонгере првобијаме чхаве ачхиле џивде.

Муло чак е фараонескоро да чхаво. О фараони нашти сине више те издржинел акава. Ов одма вакерѓа е Мојсејеске хем е Аронеске: „Џан туменге акатар. Џан хем служинен тумаре Девлеске. Лен тумаре животнен хем џан туменге!“

Кеда сине пхерди месечина, о Израелција иклиле таро Египет, делиме ко фамилие хем ко племија. Сине 600.000 израелска мурша хем бут џувља хем чхаве. Исто аѓаар, ленцар сине јавера да мануша со иклиле таро Египет хем геле те служинен е Јеховаске. О Израелција конечно сине ослободиме!

Те шај те сетинен пе сар о Јехова спасинѓа лен, ола ваљани сине секова берш те спреминен асавко посебно хајбе. Акава диве викинела пе сине Пасха.