О Јехова вакерѓа е Мојсејеске: „Ава ки манде ки планина. Ка пишинав туке мле законија ко плоче таро бар хем ка дав лен туке“. О Мојсеј гело ки планина хем адари ачхило 40 диве хем 40 раќа. Џикоте сине адатхе, о Јехова пишинѓа о деш заповедија ко дуј плоче таро бар хем денѓа лен е Мојсејеске.

Пало несаво време о Израелција мислинѓе кај о Мојсеј мукхља лен. Ола вакерѓе е Аронеске: „Ваљани аменге некој со ка водинел амен! Кер аменге девел!“ О Арон вакерѓа: „Ден ман тумаро злато.“ Ов топинѓа о злато хем лестар керѓа златно телцо. Тегани о мануша вакерѓе: „Акава телцо тано амаро девел со икалѓа амен таро Египет!“ Ола почминѓе те обожавинен е златно телцо хем те кхелен околу лесте. Дали адава сине погрешно? Оја, соске о народо ветинѓе кај ка служинен само е Јеховаске. Ама, акана ола на икерѓе пе ко пло ветување.

О Јехова дикхља со уло, хем вакерѓа е Мојсејеске: „Џа теле ко мануша. Ола нане манге послушна хем служинена ховавне девлеске.“ О Мојсеј хулило тари планина хем пеа леља о дуј плоче.

Кеда ало попаше узо логори, о Мојсеј шунѓа сар о народо гиљавела. Тегани дикхља сар о народо кхелела хем сар поклонинела пе е златно телцоске. О Мојсеј бут хољанѓа. Тегани фрдинѓа о дуј плоче таро бар хем ола пхагиле ко котора. Одма уништинѓа о златно телцо. Пало адава пучља е Ароне: „Сар убединѓа тут о народо те кере акаја лошно бути?“ О Арон вакерѓа: „Ма хољан. Џанеа саво тано акава народо. Ола мангле девел, топинѓум ленгоро злато хем керѓум акава златно телцо!“ О Арон керѓа бари грешка. О Мојсеј иранѓа пе палем ки планина хем молинѓа таро вило е Јехова те простинел е манушенге.

О Јехова простинѓа адаленге со мангле те ачховен леске послушна. Дали хаљовеа кобор сине важно о Израелција те шунен е Мојсеје?

Кеда о Мојсеј сине ки планина Синај, о Јехова вакерѓа леске те керел јекх посебно шатори, со викинела пе сине свето шатори. Адатхе о Израелција шај сине те обожавинен ле. Ола ваљани сине те лен пеа о шатори сегде коте со џана сине.

О Јехова вакерѓа: „Вакер е манушенге те дел секој кобор со шај хем адалеа те керел пе о шатори“. О Израелција денѓе злато, сребро, бакари, скапоцено бара хем накит. Ола исто аѓаар денѓе волна, лен, животинско кожа хем бут јавера буќа. Добором бут буќа денѓе со мора сине о Мојсеј те вакерел: „Кхединѓем доволно! Ма анен ништо више“.

Бут мурша хем џувља со џанена сине шукар те керен адаја бути, поможинѓе те керел пе о шатори. О Јехова денѓа лен мудрост те шај шукар те керен и бути. Несаве ткајнена сине или везинена сине, а јавера рединена сине бара, обработинена сине о злато хем резбинена сине каш.

О мануша керѓе о шатори баш аѓаар сар со вакерѓа ленге о Јехова. Ола керѓе јекх бут шужи завеса со делинела сине о шатори ко дуј делија. Јекх дело викинела пе сине Свето, а о јавер Најсвето. Ко Најсвето дело, сине чхивдо о ковчег башо сојуз, ов сине кердо таро каш акација хем таро злато. А ко Свето дело сине златно светилнико, астали хем жртвенико коте со тхарела пе сине темјан. Ко дворо сине бакарно мијалнико хем баро жртвенико. О ковчег башо сојуз сетинкерела сине е Израелцон ко ленгоро ветување кај ка овен послушна е Јеховаске. Џанеа ли со значинела о лафи сојуз? Адава тано јекх посебно ветување.

О Јехова биринѓа е Ароне хем лескере чхавен те служинен ко шатори сар свештеникија. Ола ваљани сине те грижинен пе башо шатори хем те ден жртве е Јеховаске. Само о Арон, кова со сине првосвештенико шај сине те кхувел ко Најсвето дело таро шатори. Адава керела сине јекх пути ко берш, кеда дела сине жртва башо пле гревија, башо пле фамилијакере гревија хем башо гревија е цело израелско народоскере.

О Израелција завршинѓе о шатори јекх берш откеда иклиле таро Египет. Акана сине лен тхан коте со шај сине те служинен е Девлеске.

О Јехова сикавѓа кај прифатинела сар керѓе о шатори адалеа со чхивѓа јекх облако упри лесте. Са џикоте сине о облако упро шатори, о Израелција ачхона сине ко исто тхан. Ама, кеда о облако ка ваздел пе, адава сине ленге знако кај ваљани те џан песке таро адава тхан. Тегани кхедена сине о шатори хем џана сине пало облако.