О Израелција геле песке тари планина Синај, хем преку и пустина Фаран, ресле џи ко јекх тхан со викинела пе сине Кадис. Адатхе о Јехова вакерѓа е Мојсејеске: „Бичхал 12 мурша, по јекх таро секова племе, те испитинен и пхув Ханаан, адаја пхув ка дав ла е Израелцонге“. Адала мануша сине пенџарде сар „шпиоња“. О Мојсеј биринѓа 12 мурша, хем вакерѓа ленге: „Џан ко Ханаан хем дикхен дали ки адаја пхув шај те бајрол храна. Дикхен о мануша дали тане силна или слаба хем дали живинена ко шаторија или ко дизја“. Тегани о 12 мурша, машкар кола сине о Исус Навин хем о Халев, геле ко Ханаан.

Пало 40 диве о шпиоња иранѓе пе хем анѓе пеа смокве, калинке хем дракха. Ола вакерѓе: „И пхув тани бут шукар ама о мануша тане силна хем живинена ко дизја кола со иси лен уче зидија“. Ама о Халев вакерѓа: „Шај те победина лен. Ма те аџикера, ајде те џа одма!“ Дали џанеа соске о Халев вакерѓа акава? Адалеске со ов хем о Исус Навин сине лен доверба ко Јехова. Ама, о јавера деш шпиоња вакерѓе: „На! О мануша адари тане баре сар џинија! Амен сием ленге сар скакулција“.

Акава бут разочаринѓа е Израелцон. Ола почминѓе те жалинен пе хем јекх јекхеске те вакерен: „Ајде те бирина аменге јавер водачи хем те ирана амен ко Египет. Соске те џа ко адава тхан хем адари те мера?“ О Исус Навин хем о Халев вакерѓе: „Шунен е Јехова хем ма даран. Ов ка заштитинел амен“. Ама, о Израелција на мангле те шунен ле. Ола чак мангле те мударен е Исус Навине хем е Халеве!

Со керѓа о Јехова? Ов вакерѓа е Мојсејеске: „Пало са адава со керѓум башо Израелција ола палем на шунена ман. Адалеске ка ачховен ки пустина 40 берш, хем адатхе ка мерен. Само ленгере чхаве, хем о Исус Навин хем о Халев, ка живинен ки пхув со ветинѓум кај ка дав ла ленге“.

Пало несаво време, џикоте о Израелција сине ки пустина, о Кореј, о Датан, о Авирон хем јавера 250 мануша противинѓе пе е Мојсејеске. Ола вакерѓе леске: „Доста аменге више тутар! Соске мора баш ту те ове амаро водачи, а о Арон првосвештенико? О Јехова тано аменцар да, а на само туја хем е Аронеа“. О Јехова бут хољанѓа. Акава сине сар те пхене бунинена пе против о Јехова.

О Мојсеј вакерѓа е Корејеске хем е манушенге со сине леа: „Авен тајса ко шатори, хем анен тумаре кадилникија е темјанеа. О Јехова ка сикавел кас биринѓа“.

О тајсутно диве, о Кореј хем о 250 мануша геле ко шатори башо обожавање те аракхен пе е Мојсееја. Адатхе тхарѓе темјани сар со керена сине о свештеникија. О Јехова вакерѓа е Мојсејеске хем е Аронеске: „Циден тумен таро Кореј хем таро лескере мануша“.

О Кореј гело ко шатори башо обожавање, ама о Датан, о Авирон хем ленгере фамилие на мангле те џан. О Јехова вакерѓа е Израелцонге те циден пе таро е Корејескере, е Датанескере хем е Авиронескере шаторија. О Израелција одма цидинѓе пе. О Датан, о Авирон хем ленгере фамилие терѓовена сине англо пле шаторија. Таро јекх пути и пхув пхравдили хем ола пеле андре! Ко влези таро шатори башо обожавање хулили јаг таро Јехова хем тхарѓа е Кореје хем лескере 250 манушен.

О Јехова вакерѓа е Мојсејеске: „Ле по јекх каш таро поглавари таро секова племе. Ко секова каш пишин о анав е поглаварескоро, ама, ко каш таро племе Леви пишин о анав е Аронескоро. Пало адава, чхив о кашта ко шатори башо обожавање. Е мануше со ка биринав, ко лескоро каш ка бајрон лулуѓа“.

О јавер диве, о Мојсеј икалѓа са о кашта хем сикавѓа лен е поглаваренге. Ко е Аронескоро каш бариле лулуѓа хем зрела бадемија. Ко акава начин, о Јехова сикавѓа кај биринѓа е Ароне те овел првосвештенико.