Е Валаамескири херни керѓа лафи

О Израелција сине околу 40 берша ки пустина. Ола освојнѓе бут дизја. Акана, кеда сине ко Моав источно тари река Јордан, ало о време те кхувен ки Ветими пхув. О Валак, о цари таро Моав, дарандило кај о Израелција ка лен лескири пхув. Адалеске викинѓа јекхе мануше со викинела пе сине Валаам те авел ко Моав хем те дел арман е Израелцон.

Ама, о Јехова вакерѓа е Валаамеске: „На смејнеа те де арман е Израелцон“. Адалеске о Валаам на мангља те џал. О цари, о Валак, палем викинѓа ле, ама акава пути ветинѓа кај ка дел ле са со мангела. Ама, о Валаам палем одбинѓа. Тегани о Девел вакерѓа леске: „Шај те џа, ама ка вакере адава ме со ка вакерав туке“.

О Валаам уклило ки херни хем цидинѓа те џал ко Моав. Ов решинѓа те дел арман е Израелцон иако о Јехова вакерѓа леске те на керел адава. Е Јеховаскоро ангели појавинѓа пе ко друмо трин пути. О Валаам нашти сине те дикхел ле ама и херни шај сине. О прво пути, и херни мангља те нашел хем почминѓа те џал ки јекх нива. Пало адава, лепинѓа пе ко зидо хем стегинѓа о про е Валаамескоро. Ко крајо, и херни пашлили машкаро друмо. Секова пути кеда и херни на мангела сине те џал, о Валаам марела ла сине каштеа.

Пало трито пути, о Јехова керѓа и херни те шај те керел лафи. Ој пучља е Валааме: „Соске добором мареа ман?“ О Валаам одговоринѓа лаке: „Кереа ман делино! Те овел ман сине мачи џи акана ка мударав тут сине“. И херни вакерѓа: „Бут берша служинава туке. Дали некогаш керѓум туке нешто асавко?“

Тегани о Јехова керѓа те шај о Валаам да те дикхел е ангеле. О ангели пхенѓа: „О Јехова вакерѓа туке те на де арман е Израелцон“. О Валаам вакерѓа: „Грешинѓум. Ка ирана ман кхере“. Ама, о ангели вакерѓа леске: „Шај те џа ко Моав ама те вакере адава со ка вакерел туке о Јехова“.

Дали о Валаам сиклило нешто таро адава со уло леске? На. Пало адава, о Валаам мангља трин пути те дел арман е Израелцон. Ама, о Јехова, о сотрин пути лескере лафија керела лен сине те овен благослов. Ко крајо, о Израелција нападинѓе о Моав хем о Валаам сине мудардо. Со мислинеа, нане ли те овел сине пошукар о Валаам те шунел е Јехова?