Кеда о израелска шпиоња але ки диз Ерихон, ола сине ко кхер ки јекх ромни со викинела пе сине Раав. О цари таро Ерихон шунѓа башо адава хем бичхалѓа војникија ко лакоро кхер. Ој гаравѓа е шпионен ко крови хем бичхалѓа е војникон те џан ко погрешно друмо. И Раав вакерѓа е шпионенге: „Ка поможинав тумен соске џанава кај о Јехова тано туменцар хем кај тумен ка освојнен акаја пхув. Ама, молинава тумен, ветинен манге кај ка спасинен ме фамилија“.

Ола вакерѓе е Рааваке: „Ветинаја туке кај никој таро тло кхер нане те овел повредимо. Мукх те висинел јекх лоло шело тари тли пенџерка, хем ти фамилија ка овел спасими“.

И Раав чхивѓа јекх шело те шај акала дуј Израелција те хулен тари пенџерка. Ола геле ки планина хем гаравѓе пе адари трин диве, пало адава иранѓе пе ко Исус Навин. Тегани, о Израелција накхле и река Јордан хем спреминѓе пе те освојнен и ханаанско пхув. О Ерихон сине и прво диз со освојнѓе ла. О Јехова вакерѓа ленге јекх пути ко диве те пхирен околу о Ерихон хем аѓаар те керен шов диве. Ко ефтато диве, адава керѓе ле ефта пути. Тегани о свештеникија пхудинѓе ко шинга, а о војникија викинѓе гласно. О ѕидија околу о Ерихон рушинѓе пе! Ама о кхер е Раавакоро, кова со сине градимо ко адала ѕидија, на рушинѓа пе. И Раав хем лакири фамилија спасинѓе пе адалеске со сине лен доверба ко Јехова.

Ки цели ханаанско пхув шундило со уло ко Ерихон. О царија таро Ханаан кхединѓе пе заедно те боринен пе против о Израелција. Ама, о Гаваонција сине лен јавер плани. Уравѓе пуране шеја, геле ко Исус Навин хем вакерѓе леске: „Аваја тари дур пхув. Шунѓем башо Јехова хем са со керѓа баши туменде ко Египет хем ко Моав. Ветинен кај нане те нападнинен амен, хем амен ка ова тумаре слуге“.

О Исус Навин верујнѓа акале манушенге хем ветинѓа ленге кај нане те нападинен лен. Ама, пало трин диве шунѓа кај ола нане тари дур пхув. Ола сине таро Ханаан. О Исус Навин пучља лен: „Соске ховавѓен амен?“ Ола одговоринѓе: „Амен дарандилем! Џанаја кај о Јехова тумаро Девел боринела пе туменге. Молинаја тумен, ма мударен амен“. О Исус Навин керѓа адава со ветинѓа, хем на мударѓа лен.

Пало несаво време, кхединѓе пе панџ ханаанска царија те нападинен е Гаваонцон. О Исус Навин хем лескири војска пхирѓе цели рат те џан те спасинен лен. И борба почминѓа рано сабајле. О Ханаанција почминѓе те нашен ко са о стране. Ама таро Јехова нашти сине те нашен, ов мукхља ленге кукуди. Пало адава о Исус Навин молинѓа пе е Јеховаске те керел те ачхол о кхам ко јекх тхан. Сар шај сине те родел нешто со никогаш англедер на сине? О Исус Навин сине ле доверба ко Јехова! О кхам ачхило ко јекх тхан хем силно светинѓа са џикоте о Израелција на побединѓе е ханаанско царен хем ленгере војскен.