О Исус Навин водинѓа е Јеховаскере народо бут берша хем муло кеда сине ле 110 берш. Са џикоте ов сине џивдо, о Израелција служинена сине е Јеховаске. Ама пало лескоро мерибе, почминѓе те служинен е идоленге, сар со керена сине о Ханаанција. Адалеске со о Израелција на шунена сине е Јехова, ов мукхља о цари таро Ханаан, со викинела пе сине Јавин, те керел ленге бут лошна буќа. О мануша молинена сине е Јехова те поможинел лен. О Јехова шунѓа ленгере молитве хем денѓа лен нево водачи, о Варак. Ов ваљани сине те поможинел е народоске палем те служинен е Јеховаске.

Јекх диве, и пророчица, и Девора викинѓа е Варако. Ој вакерѓа леске порака таро Јехова: „Ле туја 10.000 мануша хем икљов англи е Јавинескири војска ки река Кисон. Адари ка победине е Сисара, о заповеднико е Јавинескере војскакоро“. О Варак вакерѓа е Девораке: „Ка џав само ако ту авеа манцар“. Ој вакерѓа леске: „Ка авав. Ама, те џане нане ту те мударе е Сисара. О Јехова вакерѓа манге кај ка мударел ле џувли“.

И Девора гели е Варакоја хем лескере војскаја ки планина Тавор те спреминен пе баши војна. Само со шунѓа о Сисара башо адава, кхединѓа ки долина пе манушен хем о кочие баши војна. И Девора вакерѓа е Варакоске: „Авдиве о Јехова ка керел те победине“. О Варак хем лескере 10.000 мануша, хулиле тари планина те икљон англи силно војска е Сисараскири.

Тегани о Јехова керѓа о пани тари река Кисон те поплавинел и долина. Адава тхан уло добором чикало со о воена кочие е Сисараскере заглавинѓе. Тегани о Сисара иклило тари пли кочија хем почминѓа те нашел. О Варак хем лескири војска успејнѓе те побединен е Сисараскере војска, ама о Сисара нашља. Тегани гаравѓа пе ко шатори јекхе џувљакоро, со викинела пе сине Јаила. Ој денѓа ле те пиел тхуд хем учхарѓа ле ќебаја. Ов сине бут уморно хем засуќа. Тегани и Јаила похари гели узи лесте хем е клинеа таро шатори мударѓа ле.

О Варак ало те родел е Сисара. И Јаила иклили таро шатори хем вакерѓа: „Кхув андре. Ка сикавав туке е мануше со родеа ле“. Кеда о Варак кхувѓа андре дикхља е Сисара сар пашљола муло. Тегани, о Варак хем и Девора фалинѓе е Јехова аѓаар со гиљавѓе леске гили адалеске со поможинѓа е Израелцонге те побединен пле душманен. Пало адава, о Израелција сине лен мир 40 берш.

Кеда сине баро бокхалипе ко Израел, јекх Израелка со викинела пе сине Ноемина заедно пе ромеа хем пе дује чхавенцар гели те живинел ко Моав. Пало несаво време муло о ром лакоро. Лакере чхаве женинѓе пе дује Моавкенцар — и Рут хем и Орфа. Ама, пало несаво време о чхаве да муле.

Кеда шунѓа и Ноемина кај ко Израел нане више бокхалипе, ој решинѓе те иранел пе адари. Лакере бојра и Рут хем и Орфа, цидинѓе ко друмо лаја, ама џикоте џана сине и Ноемина вакерѓа ленге: „Тумен сиен сине шукар ромња ме чхавенге хем шукар бојра манге. Ме мангава палем те женинен тумен. Адалеске, иранен тумен ко Моав“. Тегани и Рут хем и Орфа вакерѓе: „Амен бут мангаја тут! Нане те мукха тут“. И Ноемина понадари да убединела лен сине те џан песке. Ко крајо и Орфа гели песке, а и Рут ачхили пе сасаја. И Ноемина вакерѓа лаке: „И Орфа иранѓа пе ко пло народо хем ко пле девела. Џа ту да лаја. Ама, и Рут вакерѓа: „Нане те мукхав тут. Тло народо ка овел мло народо, хем тло Девел ка овел мло Девел“. Со мислинеа, сар осетинѓа пе и Ноемина кеда и Рут вакерѓа лаке акала лафија?

И Рут хем и Ноемина ресле ко Израел ко време кеда кхедела пе сине јачмен. Јекх диве и Рут гели те кхедел о јачмен со ачхола сине, ој кхедела сине ки е Воозескири нива кова со сине е Раавакоро чхаво. О Вооз шунѓа кај и Рут тани Моавка која со ачхили пе сасаја, е Ноеминаја. Адалеске, ов вакерѓа пле работниконге те мукхен хари повише јачмен ки нива те шај и Рут те кхедел ле.

Адаја рат, кеда и Рут иранѓа пе кхере, и Ноемина пучља ла: „Ки каскири нива керѓан бути“. И Рут вакерѓа: „Ки нива јекхе манушескири со викинела пе Вооз“. Тегани и Ноемина пхенѓа лаке: „О Вооз тано фамилија ме ромеске. Ачхов те кере бути ки лескири нива е јавере чхаенцар. Адатхе сиан ко сигурно“.

И Рут џала сине понадари да ки нива е Воозескири са џикоте на завршинѓа и жетва. О Вооз приметинѓа кај и Рут тани бут буќарни хем шукар ромни. Ко адава време кеда мерела сине о ром бизо те овел ле чхаве, некој тари лескири фамилија шај сине те женинел пе лескере ромњаја со ачхили удовица. Адалеске о Вооз леља е Рута ромњаке. Ленде сине лен мурш чхаво, хем денѓе ле анав Овид. Покасно, о Овид уло е Давидескоро папо. О амалинка е Ноеминакере бут радунѓе пе. Ола вакерѓе: „Прво о Јехова денѓа тут е Рута, која со сине бут шукар туја хем акана денѓа тут унуко да. Кобор тано шукар о Јехова!“