Сар со накхела сине о време, о Израелција палем чхинавѓе те служинен е Јеховаске хем почминѓе те обожавинен ховавне девела. Ефта берш о Мадијамција чорена сине е Израелцонгере животнен хем уништинена сине са со сине лен садимо ко ниве. Те шај те нашен таро Мадијамција, о Израелција мора сине те гаравен пе ко пештере хем ко планине. Ола бут молинена сине е Јехова те спасинел лен. Адалеске о Јехова бичхалѓа јекхе ангеле ко терно Гедеон. О ангели вакерѓа леске: „О Јехова биринѓа тут те спасине е народо“. О Гедеон пучља: „Сар ка спасинав е Израелцон? Кој сиум ме те керав адава?“

О Гедеон мангља те уверинел пе кај о Јехова чаче биринѓа лесте. Адалеске, ов чхивѓа бакхрани кожа ки пхув хем вакерѓа е Јеховаске: „Тајса сабајле ако сине и кожа сапани а и пхув шуки, ка џанав кај мангеа ме те спасинав е Израелцон“. О тајсутно диве, и кожа сине бут сапани, а и пхув шуки. Ама, о Гедеон родинѓа панда нешто таро Јехова. Ов вакерѓа леске тајса сабајле и кожа те овел шуки а и пхув сапани. Аѓаар уло да. Акава уверинѓа е Гедеоне кај о Јехова биринѓа ле. Адалеске, кхединѓа пле војска те шај те боринен пе е Мадијамцонцар.

О Јехова вакерѓа е Гедеонеске: „Ка поможинав е Израелцонге те побединен“. Ама, иси тут бут војникија туја, шај те мислинен туменге кај коркори побединѓен лен. Адалеске, вакер сариненге со дарана те џан песке кхере“. Тегани, 22.000 војникија геле песке кхере, а 10.000 ачхиле. О Јехова вакерѓа: „Панда сиен бут војникија. Ингар лен ки река хем вакер ленге те пиен пани. Ле туја само адален со, џикоте пиена пани дикхена пе стране те на авел ленге несаво душмани“. Само 300 војникија пиена сине пани аѓаар. О Јехова ветинѓа кај акала хари џене ка побединен е мадијамско војска која со сине ла 135.000 мануша.

Адаја рат о Јехова вакерѓа е Гедеонеске: „Акана нападин е Мадијамцон“. О Гедеон денѓа пе манушенге шинга хем баре кхоре коте со сине тхаре факелија. Тегани вакерѓа ленге: „Дикхен ме со керава хем керен тумен да аѓаар“. О Гедеон пхудинѓа ки шинг, пхагља о кхоро, ваздинѓа о факели хем викинѓа ко цело гласо: „О мачи е Јеховаскоро хем е Гедеонескоро!“ Одма пало адава, о 300 војникија керѓе исто аѓаар. О Мадијамција бут дарандиле хем почминѓе те нашен ко са о стране. Добором сине буниме со почминѓе те мударен пе машкар песте. О Јехова акава да пути поможинѓа е Израелцонге те побединен пле душманен.

Јекх Израелцо кова со викинела пе сине Елкана сине ле дуј ромња — и Ана хем и Фенина. Ама, ов мангела сине повише е Ана. И Фенина цело време асала сине е Анаке хем понижинела ла адалеске со на сине ла чхаве, а е Фенина сине ла бут чхаве. Секова берш о Елкана ингарела сине пе фамилија ко Сило, коте со сине о шатори башо обожавање, те ден жртва е Јеховаске. Јекх пути, џикоте сине ко Сило, ов приметинѓа кај и Ана, кола со бут мангела ла, сине бут тажно. О Елкана вакерѓа: „Ма ров, Ана. Аке ме сиум туја хем ме мангава тут“.

Покасно и Ана гели коркори ко шатори башо обожавање те молинел пе. Ој нашти сине те чхинавел е ројбаја џикоте молинела сине е Јехова те поможинел лаке. Ој денѓа лафи: „Јехова ако денѓан ман мурш чхаво, ме ка дав ле туке те служинел цело пло живото“.

О првосвештенико o Илиј дикхља сар и Ана керела коркори пеа лафи ама гласо на шунѓола латар хем мислинѓа кај тани мати. Ама, ој вакерѓа леске: „На сиум мати, господаре, него иси ман баро проблеми хем аљум те вакерав ле е Јеховаске“. О Илија халило кај грешинѓа хем вакерѓа е Анаке: „Нека дел тут о Девел адава со родеа лестар“. И Ана осетинѓа пе пошукар хем иранѓа пе ки пи фамилија. О јавер берш и Ана бијанѓа мурш хем чхивѓа о анав лескоро Самоил. Шај ли те замислине туке кобор сине радосно и Ана?

И Ана на бистерѓа со денѓа лафи е Јеховаске. Само со чхинавѓа те дел е Самоиле тхуд, ој ингарѓа ле ко шатори башо обожавање те служинел е Јеховаске. Ој вакерѓа е Илијаске: „Аке о чхаво баши касте со молинѓум е Јехова те дел ле манге. Дава ле е Јеховаске те служинел леске цело пло живото“. О Елкана хем и Ана секова берш џана сине те посетинен е Самоиле хем ингарена леске сине по јекх неви наметка. О Јехова денѓа е Ана панда трин мурша хем дуј чхаја.