О Израелција палем мукхле е Јехова хем почминѓе те обожавинен ховавне девела. Кеда о Амонција нападинѓе е Израелцон, о ховавне девела нашти сине те поможинен ленге. О Израелција бут берша цидена сине муке. Ко крајо ола вакерѓе е Јеховаске: „Грешинѓем. Молинаја тут спасин амен таро амаре душмања“. Тегани уништинѓе пумаре идолија хем почминѓе палем те служинен е Јеховаске. О Јехова нашти сине више те дикхел лен сар цидена муке.

О Јехова биринѓа јекх војнико кова со викинела пе сине Јефтај те водинел е народо ки војна против о Амонција. Ов вакерѓа е Јеховаске: „Ако поможинѓан аменге те победина ки акаја војна, ветинава туке кај кеда ка иранав ман кхере адава со ка икљол прво таро мло кхер, ка дав ле туке“. О Јехова шунѓа е Јефтајескири молитва хем поможинѓа леске те побединел.

Кеда иранѓа пе о Јефтај кхере, прво таро удара иклили лескири чхај, која со сине леске единствено чхаво. Ој кхелела сине хем кхувела сине ко дајре. Кеда дикхља ла о Јефтај сетинѓа пе ко пло ветување хем вакерѓа лаке: „О ми чхај! Мора ли сине прво ту те икљове англи манде? Ветинѓум е Јеховаске хем те шај те керав адава со ветинѓум мора те бичхалав ту ко шатори башо обожавање ко Сило“. Ама, и чхај лескири вакерѓа леске: „Мо дад, ако ветинѓан нешто е Јеховаске мора те исполнине ле. Само мукх ман прво те џав дуј масек ки планина ме амалинкенцар. А пало адава ка џав ко Сило. Е Јефтајескири чхај верно служинѓа ко шатори башо обожавање џи ко крајо таро пло живото. Секова берш лакере амалинка џана сине ко Сило те дикхен ла.

О првосвештенико, о Илиј сине ле дуј чхаве кола со служинена сине ко шатори сар свештеникија. Ленгере анава сине Офни хем Финес. Ола на шунена сине е Јеховаскере заповедија хем бут лошно понашинена пе сине е јаверенцар. Кеда о Израелција анена сине жртве е Јеховаске, о Офни хем о Финес лена сине песке о најшукар дело таро мас. О Илиј шунѓа башо адава со керена сине лескере чхаве, ама на керела сине ништо. Дали о Јехова мукхља акала буќа аѓаар те ачховен?

О Самоил сине бут потерно таро Офни хем таро Финес, ама на џала сине пало ленгоро пример. О Јехова сине бут задоволно таро Самоил. Јекх рат џикоте о Самоил совела сине, шунѓа сар некој викинела ле ко анав. Уштило, прастандило ко Илиј хем вакерѓа леске: „Аке сиум!“ О Илиј вакерѓа леске: „Ме на викинѓум тут. Иран тут те сове“. О Самоил иранѓа пе те совел, ама палем шунѓа адава гласо. Кеда шунѓа о Самоил трито пути палем исто гласо, о Илиј халило кај о Јехова тано адава со викинела ле. Тегани ов вакерѓа е Самоилеске кеда ка шунел палем акава гласо, те пхенел: „Вакер Јехова. Тло слуга шунела тут“.

О Самоил иранѓа пе палем те пашљол. Тегани, шунѓа сар о гласо викинела: „Самоил! Самоил!“ Ов одговоринѓа: „Вакер Јехова. Тло слуга шунела тут“. О Јехова вакерѓа леске: „Вакер е Илијаске кај ка казнинав, ле хем лескере фамилија. Ов џанела кај лескере чхаве керена лошна буќа ко мло шатори, ама ништо на керела“. О тајсутно диве сабајле, о Самоил пхравѓа о удар таро шатори, сар со керела сине адава стално. Ов дарала сине те вакерел е првосвештеникоске со вакерѓа леске о Јехова. Ама, о Илиј викинѓа ле хем пучља ле: „Мо чхаво, со вакерѓа туке о Јехова? Вакер манге са“. Тегани о Самоил вакерѓа леске са со пхенѓа леске о Јехова.

Џикоте бајрола сине о Самоил о Јехова цело време сине леа. Са о Израелција џанена сине кај о Јехова биринѓа е Самоиле те овел пророко хем судија.