О Јехова вакерѓа е Самуелеске: „Џа ко кхер е Јесејескоро. Јекх таро лескере чхаве ка овел цари ко Израел пало Саул“. Тегани о Самоил гело ко Јесеј. Кеда дикхља е најпхуредер чхаве, мислинѓа песке: „О Јехова сигурно биринѓа акале“. Ама, о Јехова вакерѓа е Самоилеске кај на биринѓа лесте. Ов вакерѓа леске: „Ме дикхава саво о вило е манушескоро, а на сар изглединела авријалдан“.

О Јесеј анѓа англо Самоил панда пе шове чхавен. Ама, о Самоил вакерѓа леске: „О Јехова на биринѓа нијекхе лендар. Иси тут ли панда чхаве?“ О Јесеј вакерѓа леске: „Иси ман панда јекх о најтикно, о Давид. Ов аракхела е бакхрен“. Кеда ало о Давид, о Јехова вакерѓа е Самоилеске: „Лесте биринѓум!“ О Самоил чхорѓа масло упро лескоро шеро хем адалеа помазинѓа ле те овел о јавер цари ко Израел.

Пало несаво време, о Израелција почминѓе војна е Филистејцонцар, тари ленгири страна сине јекх бут баро војнико, со викинела пе сине Голијат. Ов секова диве асала сине е Израелцонге. Гласно викинела сине: „Ајде, нека авел некој те боринел пе манцар. Ако побединѓа ов амен ка ова тумаре робија. Ама, ако побединава ме тегани тумен ка овен амаре робија“.

Јекх диве, о Давид ало ко тхан коте со сине и Израелско војска те анел хајбаске пе пхраленге кола со сине војникија. Кеда шунѓа со вакерела о Голијат, о Давид вакерѓа: „Ме ка боринав ман леа“. О цари о Саул вакерѓа леске: „Ама ту сиан панда тикно“. Ама, о Давид вакерѓа: „О Јехова ка поможинел ман“.

О Саул денѓа е Давидеске пли опрема баши војна, ама о Давид пхенѓа: „Нашти те боринав ман акале опремаја“. О Давид леља шело колеа со фрдена пе сине бара хем гело ки јекх река. Адатхе биринѓа панџ мазна бара хем чхивѓа лен ки пли торба. Тегани прастандило ко Голијат. О Голијат вакерѓа леске: „Ава ки манде, тикнеа. Туја ка парварав е птицен хем е дива животнен“. Ама, о Давид на дарандило. Ов вакерѓа леске: „Ту авеа манге мачеа хем копјеа, а ме авава туке е Јеховаскере анавеа! Ту на боринеа тут против аменде, него против о Девел. Сарине сој акате ка дикхен кај о Јехова тано посилно таро мачи хем таро копје. Авдиве ов ка предајнел тумен ко амаре васта“.

Тегани, о Давид чхивѓа јекх бар ко шело, хем почминѓа те вртинел ле са пе силаја. О Јехова поможинѓа о бар те кхувел е Голијате право ко чекат. Тегани ов пело ки пхув хем муло. Кеда дикхле адава, о Филистејција почминѓе те нашен. Дали иси тут доверба ко Јехова сар со сине е Давиде?

Откеда о Давид мударѓа е Голијате, о цари, о Саул чхивѓа ле те водинел е војска. О Давид побединела сине ко бут војне хем уло бут пенџардо. Секогаш кеда иранела пе сине тари несави војна, о џувља кхелена сине хем гиљавена сине: „О Саул мударѓа буте манушен, ама о Давид панда повише“. Адалеске о Саул уло љубоморно е Давидеске хем мангља те мударел ле.

О Давид бут шукар башалела сине ки харфа. Јекх диве, џикоте башалела сине е Саулеске, о Саул фрдинѓа о копје те мударел ле. О Давид сигате цидинѓа пе хем о копје кхувѓа ко ѕидо. Пало адава, о Саул мангља бут пути те мударел ле. Адалеске, о Давид нашља хем гаравѓа пе ки пустина.

О Саул леља 3.000 војникија хем гело те родел е Давиде. Бизо те џанел, кхувѓа ки пештера коте со гаравела пе сине о Давид пе манушенцар. Тегани е Давидескере мануша вакерѓе леске: „Аке туке шанса те мударе ле“. О Давид похари гело узо Саул хем бизо те осетинел ле чхинѓа котор тари лескири наметка. Пало адава, е Давидеске сине пхаро, соске адалеа сикавѓа кај на поштујнела е царе со сине биримо таро Јехова. Ов на мукхља пле манушен те нападинен е Сауле. Кеда иклило о Саул тари пештера, о Давид викинѓа хем вакерѓа леске кај шај сине те мударел ле ама кај на керѓа адава. Дали о Саул откажинѓа пе таро адава те мударел е Давиде?

На. О Саул панда родела ле сине. Јекх рат, о Давид пе унукоја е Ависајеа але чорјале ко логори е Саулескоро. Адатхе сарине совена сине, чак о чувари е Саулескоро, о Авенир. О Ависај вакерѓа: „Аке аменге шанса. Мукх ман те мударав ле!“ Ама, о Давид одговоринѓа: „О Јехова ка иранел е Саулеске. Те ла лестар само о копје хем о кхоро хем те џа“.

Кеда о Давид уклило ки планина котар со дикхјола сине о логори викинѓа: „Авенир соске на аракхеа е царе? Кај тане лескоро копје хем о кхоро?“ О Саул пенџарѓа о гласо е Давидескоро хем вакерѓа: „Шај сине те мударе ман, ама на керѓан адава. Џанава кај пали манде ту ка ове цари ко Израел“. Пало адава, о Саул иранѓа пе ки пли палата. Ама, сарине тари е Саулескири фамилија на мрзинена сине е Давиде.