О најпхуредер чхаво е Саулескоро, викинела пе сине Јонатан хем сине бут храбро војнико. О Давид вакерѓа кај о Јонатан сине побрзо таро орло хем посилно таро лави. Јекх диве, о Јонатан дикхља ко јекх брего 20 филистејска војникија. Пе војникоске со ингарела сине лескоро штити вакерѓа: „Ка нападина лен само ако о Јехова дела амен знако. Ако о Филистејција вакерена аменге те џа ки ленде, тегани ка нападина лен.“ О Филистејција викинѓе: „Авен те борина амен!“ Тегани, о Јонатан хем о мануш со пхиравела сине лескоро штити геле хем побединѓе е филистејско војникон.

Адалеске со о Јонатан сине најпхуредер чхаво е Саулескоро, ов ваљани сине те овел о јавер цари пало по дад. Ама, о Јонатан џанела сине кај о Јехова биринѓа е Давиде те овел о јавер цари ко Израел хем ов на сине љубоморно башо адава. О Јонатан хем о Давид уле бут паше амала. Ола ветинѓе песке кај ка заштитинен хем кај ка бранинен јекх јекхе. О Јонатан денѓа е Давидеске пли наметка, о мачи, и стрела хем по појас сар знако башо амалипе.

Јекх пути, џикоте о Давид гаравела пе сине таро Саул, о Јонатан гело ки лесте хем вакерѓа леске: „Ов храбро, хем ма дара. О Јехова биринѓа тут те ове цари. Чак мо дад џанела адава“. Мангеа ли те овел тут добором шукар амал сар о Јонатан?

Бут пути, о Јонатан чхивѓа пло живото ки опасност само те поможинел пе амалеске. Ов џанела сине кај о дад лескоро о Саул, мангела те мударел е Давиде адалеске вакерѓа леске: „Ка кере грево ако мудареа е Давиде, ов на керѓа ништо лошно“. Кеда шунѓа акава о Саул бут хољанѓа е Јонатанеске. Пало несаве берша, о Саул хем о Јонатан муле ки јекх војна.

Кеда муло о Јонатан, пало адава, о Давид родинѓа лескере чхаве е Мефивостеје. Кеда анѓе ле ки лесте, о Давид вакерѓа: „Адалеске со сиум сине те дадеа паше амала, ме ка грижинав ман туке цело тло живото. Ка живине ки мли палата хем ка ха тари мли софра“. О Давид никогаш на бистерѓа пе амале е Јонатане.

Кеда муло о Саул, о Давид уло цари. Тегани сине ле 30 берш. Накхле некобор берша откеда уло цари, јекх диве иклило ко крови тари пли палата хем адатхар дикхља јекхе шуже ромња. О Давид дознајнѓа кај лакоро анав тано Витсавеа хем кај тани женими јекхе војникоја со викинела пе Урија. О Давид вакерѓа те анен ла ки палата. Тегани ов суќа лаја хем ој ачхили кхамни. О Давид мангља те гаравел адава со керѓа. Ов вакерѓа е заповедникоске е војскакоро те чхивел е Урија ко прва редија кеда ка џан те боринен пе, хем пало адава сарине те циден пе палал, те мукхен ле коркори. Тегани е Урија мударѓе ле ки војна, а о Давид леља е Витсавеа ромњаке.

Ама, о Јехова дикхља са о лошна буќа со керѓа лен. Со керѓа о Јехова? Ов бичхалѓа пле пророко е Натане ко Давид. О Натан вакерѓа леске: „Јекх барвало мануш сине ле бут бакхре, а јекх чороло мануш сине ле само јекх бакхро со мангела ле сине бут. Ама, о барвало мануш леља о бакхро е чоролескоро“. О Давид хољанѓа хем вакерѓа: „Адава барвало мануш ваљани те мерел!“ Тегани о Натан вакерѓа е Давидеске: „Ту сиан адава барвало мануш!“ Адава бут погодинѓа е Давиде хем признајнѓа е Натанеске: „Грешинѓум е Јеховаске“. Башо акава грево со керѓа ле, о Давид хем лескири фамилија сине лен бут неволје. О Јехова казнинѓа е Давиде ама мукхља ле џивдо адалеске со сине искрено хем понизно.

Покасно, о Давид мангља те градинел храми е Јеховаске, ама о Јехова биринѓа лескере чхаве е Соломоне те градинел леске храми. О Давид почминѓа те спреминел материјали е Соломонеске те шај те градинел о храми. О Давид вакерѓа: „О храми е Јеховаскоро мора те овел бут шужо. О Соломон тано панда терно, ама ме ка поможинав ле. Ка спреминав са со ваљани леске“. О Давид денѓа бут паре, аракхља шукар мајсторија хем кхединѓа бут злато хем сребро. Исто аѓаар, ов анѓа кедрово каш таро Тир хем таро Сидон. Англедер те мерел, о Давид денѓа е Соломонеске о планија башо градибе е храмескоро. Ов вакерѓа: „О Јехова вакерѓа манге те пишинав акала буќа те шај те дав лен туке. О Јехова ка поможинел тут. Ма дара ов храбро хем почмин те градине“.