Кеда о Соломон уло цари ко Израел, о Јехова пучља ле: „Со мангеа те дав тут?“ О Соломон вакерѓа: „Ме сиум терно хем на џанава со те керав. Молинава тут те де ман мудрост те шај шукар те водинав те народо“. О Јехова вакерѓа: „Адалеске со родинѓан мандар мудрост, ка керав тут те ове најмудро мануш ки цело Пхув. Исто аѓаар, ка керав тут те ове бут барвало. Хем ако сиан манге послушно ка живине бут берша“.

О Соломон почминѓа те градинел о храми. Ов користинѓа о најшужо злато, сребро, каш хем бар. Бут искусна мурша хем џувља керѓе бути ко храми. Пало ефта берш, о храми сине завршимо хем спремно те посветинел пе е Јеховаске. Адатхе сине жртвенико хем ки лесте сине жртве. О Соломон бешља ко кочија англо жртвенико хем молинѓа пе: „Јехова акава храми нане туке доволно баро или доволно шужо, ама молинава тут прифатин амаре жртве хем шун амаре молитве“. Со мислинела сине о Јехова башо храми хем баши молитва е Соломонескири? Кеда завршинѓа о Соломон е молитваја, о Јехова мукхља јаг таро небо хем тхарѓа о жртве ко жртвенико. Адалеа о Јехова сикавѓа кај прифатинела о храми со керѓе ле. Кеда о Израелција дикхле акава, ола бут радујнѓе пе.

О цари о Соломон сине пенџардо сар бут мудро мануш ко цело Израел хем ко бут јавера тхана. О мануша авена сине ко Соломон те шај те поможинел лен те решинен пумаре проблемија. Чак и царица тари Сава али ки лесте те пучел ле пхаре пучиба те шај те дикхел дали тано чаче адава со вакерена баши лесте. Кеда шунѓа лескере одговорија, ој пхенѓа: „Ме на верујнѓум ко адава со вакерена сине о мануша баши туте, акана дикхава кај сиан помудро таро адава со вакерена. То Девел, о Јехова, наградинѓа тут“. О мануша ко Израел живинена сине бут шукар хем среќно. Ама о буќа менинѓе пе.

Џикоте о Соломон служинела сине е Јеховаске, ко Израел сине мир. Ама, о Соломон леља песке бут ромња таро јавера пхувја хем адала ромња служинена сине идоленге. Хари похари, о Соломон менинѓа пе хем ов да почминѓа те служинел идоленге. Адалеске о Јехова хољанѓа леске. Ов вакерѓа е Соломонеске: „Ка лав о Израел тари тли фамилија хем ка делинав ле ко дуј делија. О побаро дело ка дав ле јекхе тле слугаске, а ти фамилија ка владинел само е потикне делоја“.

О Јехова ко јавер да начин сикавѓа кај чаче ка керел адава. Јекх таро слуге е Соломонескере, о Јеровоам, џикоте џала сине ко друмо аракхља е пророко е Ахија. О Ахија пхаравѓа пли наметка ко 12 котора хем вакерѓа е Јеровоамеске: „О Јехова ка лел о цартсво Израел тари фамилија е Соломонескири хем ка делинел ле ко дуј делија. Ле деш таро акала котора соске ту ка ове цари упро деш племија“. Кеда о Соломон шунѓа башо акава, мангља те мударел е Јеровоаме! Адалеске о Јеровоам нашља ко Египет. Пало несаво време, о Соломон муло, а лескоро чхаво о Ровоам уло цари. О Јеровоам дикхља кај шај те иранел пе палем ко Израел.

О старешине ко Израел вакерѓе е Ровоамеске: „Ако сиан шукар е манушенцар, ола ка овен туке верна“. Ама, лескере потерне амала вакерѓе леске: „Мора те ове строго е манушенцар! Чхив лен те керен панда попхари бути!“ О Ровоам шунѓа о совет пле потерне амаленгоро. Ов сине е манушенцар лошно хем адалеске ола уле против лесте. Ола чхивѓе е Јеровоаме те овел цари упро деш племија кола со уле пенџарде сар царство таро Израел. О јавера дуј племија уле пенџарде сар царство тари Јуда хем ачхиле верна е Ровоамеске. Аѓаар о 12 племија таро Израел сине делиме.

О Јеровоам на мангља лескоро народо те џал ко Ерусалим те обожавинел е Јехова, соске о Ерусалим сине ко царство е Ровоамескоро. Ов дарала сине кај о народо ка цидел пе лестар хем ка овел тари е Ровоамескири страна. Адалеске, керѓа дуј златна телција хем вакерѓа пе народоске: „О Ерусалим тано бут дур. Акате обожавинен е Девле“. О мануша почминѓе те обожавинен е златна телцон хем палем бистерѓе е Јехова.