О царство Израел со сине ле деш племија сине ле бут лошна царија, ама о Ахав сине јекх таро најлошна. Ов леља песке лошно ромни со обожавинела сине е Ваале. Лакоро анав сине Језавела. О Ахав хем и Језавела керѓе ки цело пхув те обожавинел пе о Ваал хем мударѓе буте пророкон е Јеховаскере. Со керѓа о Јехова? Ов бичхалѓа е пророко е Илија те вакерел нешто е Ахавеске.

О Илија вакерѓа е Ахавеске адалеске сој бут лошно ко Израел нане те дел бршим. Повише таро трин берш, ко ниве на барило ништо хем о мануша сине бут бокхале. Пало адава, о Јехова палем бичхалѓа е Илија ко Ахав. О цари вакерѓа: „Ту кереа аменге само проблемија! Ту сиан криво башо са“. О Илија вакерѓа: „Ме на сиум криво со на дела бршим. Ту сиан криво соске обожавинеа е Ваале. Ајде те дикха кој тано о чачутно Девел. Кхеде са е народо хем е Ваалескере пророкон ки планина Кармил“.

Кеда о мануша кхединѓе пе ки планина, о Илија вакерѓа ленге: „Одлучинен со ка керен. Ако о Јехова тано о чачутно Девел, служинен леске. А ако тано о Ваал, тегани служинен леске. Ајде те дикха адава. О 450 пророкија е Ваалескере нека спреминен пли жртва хем нека молинен пе леске, а ме ка спреминав жртва хем ка молинав ман е Јеховаске. О Девел со ка одговоринел јагаја, ов тано о чачутно Девел“. О мануша сложинѓе пе.

О пророкија е Ваалескере спреминѓе и жртва. Цело диве молинена пе сине пумаре девлеске: „Ваал, шун амен!“ Ама, о Ваал на одговоринела сине, адалеске о Илија асала ленге сине, хем вакерѓа: „Викинен повише. Шај совела, па ваљани некој те ваздел ле таро сојбе“. Почминѓа те раќол, а е Ваалескере слуге панда родена ле сине. Ама, ов на одговоринѓа ленге.

О Илија чхивѓа пли жртва ко жртвенико хем чхорѓа пани упри лате. Тегани молинѓа пе: „Јехова молинава тут, сикав ленге кај сиан ту о чачутно Девел“. Ко адава моменти, о Јехова мукхља јаг таро небо хем тхарѓа и жртва. О мануша почминѓе те викинен: „О Јехова тано о чачутно Девел!“ О Илија вакерѓа: „Астарен е Ваалескере пророкон те на нашен!“ Адава диве са о 450 пророкија е Ваалескере сине мударде.

Кеда појавинѓа пе ко небо јекх тикно облако, о Илија вакерѓа е Ахавеске: „Ка овел невреме. Укли ки тли кочија хем џа туке кхере“. О небо калило, почминѓа те пхудел бари бавлал хем пало бут време палем почминѓа те дел баро бршим. О Ахав возинѓа и кочија бут сигате. Ама, е Јеховаскере силаја, о Илија прастандило посигате тари кочија! Дали завршинѓе е Илијаскере муке? Те дикха.

И Језавела бут хољанѓа кеда шунѓа со уло е Ваалескере пророконге. Ој бичхалѓа те вакерен е Илијаске: „Тајса ка ове мудардо сар е Ваалескере пророкија. О Илија бут дарандило хем адалеске нашља ки пустина. Ов молинѓа пе: „Јехова нашти више те издржинав. Мангава те мерав“. О Илија на сине ле више сила хем засуќа тело јекх каш.

Јекх ангели ваздинѓа ле таро сојбе хем вакерѓа леске: „Ајде ушти хем ха“. Тегани о Илија дикхља јекх погача маро упро тате бара хем јекх кхоро пани. Ов хаља таро маро хем пиља пани хем палем засуќа. О ангели палем ваздинѓа ле таро сојбе хем вакерѓа леске: „Ха, соске ваљани туке сила башо друмо со ка џа“. Адалеске, о Илија хаља панда хари маро. Пало адава, ов цидинѓа друмо со трајнела сине 40 диве хем 40 раќа, са џикоте на ресља ки планина Хорив. Адатхе о Илија кхувѓа ки јекх пештера те совел. Ама, о Јехова пучља ле: „Со кереа акате Илија?“ О Илија одговоринѓа леске: „О Израелција на икерѓе пе ко адава со ветинѓе туке. Ола уништинѓе тле жртвеникија хем мударѓе тле пророкон. А, акана мангена те мударен манде да“.

О Јехова вакерѓа леске: „Џа хем терѓов ки планина“. Тегани почминѓа те пхудел силно балвал. Пали балвал сине земјотрес хем пало адава сине јаг. Ко крајо, о Илија шунѓа пријатно хем тивко гласо. Тегани о Илија учхарѓа по муј пле наметкаја хем иклило тари пештера. О Јехова пучља ле соске нашља. О Илија вакерѓа: „Само ме ачхиљум џивдо“. Ама, о Јехова пхенѓа леске: „На сиан само ту. Ко Израел иси панда 7.000 мануша со служинена манге верно. Џа хем чхив е Елисеје те овел пророко ко тло тхан“. О Илија одма гело те керел адава со вакерѓа леске о Јехова. Со мислинеа, дали о Јехова ка поможинел тут ако кереа адава со родела тутар ов? Оја, ка поможинел тут. Ајде те дикха нешто со уло ко Израел џикоте на дела сине бршим.