Ко Израел џикоте сине суша, о Јехова вакерѓа е Илијаске: „Џа ки Сарепта. Адари јекх удовица ка дел тут те ха“. Кеда ресља ко порте е дизјакере, о Илија дикхља јекхе удовица сар кхедела кашта. Тегани ов родинѓа латар хари пани. Кеда гели те анел леске, ов викинѓа пали лате хем вакерѓа лаке: „Молинава тут ане манге хари маро да“. Ама, ој вакерѓа леске: „Нане ман маро те дав тут. Иси ман само хари варо хем зејтини кобор те керав хари хајбаске ме чхавеске хем манге“. О Илија вакерѓа лаке: „О Јехова ветинѓа кај ако денѓан ман хари маро, тегани о варо хем о зејтини со иси тут, никогаш нане те трошинен пе са џикоте палем на дела бршим“.

Тегани и удовица гели кхере хем керѓа маро башо е Јеховаскоро пророко. Сар со ветинѓа о Јехова аѓаар уло, и удовица хем о чхаво лакоро сине лен со те хан са џикоте на почминѓа палем те дел бршим. Башо са адава време о ќупија е вареа хем е зејтинеа, сине пхерде.

Јекх диве, уло нешто бут лошно. О чхаво е удовицакоро бут насвалило хем муло. И удовица почминѓа те молинел е Илија те поможинел лаке. О Илија леља ле таро лакере васта хем ингарѓа ле ки упруни соба ко кхер. Мукхља ле ко кревети хем почминѓа те молинел пе: „Јехова молинава тут, иран палем о живото акале чхавескоро“. Адава со родинѓа о Илија сине бут чудно, соске џи тегани никој на иранѓа пе таро муле? На само адава, акаја удовица хем лакоро чхаво на сине Израелција.

Ама, о Јехова иранѓа ко живото акале чхаве! О Илија вакерѓа е удовицаке: „Дикх! То чхаво тано палем џивдо“. Ој сине бут радосно хем вакерѓа е Илијаске: „Акана џанава кај ту сиан Девлескоро мануш. Адава џанава соске вакереа само адава со пхенела туке о Јехова те вакере“.

Тари е Ахавескири палата ко Језраел дикхјола сине е Навутејескири нива дракхенцар. О Ахав мангља адаја нива хем адалеске мангља те кинел ла лестар. Ама, о Навутеј на мангља те бикинел и нива соске адава сине против е Јеховаскоро Закони те бикинел пе и пхув со добинѓа ла ко наследство. Дали о Ахав поштујнѓа е Навутејескири исправно одлука? На. О Ахав сине бут хољамо. Сине добором хољамо со на икљола сине тари соба, хем на хала сине маро.

Е Ахавескири ромни, и лошно царица и Језавела, вакерѓа леске: „Ту сиан цари ко Израел. Шај те овел тут са со мангеа. Ме ка керав те добине адаја нива“. Ој пишинѓа писмо е дизјакере старешиненге, те вакерен кај о Навутеј керѓа лафи против о Девел хем адалеске те мударен ле баренцар. О старешине керѓе адава со вакерѓа ленге и Језавела, хем ој вакерѓа е Ахавеске: „О Навутеј муло. И нива тани тли“.

И Језавела на мударѓа само е Навутеје, ој мударѓа јавере да манушен со мангена сине е Јехова. Ој служинела сине ховавне девленге хем керела сине јавера да лошна буќа. О Јехова дикхља са о лошна буќа со керела сине и Језавела. Дали ов нешто керѓа башо адава?

Пало мерибе е Ахавескоро, лескоро чхаво о Јорам уло цари. О Јехова бичхалѓа јекхе мануше со викинела пе сине Јуј, те казнинел е Језавела хем лакере фамилија.

О Јуј уклило ки пли кочија, хем гело ко Језраел, коте со живинела сине и Језавела. О Јорам гело пе кочијаја те икљол англо Јуј хем пучља ле: „Иси ли мир машкар аменде?“ О Јуј вакерѓа: „Нашти те овел мир са џикоте ти дај, и Језавела, керела лошна буќа“. Тегани о Јорам мангља те иранел пли кочија хем те нашел. Ама, о Јуј погодинѓа ле е стрелаја хем ов муло.

Пало адава, о Јуј гело ки е Језавелакири палата. Кеда шунѓа кој авела, и Језавела шминкинѓа пе, керѓа песке фризура хем аџикерела ле сине ки пенџерка. Кеда ресља о Јуј, ој почминѓа те вакерел леске груба лафија. Тегани, о Јуј викиндор вакерѓа лакере слугенге кола со сине узи лате: „Фрден ла теле!“ Ола фрдинѓе ла тари пенџерка хем ој мули.

Пало акава, о Јуј мударѓа е Ахавескере 70 чхавен хем уништинѓа са о буќа со сине поврзиме те обожавинел пе о Ваал. Дали акава уверинела тут кај о Јехова дикхела са хем кај ко право време ка казнинел адален со керена лошна буќа?