Дали о Девел користинѓа и еволуција те шај те створинел о различна животна обликија?

Со вакерела и Библија:

На. И Библија јасно вакерела кај о Девел створинѓа е манушен, хем са о различна „врсте“ растенија хем животне (1. Мојсеева 1:12, 21, 25, 27; Откровение 4:11).a Ој вакерела кај са о мануша авена таро Адам хем тари Ева, амаре прва родителија (1. Мојсеева 3:20; 4:1). Иси јекх теорија пенџарди сар „теистичко еволуција“, која со вакерела кај о Девел преку и еволуција створинѓа о различна животна врсте. Ама, и Библија на поддржинела акаја теорија. Сепак, и Библија на противинела пе е научно доказенцар кај иси варијацие ки секоја животно врста.b

• Дали о Девел користинѓа еволуција кеда створинѓа?

• Дали о извештаија тари Библијаја шај те објаснинен пе еволуцијаја?

• Дали адава со о растенија хем о животне тане способна те прилагодинен пе тано доказ кај еволуиринѓе ки јавер врста?

Дали о Девел користинѓа еволуција кеда створинѓа?

Ко израз „теистичко еволуција“ тане вклучиме повише теорие башо адава сар сине створимо о свето. Спрема јекх енциклопедија, јекх таро теорие вакерела кај о Девел користинѓа и природно селекција сар јекх начин џикоте створинѓа (Encyclopædia Britannica).

Јавера теорие сој вклучиме ки теистичко еволуција тане:

• Са о џивде организмија авена таро јекх животно облик кова со живинела сине бут одамна.

• Јекх животно облик шај те еволуиринел ко целосно јавер животно облик, хем акава тано пенџардо сар микроеволуција.

• Ко несаво начин о Девел поттикнинѓа акала процесија.

Дали о извештаија тари Библија шај те објаснинен пе еволуцијаја?

О сикљојбе баши теистичко еволуција сикавела кај о библиско извештај башо створибе нане целосно точно. Ама, о Исус керѓа лафи башо настанија тари 1. Мојсеева сар историска доказија (1. Мојсеева 1:26, 27; 2:18-24; Матеј 19:4-6). Ки Библија пишинела кај англедер те авел ки Пхув, о Исус живинела сине ко небо хем заедно е Девлеа створинѓа са со постојнела (Јован 1:3). Спрема адава, и теорија кај о Девел користинѓа еволуција те створинел са о животна обликија нане библиско сикљојбе.

Дали адава со о растенија хем о животне тане способна те прилагодинен пе тано доказ кај еволуиринѓе ки јавер врста?

И Библија на керела лафи башо адава кобор варијацие шај те икљон тари јекх врста. Исто аѓаар, на противинела пе кај иси шансе ки јекх врста животне или растенија те појавинен пе варијацие те шај те прилагодинен пе ко неве околностија. Иако несаве вакерена кај асавко прилагодибе тано доказ баши еволуција, нашти те вакерел пе кај ко асавко начин уле неве врсте.