„Акана мангава и служба!“

НАШАВЃУМ МЛО БАХТАЛИПЕ

Жално тано адава со кеда сине ман 13 берш, мло паше однос е Јеховаја почминѓа те слабонел. Изглединела сине сар те пхене мле соученикон сине лен бари слобода, а ме да мангљум те овел ман асавки слобода. Мислинава сине кај мле родителенгере правилија хем о христијанска мерилија ограничинена ман сине. А исто аѓаар, о духовна активностија изглединена манге сине бут пхаре те керен пе. Иако секогаш верујнава сине кај о Јехова постојнела, сепак на осетинава ман сине добором паше леа.

На чхинавѓум скроз те проповединав, ама адава керава ле сине со шај похари. Кеда проповединава сине, никогаш на спреминава ман сине хем адалеске мучинава ман сине те почминав или те продолжинав о разговор. Адалеске мли служба на сине делотворно хем на осетинава ман сине бахтали, а адава керѓа панда повише те на уживинав ки служба. Пучава ман сине: „Сар шај некој те проповединел секова курко, секова масек?“

Кеда сине ман 17 берш, мангљум те овав независно. Адалеске пакујнѓум мле буќа, гељум манге кхералдан хем селинѓум ман ки Австралија. Мле родителенге сине бут пхаро кеда гељум манге. Ола сине секириме, ама мислинѓе кај понадари да ка служинав е Јеховаске.

Ки Австралија чак панда похари служинава сине е Јеховаске. На џава сине редовно ко состанокија. Дружинава ман сине терненцар кола со сар манде мангена сине те џан ко состанокија, а пало адава те џан те пиен хем те кхелен ко дискотеке. Кеда размислинава башо мло живото ко адава време, хаљовава кај јекхе преа сиум сине ко чачипе, а јекхе преа сиум сине ко свето, ама нигде на осетинѓум ман шукар.

ЈЕКХ ВАЖНО ПОУКА СО НА ОЧЕКУЈНЃУМ

Дуј берш покасно запознајнѓум јекхе пхења, која бизо те џанел поттикнинѓа ман те размислинав со керава мле животоја. Панџ пхења живинаја сине ко јекх кхер, хем канинѓем е покраинско надгледнико хем лескере ромња, е Тамара, те овен аменцар ко кхер јекх курко. Џикоте е Тамаракоро ром завршинела сине несаве буќа ко собрание амен дружинаја амен сине лаја хем асаја сине заедно. Адава свиџинѓа пе манге. Ој на сине комплицирано хем шај сине локхесте те керел пе лаја лафи. Воодушевими сиум сине кеда дикхљум кај јекх духовно личност шај те овел добором забавно.

И Тамара сине бут ревно. Лакоро мангипе баши служба хем башо чачипе сине заразно. Ој сине бахтали соске дела сине е Јеховаске пло најшукар, а ме на сиум сине бахтали соске на дава сине мло најшукар е Јеховаске. Адава со сине ла позитивно стави хем со сине чаче бахтали бут влијајнѓа ко мло живото. Лакоро пример поттикнинѓа ман те размислинав башо јекх важно чачипе: О Јехова мангела сарине амен те служина леске „бахталипаја“ хем „бахтале гласоја“ (Пс. 100:2).

ПОЧМИНЃУМ ПАЛЕМ ТЕ МАНГАВ И СЛУЖБА

Мангљум те овав бахтали сар со сине и Тамара, ама те шај те овав аѓаар бахтали, ваљани сине те керав баре промене. Ваљанѓа манге време, ама почминѓум те керав тикне промене. Почминѓум те спреминав ман баши служба хем понекогаш служинава сине сар помошно пионери. Адава поможинѓа манге те овел ман похари трема хем те осетинав ман посигурно. Кобор повише користинава сине и Библија ки служба, добором повише уживинава сине ки лате. Пало кратко време сиум сине помошно пионери секова масек.

Почминѓум те дружинав ман пхраленцар хем пхењенцар тари различно возраст кола со дена сине е Јеховаске пло најшукар хем кола со уживинена сине те служинен леске. Ленгоро шукар пример поможинѓа манге те размислинав башо адава сој тано најважно ко мло живото хем те почминав те читинав и Библија секова диве. Са повише уживинава сине ки служба хем пало несаво време почминѓум те служинав сар општо пионери. Прво пути пало добором берша осетинава ман сине бахтали хем шукар сине манге ко собрание.

АРАКХЉУМ МАНГЕ ПОСТОЈАНО ПАРТНЕРИ

Јекх берш покасно запознајнѓум е Алексе, јекх љубезно, искрено пхрал кова со мангела е Јехова хем и служба. Служинела сине сар слуга-помошнико хем сине више пионери шов берш. О Алекс несаво време служинела сине ко Малави, соске адари сине побари потреба. Адари, ов дружинела пе сине е мисионеренцар кола со денѓе ле шукар пример хем кола со охрабринѓе ле понадари да те чхивел о Царство ко прво тхан ко пло живото.

Ко 2003 берш, о Алекс хем ме венчинѓем амен, хем оттегани заедно сием ки полновремено служба. Сиклилем бут шуже поуке хем о Јехова денѓа аменге берекети ко бут начинија.

ПАНДА ПОВИШЕ БЕРЕКЕТИЈА

Ко 2009 берш, сием сине каниме те служина сар мисионерија ко Источно Тимор, јекх тикни држава со припадинела ки индонезиско група таро островија. Сием сине бут изненадиме, воодушевиме хем дараја сине. Панџ масек покасно реслем ки главно диз Дили.

О живото адари сине бут појавер. Ваљанѓем те прилагодина амен ки неви култура, чхиб, хајбе хем условија живибаске. Ки служба често дикхаја сине манушен со сине бут чороле, со сине хари школујме хем со сине мучиме. Исто аѓаар, дикхлем буте џенен со сине лен физичка хем емоционална проблемија тари војна хем таро насилство.a

И служба адари сине бут шукар! На пример, јекх пути аракхљум е Маријаb‚ јекх тажно чхај со сине ла 13 берш. Англедер некобор берша мули лакири дај хем ретко дикхела сине пле даде. Сар бут чхаве ко лакере берша, е Марија да на сине ла цел ко пло живото. Сетинава ман ки јекх прилика кеда бут рунѓа џикоте вакерела сине сар осетинела пе. Ама, на хаљовава ла сине со вакерела, соске панда на керава сине шукар лафи ки лакири чхиб. Молинѓум ман е Јеховаске хем родинѓум лестар те поможинел ман те охрабринав ла а пало адава читинѓум лаке утешна стихија. Ко следна некобор берша дикхљум сар о чачипе менинѓа е Маријакоро стави, о изглед хем о живото. Ој крстинѓа пе хем акана водинела библиска курсија. Авдиве е Марија иси ла бари духовно фамилија хем осетинела пе мангли.

О Јехова дела берекети ко проповедибе ко Источно Тимор. Иако повише објавителија тане крстиме ко последна 10 берш, бут лендар служинена сар пионерија, слуга-помошникија или старешине. Јавера керена бути ки канцеларија преведибаске хем поможинена те превединен пе библиска публикацие ко локална чхибја. Бут сиум бахтали кеда шунава лен сар гиљавена ко состанокија, кеда дикхава сар асана хем сар духовно напредујнена.

НАШТИ ТЕ ЗАМИСЛИНАВ МАНГЕ ПОБАХТАЛО ЖИВОТО

О живото ко Источно Тимор сине бут различно таро живото ки Австралија, сепак нашти те замислинав манге побахтало живото. Понекогаш патујнаја сине ко јекх тикно автобуси пхердо манушенцар колен со сине пеа шуке мачхе хем гајбе зеленчукоја таро пазари. Несаве диве водинаја сине библиска курсија ко тикне кхера коте со сине бут тато хем мелало о поди хем коте со прастана сине кхања. Ама, иако сине амен асавке предизвикија често пути мислинава манге сине: „Акава тано бут шужо живото!“

Кеда размислинава ко берша со накхле, благодарно сиум мле родителенге со денѓе пестар са те сикавен ман башо е Јеховаскоро друмо хем со поддржинѓе ман, чак ко мле пхаре тинејџерска берша. Ко мло случај о лафија таро Изреки 22:6 исполнинѓе пе. Ми дај хем мо дад дичинена пе е Алексеа хем манцар. Ола тане бахтале кеда дикхена амен сар служинаја е Јеховаске. Таро 2016 берш, служинаја ки покраинско служба ко подрачје тари подружница Австралазија.

Пхаро манге те верујнав кај поангле на уживина сине ко проповедибе. Акана мангава и служба! Халиљум кај бизи разлика со случинела пе ко амаро живото ка ова чаче бахтале само ако служинаја е Јеховаске цело вилеа. О последна 18 берша со служинава е Јеховаске е Алексеа тане о најшуже берша ко мло живото. Акана хаљовава кобор тане чаче о лафија е Давидескере со вакерѓа лен е Јеховаске: „Ка овен бахтале са окола каске ту сиан тхан гарајбаске ола секогаш ка викинен бахтале... Хем окола со мангена тло анав ка овен бахтале баши туте“ (Пс. 5:11).