Пучиба таро читателија

Со мислинѓа о апостол Павле кеда вакерѓа: „Преку о закони, муло сиум е законеске“? (Гал. 2:19)

О Павле пишинѓа: „Преку о закони, муло сиум е законеске, те шај те живинав е Девлеске“ (Гал. 2:19).

О лафија со пишинѓа о Павле сине поврзиме е главно мислаја со мангља те вакерел е пхраленге тари Галатија. Несаве пхраља таро адава тхан мукхле упри ленде те влијајнен о ховавне учителија. Ола сикавена сине е јаверен кај те шај те овен спасиме, мора те икерен е Мојсеескоро закони, посебно о закони башо обрежување. Ама о Павле џанела сине кај о Девел на родела сине више таро христијања те овен обрежиме. Ов ко јекх логично хем уверливо начин сикавѓа кај акала сикајба тане ховавне хем бајрарѓа е пхраленгири вера ки е Исусескири откупно жртва (Гал. 2:4; 5:2).

И Библија јасно вакерела кај кеда некој мерела, нане свесно башо ништо, или ништо нашти те влијајнел упри лесте (Проп. 9:5). Кеда о Павле вакерѓа: „Муло сиум е законеске“, ов уствари мангља те вакерел кај е Мојсеескоро закони на сине ле више нисаво влијание упро лескоро живото. Наместо адава, о Павле сине уверимо кај преку пли вера ки откупно жртва, ов живинела сине е Девлеске.

Акаја промена ко е Павлескоро живото али „преку о закони“. Сар? Ов само со објаснинѓа кај, „е манушеске на вакерела пе кај тано праведно адалеске со икерела пе ко закони, него баши вера со иси ле ко Исус Христос“ (Гал. 2:16). Сепак, о Закони сине бут корисно. О Павле објаснинѓа е Галатјаненге: „Ов сине додајмо те шај те дикхјон о грешке, џикоте на авела о потомство каске со сине дендо о ветување“ (Гал. 3:19). О Закони јасно сикавѓа кај о несовршена мануша, нашти совршено те икерен пе ко Закони хем кај ваљани ленге јекх совршено жртва. О Закони поможинѓа е манушенге те хаљовен кај о Исус тано „о потомство“. Хем са окола со ка сикавен вера ко Исус Христос, ка шај те овен праведна англо Девел (Гал. 3:24). Значи, о Павле сине праведно соске о Закони поможинѓа ле те прифатинел е Исусе хем те сикавел вера ки лесте. Адалеске, откеда прифатинѓа е Исусе, о Павле шај сине те вакерел кај тано муло е Законеске хем кај почминѓа те живинел е Девлеске. О Закони нашти сине више те влијајнел упри лесте, него о Девел.

О Павле вакерѓа јекх слично бути ко пло писмо е Римјаненге. „Пхраљален, тумен да преку е Христосескоро тело муле сиен е Законеске... А акана сием ослободиме таро Закони, соске муле сием околеске со икерела амен сине пханле“ (Рим. 7:4, 6). Таро акала стихија хем таро Галатите 2:19, хаљоваја кај о Павле на керела сине лафи баши песте сар грешнико кова со спрема о Закони мора сине те мерел. Него ов мангља те истакнинел кај тано ослободимо. О Закони на сине ле више нисаво влијание упри лесте хем упро јавера христијања. Ола сине ослободиме преку и вера ки е Христосескири откупнина.