„Нане те откажинав ман тари мли беспрекорност!“

Замислин туке сар јекх мануш бешела теле ки пхув коркори, тељарде шереа, кхедиме пиќенцар хем таро шеро џи ко пре пхердо раненцар кола со бут дукхана. Нане ле сила чак ни те бркинел е макхјен кола со кхедена пе околу лесте. Бешела ко право те шај те сикавел кај осетинела бари жал хем дукх, хем нашти те керел ништо освен те харовел пе јекхе котореа таро пхувјало чаро. Акава мануш кова со некогаш сине угледно хем барвало, акана о јавера дикхена лошно ки лесте. Сарине иранѓе леске думо — о амала, о комшие хем и фамилија. О мануша, па чак о чхаве асана сине леске. Ов мислинѓа кај лескоро Девел да, о Јехова, тано против лесте. Ама, адава на сине аѓаар (Јов 2:8; 19:18, 22).

Акава мануш викинела пе Јов. О Девел вакерѓа кај „сар лесте нане јавер ки пхув“ (Јов 1:8). Чак веконцар пало лескоро мерибе, о Јехова на менинѓа пло мислење баши лесте. Панда дикхела ле сине сар јекх таро најправедна мануша кола со живинѓе ки Пхув (Езекиел 14:14, 20).

Дали туте да иси ту пхарипа хем неволје? Ако оја, е Јовескоро пример шај те дел тут бари утеха. Исто аѓаар, ка поможинел туке панда пошукар те хаљове јекх особина која со ваљани те овел ле секова верно слуга е Девлескоро. Адаја тани и беспрекорност. О мануша сикавена акаја особина кеда ачховена верна хем послушна е Девлеске, хем продолжинена те керен лескири волја иако иси лен пхарипа. Те дикха со шај те сикљова таро Јов.

Со на џанља о Јов

О Мојсеј, е Девлескоро верно слуга, пишинѓа о извештај башо Јов најверојатно несаво време пало лескоро мерибе. Водимо таро е Девлескоро свети дух, о Мојсеј опишинѓа о настанија ки Пхув кола со влијајнѓе упро Јов, ама исто аѓаар, откринѓа несаве настанија кола со случинѓе пе ко небо.

Ко почеток таро извештај читинаја кај е Јове сине ле бахтало хем исполнимо живото. Сине ле баро барвалипе хем сине поштујмо таро мануша кола со живинена сине ко Уз, кова со веројатно аракхљовела сине ко северно дело таро Арапско Полуостров. О Јов таро вило поможинела сине е чороленге хем околенге каске со ваљани сине помош. Ов хем лескири ромни сине лен деш чхаве. Сој најважно, о Јов сине духовно мануш. Исто сар о Авраам, о Исак, о Јаков хем о Јосиф, кола со сине леске дур фамилија, о Јов дела сине са пестар те шај те угодинел е Јеховаске. Сар фамилијарно поглавари, е Јове сине ле улога сар свештенико хем редовно дела сине жртве башо пле чхаве (Јов 1:1-5; 31:16-22).

Таро јекх пути о писатели е лилескоро Јов, менинела о фокус е раскажибаскоро, хем опишинела со случинѓа пе ко небо — нешто со о Јов нашти сине те џанел. Машкар о верна ангелија со сине кхедиме англо Девел ало о бунтовно ангели да о Сатана. О Јехова џанља кај ов мрзинела е праведно Јове, хем адалеске користинѓа ле сар шукар пример башо адава со значинела те овел пе беспрекорно. О Сатана бизи лаџ одговоринѓа: „Зарем о Јов џабе дарала таро Девел? На чхивѓан ли ту ограда со заштитинела ле, лескоро кхер хем са со иси ле?“ О Сатана хор таро вило мрзинела е манушен сој тане верна е Јеховаске. Кеда служинена цело вилеа е Јеховаске, ола сикавена кај о Сатана тано предавнико кова со на мангела никас. О Бенг кривинѓа е Јове кај служинела е Девлеске таро себична причине. Ов сине сигурно кај, ако о Јов нашавела са со иси ле, ка вакерел лошна буќа башо Девел (Јов 1:6-11).

О Јов на џанља кај о Јехова, уствари денѓа ле бари чест — те докажинел кај о Сатана тано ховавно. О Девел дозволинѓа е Сатанаске те лел таро Јов са со сине ле. Ама, на смејнела сине те ваздел пло вас упри лесте. О Сатана едвај аџикерѓа те керел пло злобно плани. Само јекхе дивеске, ов анѓа некобор пхаре неволје е Јовеске. О Јов дознајнѓа кај нашавѓа цело стока — најпрво е гурувен хем е херен, а пало адава е бакхрен хем е камилен. Сој панда полошно, о слуге со аракхена лен, сине мударде. Јекх гласнико вакерѓа е Јовеске кај „јаг таро Девел“, веројатно громи, мударѓа лескере слуген хем бакхрен. Панда англедер те овел ле време те размислинел баши акаја бари неволја, о Јов доживинѓа и најпхари неволја. Џикоте лескере чхаве сине кхедиме ко најпхуредер пхрал, таро јекх пути али бари бавлал која со рушинѓа о кхер хем сарине муле (Јов 1:12-19).

Нашти ни те замислина аменге сар осетинела пе сине о Јов. Ов пхаравѓа пле шеја, чхинѓа пле бала хем пело ки пхув. О Јов вакерѓа: „О Јехова денѓа, о Јехова леља“. Уствари, о Сатана лукаво керѓа те дикхјол кај о Девел керѓа леске о неволје. Иако случинѓа пе леске са адава, о Јов на вакерѓа лошна лафија башо Девел, сар со мислинѓа о Сатана. Наместо адава, акава верно мануш вакерѓа: „Те овел понадари да фалимо е Јеховаскоро анав!“ (Јов 1:20-22).

О Сатана сине уверимо кај о Јов ка вакерел лошна буќа башо Девел

О Сатана сине бут хољамо хем на мангља те откажинел пе. Кеда о ангелија кхединѓе пе англо Девел, ов палем ало. О Јехова сине воодушевимо џикоте керела сине лафи башо Јов кова со ачхило верно хем беспрекорно иако о Сатана нападинѓа ле ко бут начинија. Тегани, о Бенг вакерѓа: „Кожа баши кожа! О мануш ка дел са со иси ле башо пло живото. Него, молинава тут, пружин тло вас хем кхув ле ко лескере кокала хем мас, хем сигурно ка вакерел лошна буќа баши туте!“ О Сатана сине уверимо кај о Јов ка вакерел лошна буќа башо Јехова ако насваљовела таро пхаро насвалипе. Адалеске со сине ле целосно доверба ко Јов, о Јехова дозволинѓа е Сатанаске те насвакерел ле, ама на дозволинѓа леске те мударел ле (Јов 2:1-6).

Аѓаар о Јов аракхлило ки ситуација која со сине опишими ко почеток. Замислин туке кобор сине пхаро лескере ромњаке. Панда на накхља лакири дукх башо адава со муле лакере деш чхаве, а више дикхела сине пле роме сар боринела пе баре мукенцар. Пхаѓи тари дукх вакерѓа е Јовеске: „Зарем панда сиан беспрекорно? Де арман е Девле хем мер!“ Акала лафија ни хари на личинена сине ки ромни кола со о Јов пенџарела ла хем мангела ла. Единствено нешто со шај сине те вакерел лаке тано кај лакере лафија нане разумна. Сепак, ов на мангља те вакерел лошна буќа пле Девлеске (Јов 2:7-10).

Дали џанљан кај акаја тажно, чачутни приказна тани поврзими туја да? Приметин кај о Сатана на кривинѓа само е Јове, него са е манушен. Ов вакерѓа: „О мануш ка дел са со иси ле башо пло живото.“ Јавере лафенцар, о Сатана тано уверимо кај нијекх мануш нане те ачховел беспрекорно. Ов вакерела кај туте да нане тут чачутно мангипе спрема о Девел хем кај сигате ка циде тут лестар те шај те спасине тло живото. Уствари, о Сатана вакерела кај сиан себично исто сар лесте! Дали мангеа те докажине кај тано ховавно? Секоле јекхе амендар иси ле адаја чест! (Изреки 27:11). Те дикха солеа соочинѓа пе о Јов понадари.

Ховавне утешителија

Трин мурша кола со пенџарена сине е Јове — коленге со о извештај вакерела кај тане лескере „амала“ — шунѓе башо е Јовескере неволје хем патујнѓе џи ки лесте те шај те утешинен ле. Кеда дикхле ле дурал, нашти сине те пенџарен ле. Сине ле баре дукха хем лескири кожа калили таро чирија, ни хари на личинела сине сар англедер. Акала трин мурша, о Елифаз, о Вилдад хем о Софар, постапинѓе сар те пхене сине ленге бут жал башо е Јовескере неволје. Ола рунѓе цело гласоја хем чхивѓе песке право упро шеро. Пало адава, бешле теле ки пхув узо Јов хем на вакерѓе ништо. Цело курко сине узи лесте, диве хем рат, бизо те вакерен нијекх лафи. На ваљани те мислина кај адава со на керѓе лафи значинела кај сине сочувствителна. Лен ни најхари на интересинѓа лен о Јов, адалеске на пучле ле нијекх пучибе. Дикхена сине само адава со дикхјола — лескири бари дукх (Јов 2:11-13; 30:30).

Ко крајо, о Јов мора сине те почминел те керел лафи. О Јов сикавѓа кобор баре мукхе сине ле кеда денѓа арман о диве кеда бијандило. А пало адава вакерѓа јекх таро главна причине соске осетинела пе аѓаар. О Јов мислинѓа кај о Девел тано адава со керела леске акала неволје (Јов 3:1, 2, 23). Иако ов сине мануш коле со сине ле бари вера, сине ле бари потреба некој те утешинел ле. Ама, пало кратко време откеда лескере „амала“ почминѓе те керен лафи, о Јов халило кај пошукар сине кеда на вакерѓе ништо (Јов 13:5).

О Елифаз, кова со веројатно сине о најпхуро лендар хем сине бут попхуро таро Јов, почминѓа прво те керел лафи. А пало адава, керѓе лафи хем о јавера дуј. Шај те вакерел пе кај ола бизо те размислинен керѓе лафи исто сар о Елифаз. Повторинена сине буќа кола со о мануша често вакерена сине башо Девел хем кола ко почеток дикхјона кај тане точна, на пример, кај ов тано најбаро, хем кај казнинела е лошна манушен а наградинела е шукар манушен. Ама, панда таро почеток дикхјола пе сине кај ни хари на хаљовена е Јове. Адава со вакерѓа о Елифаз изглединела сине сар логично, ама ов на леља ко предвид несаве важна чачипа. Иако вакерѓа нешто сој тано точно, кај о Јехова тано шукар хем казнинела околен сој лошна, ко крајо ало ко погрешно заклучок — ако о Јов тано казнимо, тегани сигурно грешинѓа е Девлеске (Јов 4:1, 7, 8; 5:3-6).

На изненадинела амен адава со о Јов на сложинѓа пе адалеа со вакерѓе. Ов одлучно бранинѓа пе (Јов 6:25). Ама, адава керѓа панда повише лескере трин ховавне утешителија те мислинен кај о Јов керѓа несаво пхаро грево хем кај адалеске заслужинѓа са о лошнипе со доживинела. О Елифаз кривинѓа ле кај тано гордо, лошно хем кај нане ле нисаво поштовање спрема о Девел (Јов 15:4, 7-9, 20-24; 22:6-11). О Софар вакерѓа леске те чхинавел те керел лошнипе хем те на грешинел (Јов 11:2, 3, 14; 20:5, 12, 13). А о Вилдад посебно дукхавѓа е Јове кеда вакерѓа кај лескере чхаве сигурно керѓе несаво грево хем адалеске заслужинѓе те мерен! (Јов 8:4, 13).

Лескири беспрекорност чхивди ко испит!

Акала трин мануша керѓе нешто сој панда полошно. Освен со анѓе ко пучибе е Јовескири беспрекорност, ола вакерена сине кај ни хари на врединела некој те трудинел пе те овел верно само е Девлеске. Панда таро почеток о Елифаз опишинѓа јекх страшно ситуација, кај керѓа леа лафи јекх духо. Тари адаја ситуација е демонеа, о Елифаз ало џи ко јекх опасно заклучок кај, о Девел „на верујнела пле слугенге хем кривинела пле ангелен кај керена грево“. Спрема акала лафија, о мануша нашти никогаш те угодинен е Девлеске. Пало адава, о Вилдад вакерѓа кај е Девлеске нане важно е Јовескири верност, кова со англо лескере јакхја сине сар јекх обично кирмо (Јов 4:12-18, фуснота; 15:15; 22:2, 3; 25:4-6).

Дали некогаш пробинѓан те утешине некас со накхела таро пхаро периоди ко живото? Адава нане ни хари локхо. Ама, шај бут те сикљова таро ховавне утешителија е Јовескере — главно башо адава со на ваљани те вакера. Ола вакерѓе бут лафија кола со ко почеток дикхјона сине кај тане хор хем точна, ама уствари сине чуче хем на сине точна. Освен адава, ни јекх пути на викинѓе ле ко анав. Ола на размислинѓе баши е Јовескири дукх која со пхиравела ла сине ко вило хем на мислинѓе кај ваљани те сикавен леске сочувство.a Ако некој тано обесхрабримо, трудин тут те ове љубезно, сочувствително хем сикав кај грижинеа тут леске. Поможин леске те керел позорали пли вера хем охрабрин ле, исто аѓаар поможин леске те овел ле доверба ко Јехова хем ко лескоро баро шукарипе, милост хем правда. О Јов баш аѓаар ка постапинел сине пле амаленцар те овен сине ко лескоро тхан (Јов 16:4, 5). А сар реагиринѓа ов џикоте ола упорно нападинена ле сине баши лескири беспрекорност?

О Јов ачхило беспрекорно

О Јов више сине бут разочаримо кеда почминѓа акава баро разговор. Панда ко почеток ов признајнѓа кај тано бут разочаримо хем кај понекогаш керела лафи бизо те размислинел (Јов 6:3, 26). Нане пхаро те хаљова соске. Лескере лафија сикавена сине кобор бари дукх сине ле ко вило. Таро лескере лафија дикхјола пе кај на сине ле целосно слика башо адава со случинела пе. О Јов хем лескири фамилија таро јекх пути доживинѓе бут неволје, кола со дикхјона сине сар те пхене тане таро натприродна силе. Адалеске, о Јов мислинѓа кај авена таро Јехова. На сине свесно башо несаве важна буќа со случинѓе пе, хем адалеске ало џи ко заклучок со темелинела пе сине ко лескере погрешна претпоставке.

Сепак, о Јов сине мануш коле со сине ле силно вера. Лескири вера дикхјола пе сине таро адава со вакерѓа ко разговор пле „амаленцар“. Лескере лафија сине шуже, чачутне хем зајакнинена амен да авдиве. Кеда керѓа лафи башо буќа сој керде ко чудесно начин, ов денѓа фалба е Јеховаске ко јекх посебно начин. Нашти сине те керел адава ако о Девел на откринела сине леске несаве деталија. На пример, о Јов вакерѓа кај о Јехова „икерела и Пхув те висинел ко ништо“, нешто со о научникија дознајнѓе бут векија покасноb (Јов 26:7). А кеда керѓа лафи баши иднина, сикавѓа кај иси ле и исто надеж сар е јавере верна слугенгири таро пурано време. О Јов верујнела сине кај ако мерела, ка фалинел е Девлеске хем кај ов нане те бистрел ле него јекх диве палем ка иранел ле ко живото (Јов 14:13-15; Евреите 11:17-19, 35).

А со шај те вакерел пе баши беспрекорност? О Елифаз хем лескере дуј амала понадари да инсистиринена сине кај е Девлеске нане важно дали некој тано беспрекорно. Дали о Јов верујнѓа ко акава злобно ховајбе? Ни најхари! Ов вакерела сине кај и беспрекорност тани важно е Девлеске. Е Јове сине ле доверба ко Јехова хем адалеске вакерѓа: „О Девел ка пенџарел мли беспрекорност“ (Јов 31:6). Освен адава, ов халило кај лескере ховавне амала вакерѓе ховавне буќа те шај те чхивен ко испит лескири беспрекорност. Адава поттикнинѓа ле те икерел пло најбаро говор колеа со пханља о муј акале трине муршенгоро.

О Јов халило кај и беспрекорност дикхјола пе таро адава сар некој керела лафи хем сар постапинела ко живото. Адалеске бранинѓа пе аѓаар со објаснинѓа ко кола начинија сикавѓа кај тано беспрекорно. На пример, пазинела пе сине таро идолопоклонство, поштујнела сине е јаверен хем сине ленцар љубезно, ачхило морално чисто, ценинела сине о брако хем, најважно таро са, сине верно само е јекхе чачутне Девлеске, е Јеховаске. Адалеске, о Јов шај сине таро вило те вакерел: „Са џикоте на мерава, нане те откажинав ман тари мли беспрекорност“ (Јов 27:5; 31:1, 2, 9-11, 16-18, 26-28).

Сикав сар е Јовескири вера

Дали туке да и беспрекорност тани добором важно сар со сине е Јовеске? О Јов џанела сине кај нане доволно о мануш само те вакерел кај тано беспрекорно — ваљани те сикавел адава пле постапкенцар. Сикаваја кај сием целосно верна е Девлеске аѓаар со сием леске послушна хем секогаш кераја адава сој исправно англо лескере јакхја, чак кеда боринаја амен пхаре проблеменцар да. Ако кераја аѓаар, сигурно ка кера бахтало е Јехова хем, исто сар о Јов, ка сикава кај лескоро душмани, о Сатана, нане ко право. Адава тано о најшукар начин те сикава кај иси амен сар е Јовескири вера.

Ама, акава нане крајо баши е Јовескири приказна. Ко јекх моменти, о Јов керѓа лафи бизо те размислинел. Ов добором бут мангела сине те сикавел кај тано праведно со бистерѓа те бранинел пле Девле. Ваљани леске сине некој те исправинел ле хем те поможинел ле те шај те дикхел ко буќа сар о Јехова. Ама, сар шај сине те утешинел пе акале мануше кова со доживинѓа бут пхарипа хем сине пхаго тари дукх хем туга? Со керѓа о Јехова башо пло верно хем беспрекорно слуга? О одговорија таро акала пучиба ка добина лен ки несави јавер статија тари акаја рубрика.