Соске е Исусеске вакерела пе кај тано е Девлескоро Чхаво?

Со вакерела и Библија:

И Библија бут пути е Исусеске вакерела кај тано „е Девлескоро Чхаво“ (Јован 1:49). О израз „е Девлескоро Чхаво“ сикавела кај о Девел створинѓа е Исусе. Уствари, таро Девел авела о живото, ов керѓа са сој тано џивдо (Псалм 36:9; Откровение 4:11). И Библија вакерела аменге кај о Девел тано Створители. Спрема адава, ле на ваљани те овел ле ромни те шај те овел ле чхаве.

Ки Библија пишинела кај о ангелија да тане о чхаве е чачутне Девлескере (Јов 1:6). Исто аѓаар, и Библија вакерела кај о прво мануш, о Адам, сине „е Девлескоро чхаво“ (Лука 3:38). Ама и Библија поможинела аменге те хаљова кај о Исус тано о најважно чхаво е Девлескоро. Соске? Адалеске со о Девел таро са о буќа прво керѓа лесте хем единствено само ов тано кердо директно таро Девел.

• Дали о Исус живинела сине ко небо англедер те бијанѓовел ки Пхув?

• Со керела сине о Исус англедер те авел ки Пхув?

Дали о Исус живинела сине ко небо англедер те бијанѓовел ки Пхув?

Оја. Англедер те бијанѓовел сар мануш ки Пхув, о Исус сине духовно личност упре ко небо. Ки јекх прилика, коркори ов вакерѓа кај хулило таро небо (Јован 6:38; 8:23).

О Девел керѓа е Исусе англедер те керел са о буќа. Башо Исус, и Библија вакерела:

• „Ов тано... о првобијамо таро са сој тано кердо“ (Колошаните 1:15).

• Ов тано „и прво бути со створинѓа о Девел“ (Откровение 3:14).

О Исус исполнинѓа о пророштвија башо окова „со авела таро бут пурано време, таро диве со накхле одамна“ (Михеј 5:2; Матеј 2:4-6).

Со керела сине о Исус англедер те авел ки Пхув?

Ле сине ле најбари положба ко небо. Адава дознајнаја ле тари јекх молитва со вакерѓа ла о Исус. Ов молинѓа пе: „Мо дад, прославин ман... е славаја со сине ман ла ки туте англедер те овел о свето“ (Јован 17:5).

Ов поможинѓа пе Дадеске те створинел са со постојнела. О Исус соработинела сине пе Дадеа, ов сине лескоро „вешто градители“ (Изреки 8:30). И Библија башо Исус вакерела: „Преку лесте тано кердо са сој ко небо хем ки пхув“ (Колошаните 1:16).

О Девел преку Исус керѓа са со постојнела. Ко адава тане вклучиме о ангелија, а исто аѓаар са о материјално свето (Откровение 5:11). Ки несави смисла, и соработка машкар о Девел хем о Исус сине соработка сар машкар о архитекти хем о мајстори. О архитекти керела о проекти сар ваљани те изглединел, а о мајстори градинела ле.

Ов сине о Лафи. Кеда и Библија керела лафи башо е Исусескоро живото англедер те живинел сар мануш, тегани вакерела кај ов сине „о Лафи“ (Јован 1:1). Најверојатно, о Девел користинѓа пе Чхаве те пренесинел информацие хем упатствија е јавере ангеленге.

Кеда о Девел мангела сине нешто те вакерел е манушенге, изгледа користинела сине е Исусе. Исто аѓаар, кеда о Девел дела сине упатствија е Адамеске хем е Еваке ки градина Еден, веројатно керела сине адава преку о Лафи, о Исус (1. Мојсеева 2:16, 17). Шај баш о Исус сине о ангели кова со водинѓа е Израелцон ки пустина хем каскоро гласо ваљани сине те шунен (2. Мојсеева 23:20-23).a