И порака тари Библија

Пало 4026 а.а.е.

„О сап“ керѓа о јавера те сумнинен пе дали е Девле иси ле право те владинел хем дали о начин сар владинела тано шукар. О Јехова ветинѓа кај ка авел „потомство“, или „потомцо“, кова со ка смачконел е сапескоро шеро, јавере лафенцар е Сатана (1. Мојсеева 3:1-5, 15, фуснота). Ама, о Јехова мукхља несаво време о мануша те владинен јекх јекхеа хем о Сатана те влијајнел упри ленде.

1943 а.а.е.

О Јехова вакерѓа е Авраамеске кај о ветимо потомцо ка авел тари лескири фамилијарно лоза (1. Мојсеева 22:18).

Пало 1070 а.а.е.

О Јехова ветинѓа е цареске е Давидеске, а пало несаво време лескере чхавеске да, е Соломонеске, кај о ветимо потомцо ка бијанѓовел ки ленгири фамилијарно лоза (2. Самоилова 7:12, 16; 1. Царевите 9:3-5; Исаија 9:6, 7).

29 а.е.

О Јехова откринѓа кај о Исус тано о ветимо потомцо кова со ка наслединел е Давидескоро престол (Галатјања 3:16; Лука 1:31-33; 3:21, 22).

33 а.е.

О Сатана чхивѓа е Девлескере душманен те мударен е Исусе хем адалеа исполнинѓа пе јекх дело таро пророштво кај о Сап ка кицинел е ветиме потомцо ки пета. О Јехова воскреснинѓа е Исусе сар духовно личност ко небо. О совршено живото со о Исус жртвујнѓа, о Јехова прифатинѓа ле сар откупно жртва. Адалеа шај е Адамескере потомцонге те простинен пе о гревија хем те живинен вечно (1. Мојсеева 3:15; Апостолија 2:32-36; 1. Коринќања 15:21, 22).

1914 а.е. или кратко пало адава

О Исус фрдинѓа е Сатана таро небо ки пхув; е Сатана ачхило ле „хари време“ (Откровение 12:7-9, 12).

Ки иднина

О Исус ка фрдел е Сатана ки бездна, коте со ка ачхол 1.000 берша, а пало адава ка уништинел ле или, ки симболично смисла, ка смачконел лескоро шеро. О Јехова ка исполнинел пли намера со сине ле ко почеток е пхувјаја хем е манушенцар, ка цидел и лаџ таро пло анав хем ка докажинел кај ов владинела ко исправно начин (Откровение 20:1-3, 10; 21:3, 4).