Кеда ка владинел е Девлескоро Царство „ка овел баро мир“

Панда хари е Девлескоро Царство, кова со аџикераја ле бут берша, и влада која со керѓа ла о Девел ка анел мир ки цели пхув хем о мануша ка живинен ко јекхипе хем слога. И Библија вакерела: „Ка овел баро мир“ (Псалм 72:7). Ама, кеда хем сар о Царство ка владинел упри цели пхув? Хем, со шај адава те значинел туке?

КЕДА КА АВЕЛ Е ДЕВЛЕСКОРО ЦАРСТВО?

И Библија пророкујнѓа кај ваљани те случинен пе несаве буќа, кола со ка овен знако кај панда хари ка авел е Девлескоро Царство. Ка овен војне ко разна тхана, бокхалипе, насвалипе, баре земјотресија хем бут мануша ко цело свето нане те икерен пе ко законија (Матеј 24:3, 7, 12; Лука 21:11; Откровение 6:2-8).

Јекх јавер пророштво вакерела: „Ко последна диве ка овел бут пхаро време. Соске о мануша ка манген коркори пес, ка манген о паре... нане те шунен пле родителен, нане те овен благодарна, нане те овен верна, нане те манген пле фамилија, нане те овен спремна башо било саво договор, клеветникија, нане те контролиринен пе, сурова, нане те манген о шукарипе... горда, ка манген о задоволствија, а на е Девле“ (2. Тимотеј 3:1-4). Точно тано кај секогаш сине несаве мануша со сине лен асавке особине. Ама, авдиве побаро дело таро мануша тане асавке.

Акала пророштвија почминѓе те исполнинен пе ко 1914 берш. Бут историчарија, државникија хем писателија пишинѓе кај о свето пало адава берш бут менинѓа пе. На пример, о данско историчари Петер Мунк пишинѓа: „И војна ко 1914 берш бут менинѓа и манушикани историја. Таро јекх време коте со џала сине са шукар... кхувѓем ко веко коте со иси катастрофе, лошнипа, омраза хем време коте со на сием безбедна“.

Ама, сар со пало бршим авела о кхам, аѓаар о лошна условија со иси авдиве ко свето сикавена кај панда хари ка авел нешто пошукар — е Девлескоро Царство ка владинел упри цели пхув. Уствари, о Исус спомнинѓа јекх позитивно бути која сој тани дело таро знако башо последна диве. Ов вакерѓа: „Акава шукар хабери башо Царство ка проповединел пе ко цело свето, те шај о мануша таро са о народија те шунен ле, хем тегани ка авел о крајо“ (Матеј 24:14).

Адава шукар хабери башо Царство тани и главно порака со проповединена е Јеховаскере сведокија. Уствари о анав да ленгере главно списаниескоро тано Стражарско кула објавинела е Јеховаскоро Царство. Ки лесте бут пути керела пе лафи башо бут шукар буќа со е Девлескоро Царство ка керел лен е манушенге хем е пхувјаке.

САР Е ДЕВЛЕСКОРО ЦАРСТВО КА ВЛАДИНЕЛ УПРИ ЦЕЛИ ПХУВ?

Ко одговор башо акава пучибе тане вклучиме акала штар важна буќа:

1. О Царство нане те користинел авдисутне политичка водачен џикоте владинела.

2. О политичка водачија нане те манген те откажинен пе тари пли власт хем ка манген те противинен пе башо е Девлескоро Царство, ама нане те успејнел ленге адава (Псалм 2:2-9).

3. Е Девлескоро Царство ка уништинел са о манушикане владе кола со ка манген понадари да те владинен упро мануша (Даниел 2:44; Откровение 19:17-21). Акаја последно војна, која со ка овел ко цело свето, викинела пе Армагедон (Откровение 16:14, 16).

4. Са адала со ка прифатинен е Девлескоро Царство ка овен спасиме ко Армагедон хем понадари да ка живинен ко јекх свето коте со ка овел мир. Ола ка овен дело таро „баро мноштво“ сој спомнимо ки Библија, колесте со веројатно ка овен милиоња мануша (Откровение 7:9, 10, 13, 14).

СО ШАЈ ТЕ ЗНАЧИНЕЛ Е ДЕВЛЕСКОРО ЦАРСТВО ТУКЕ?

Те шај те овел некој дело таро е Девлескоро Царство, прво ваљани те овел ле пенџарибе. Уствари, о Исус вакерѓа е Девлеске ки молитва: „Те шај [е манушен] те овел лен вечно живото ваљани шукар те пенџарен тут, е јекхе чачутне Девле, хем околе со бичхалѓан ле, о Исус Христос“ (Јован 17:3).

Ако шукар пенџареа е Девле е Јехова сар личност, адава ка користинел туке ко бут буќа. Те дикха дуј. Прво, ка овел тут зорали вера ки лесте. Асавки вера која со темелинела пе ко доказија, ка уверинел тут кај е Девлескоро Царство тани чачутни влада која со панда хари ка владинел ки пхув (Евреија 11:1). Дујто, тло мангипе спрема о Девел хем спрема о пашутне са повише ка бајрол. Тло мангипе спрема о Девел ка поттикнинел тут те ове леске послушно таро вило. А о мангипе спрема о пашутне ка мотивиринел амен те применина о пенџардо Златно правило кова со денѓа ле о Исус кеда вакерѓа: „Са со тумен мангена о мануша те керен туменге, аѓаар керен тумен да ленге“ (Лука 6:31).

Сар јекх дад со мангела пле чхавен, амаро Створители да мангела аменге о најшукар. Ов мангела те добина „о чачутно живото“ (1. Тимотеј 6:19). Авдиве нане амен „о чачутно живото“ башо кова со керела лафи и Библија. Повише мануша секова диве боринена пе те преживинен. Ама, саво ка овел „о чачутно живото“? Те дикха само несаве таро шуже буќа со е Девлескоро Царство ка керел лен е манушенге.