Ресља о Месија

ПОБУТЕР таро 500 берша пало е Даниелескоро пророштво, е Девлескоро мељаико о Џебраили ало ки јекх терни чхај и Мејрема (Марија), која со сине тари е Даутескири фамилија. Ов вакерѓа лаке: „Шукар диве, ту колаке со и сикавдо баро шукарипе, о Јехова тано туја“ (Лука 1:28). Ама, и Мејрема дарандили. Со значинена сине адала лафија?

О мељаико вакерѓа лаке: „Марија, ма дара, соске аракхљан милост англо Девел. Аке, ка ачхове кхамни хем ка бијане мурш чхаво. Ка чхиве леске о анав Исус... о Јехова о Девел ка дел ле о престол лескере дадескоро е Давидескоро... хем лескере царствоске нане те авел крајо“ (Лука 1:30-33). Саво шужо хабери! И Мејрема ка бијанел е Месија, о „потомство“ со бут берша аџикерена ле сине!

Пало несаво време, о Иса бијандило ко Витлеем. Адаја рат, јекх мељаико вакерѓа е пастиренге: „Аке, анава туменге шукар хабери со анела бари бах... соске авдиве ки е Давидескири диз бијандило туменге Спасители — о Христос, о Господари“ (Лука 2:10, 11). Пало адава, е Исаскири фамилија гели ко Назарет коте со ов барило.

Ко 29 берш амари ера — о берш кеда ваљанѓа те појавинел пе о Месија — о Иса почминѓа те служинел сар е Девлескоро пекамбери, тегани сине ле „паше тријанда берш“ (Лука 3:23). Бут мануша халиле кај ов сине бичхалдо таро Девел. Ола вакерѓе: „Баро пророко иклило машкар аменде“ (Лука 7:16, 17). Ама башо со сикавела сине о Иса е манушен?

О Иса сикавела сине е манушен те манген е Девле хем те служинен леске. Ов вакерѓа: „О Јехова, амаро Девел, тано јекх Јехова, хем манг е Јехова, те Девле, са те вилеа, са те душаја, са те гоѓаја, хем са те силаја“ (Марко 12:29, 30). Ов исто аѓаар вакерѓа: „Е Јехова, те Девле, обожавин ле хем служин само леске“ (Лука 4:8).

О Иса охрабринѓа е манушен те манген пе јекх јекхеа. Ов вакерѓа: „Манг те пашутне сар коркори тут“ (Марко 12:31). Ов исто аѓаар вакерѓа: „Са со тумен мангена о мануша те керен туменге, керен тумен да ленге. Адава вакерена о Закон хем о Пророкија“ (Матеј 7:12).

О Иса денѓа пестар са те вакерел е јаверенге башо е Девлескоро Царство. Ов вакерѓа: „Ме ваљани те вакерав о шукар хабери башо е Девлескоро Царство, соске адалеске сиум бичхалдо“ (Лука 4:43). Соске е Девлескоро Царство тано добором важно?

Е Девлескоро Лафи вакерела кај адава Царство тано влада ко небо со ка владинел упри Пхув. Ко адава Царство о Девел чхивѓа е Иса о Месија, те овел Цари. О пекамбери о Даниел пишинѓа кај ко небо о Девел ка дел е Месијаске „власт, чест хем царство“ (Даниел 7:14). Е Девлескоро Царство ка керел цели Пхув те овел џенети хем ка наградинел е Девлескере слуген вечно џивдипаја. Нане ли акава најшужо хабери?