Бут мануша чхинавге те џан ко цркве или џамие соске адари на аракхле утеха хем духовно водство. Тегани, соске ваљани те аве ко состанокија со е Јеховаскере сведокија икерена? Сар ола ка користинен туке?

Ка аракхе радост со ка ове машкар о шукар мануша со грижинена пе јаверенге. Ко прво веко, о христијанија кхедена пе сине ко собранија, икерена сине состанокија ко кола со славинена сине е Девле, проучинена и Библија хем охрабринена пе сине машкар песте (Евреите 10:24, 25). Машкар ленде сине мангипе, сине бут паше амала — сар духовна пхраља хем пхења (2. Солуњаните 1:3; 3. Јованово 14). Амен џаја пало ленгоро пример хем сием радосна сар ленде.

Ка сикљове сар те икере о библиска начела. Исто сар со сине ко пурано време, авдиве да мурша, џувља хем чхаве, сарине кхедаја амен заедно. О искусна пхраља користинена и Библија те поможинен амен те хаљова сар те применина лакере начела ко амаро џивдипе (5. Мојсеева 31:12; Неемија 8:8). Ко амаре состанокија сарине шај те коментарина хем те гиљава, а аѓаар сикаваја амари надеж (Евреите 10:23).

Ка овел тли вера ко Девел панда позорали. Ко прво веко, о апостол Павле е пхраленге таро јекх собрание вакерѓа: ‚Бут мангава те дикхав тумен, . . . заедно те охрабрина амен, ме тумаре а тумен мле вераја‘ (Римјаните 1:11, 12). Адава со заедно кхедаја амен амаре пхраленцар ко состанокија, керела амари вера те овел панда позорали хем поодориг да спремно те џивдина сар со вакерела и Библија.

Шај ли те аве ко амаре состанокија хем ту да те осетине акаја радост? Бут шукар ка ове доџардо саринендар. Са амаре состанокија тане биловенгоро — на родаја лове.

• Пало каскоро пример џаја кеда кхедаја амен ко амаре состанокија?

• Сави корист ка овел амен ако џаја ко состанокија?

Хем ко лошно хем ко шукар време, амен редовно џаја ко амаре состанокија. Иако иси амен проблемија хем шај сием уморна тари бути, амен бут мангаја те дружина амен амаре духовно пхраленцар. Соске кераја аѓаар?

Адава тано башо амаро шукарипе. ‚Те размислина јекх јекхеске‘, пишинѓа о Павле, мислинѓа андаленге со и ко амаро собрание (Евреите 10:24). Ов мангља те пхенел кај амен мора шукар те пенџара амен јекх јекхеја. Лескере лафија охрабринена амен те сикава грижа јаверенге. Кеда ка пенџара пошукар е јаверен таро собрание, ка дикха кај несаве лендар сине лен слична проблемија сар амаре хем кај шај те поможинен аменге.

Ка овен амен бут паше амала. Амаре духовна пхраља нане само несаве мануша со авена ко состанокија, него ола тане амаре паше амала. Амен дружинаја амен хем накхаја аменге шукар ленцар ко јавера да прилике. Сар користинела аменге адава со дружинаја амен ленцар? Сикљоваја те ценина јекх јекхе хем амаро мангипе машкар аменде бајровела. Тегани, кеда амаре духовна пхрален иси проблемија, амен сием спремна те поможина ленге соске сием ленцар паше амала (Изреки 17:17). Адалеа со дружинаја амен сариненцар ко амаро собрание, сикаваја кај грижинаја амен јекх јекхеске (1. Коринќаните 12:25, 26).

Охрабринаја ту те роде туке амала машкар адала со керена е Девлескири волја. Ту шај те аракхе асавке амала машкар е Јеховаскере сведокија. Ма мукх ништо те спречинел ту те дружине ту аменцар.

• Соске тано корисно аменге со дружинаја амен ко состанокија?

• Кеда шај те аве хем те запознајне е јавере сведокон таро амаро собрание?

Ко состанокија со икерена сине о прва христијанија сине гиља, молитве, читинена сине и Библија хем дискутиринена сине баши лате. На керена пе сине нисаве ритуалија (1. Коринќаните 14:26). Амаре состанокија тане слична сар ленгере.

Сикљоваја тари Библија, а адава тано корисно аменге. Секоја сабота или недела, ко секова собрание икерела пе библиско говор таро 30 минутија. Аѓаар сикљоваја сар и Библија поможинела амен хем со вакерела ој башо време ко кова со џивдинаја. Сарине сием охрабриме те пратина ко амаре Библије о стихија со читинена пе. Пало говор, јекх саати иси амен Проучибе и „Стражарска кула“, коте со шај сарине те ден коментарија џикоте проучинаја несави статија тари и Стражарска кула — издание за проучување. Акава поможинела амен те икера о Библиска советија. И исто статија проучинела пе ко побутер таро 110.000 собранија ки цело Пхув.

Поможинена аменге пошукар те сикава јаверен. Јавер диве иси амен панда јекх состанок коте со и програма тани ко трин делија. Акава состанок викинела пе Амаро живото хем служба сар христијања. О материјали башо акава состанок лендо тано тари публикација Амаро живото хем служба — листија спремибаске која со икљола секова масек. О прво дело таро акава состанок, Барвалипа таро е Девлескоро Лафи, поможинела аменге пошукар те пенџара несаво дело тари Библија со ваљани англедер те читина ле. Пало адава, ко дело Де тутар са ки служба иси приказија со сикавена сар шај те кера лафи е јаверенцар баши Библија. Иси јекх пхрал со дела советија хем поможинела аменге те ова пошукар ко читибе хем сикајбе е јаверен (1. Тимотеј 4:13). Ко последно дело, Те живина сар христијања, керела пе лафи сар те применина о библиска начелија ко амаро живото. Исто аѓаар, ко акава дело иси дискусија која со бајрарела амаро пенџарибе баши Библија.

Кеда ка аве ко амаре состанокија, сигурно ка овел туке бут шукар те шуне хем те дикхе сар сикљоваја тари Библија (Исаија 54:13).

• Со шај те шуне ко состанокија со икерена е Јеховаскере сведокија?

• Ко кова таро амаре состанокија ту би мангеа те аве?

Дикхљан ли ко слике тари акаја брошура кобор шукар тане уравде е Јеховскере сведокија кеда џана ко собраниска состанокија? Соске добором бут пазинаја ко амаро урајбе хем изглед?

Сикаваја кај почитујнаја е Девле. Чаче и адава кај е Девлеске тано поважно саве сием андрал (1. Самоилова 16:7). Ама, кеда кхедаја амен те славина ле, мангаја те сикава кај вилеа почитујнаја е Девле хем амаре духовно пхрален хем пхењен. Кеда ваљани те икљова англо несаво цари или председатели, амен ка пазина сар ка ова уравде. Слично, адава сар сием уравде кеда сием ко состанок сикавела кобор ценинаја е Јехова, о ‚Цари е народонгоро‘, хем о тхан коте со кхедаја амен те обожавина ле (Еремија 10:7).

Сикаваја кај икераја о начела тари Библија. И Библија охрабринела е христијанен те уравен пе ‚скромно хем разумно‘ (1. Тимотеј 2:9, 10). Те урава амен скромно значинела те на ла јаверенгоро внимание адалеа со амаре шеја ка овен провокативна или ленцар ка истакнина амен. Адава со сием разумна ка поможинел аменге те бирина шуже шеја со нане неуредна или со џана џи ки крајност. Акала начела мукхена аменге баро избор башо адава сар те урава амен. Бизо те вакера нешто, адава со ка ова уредно хем шукар уравде шај те ‚украсинел о сикљојбе амаре Спасителескоро‘ хем ‚славинела е Девле‘ (Тит 2:10; 1. Петрово 2:12). Кеда сием шукар уравде ко амаре состанокија, о јавера шукар ка дикхен ко Јехова хем ко лескоро народо.

Чак ако мислинеа кај нане ту шеја со одговоринена башо состанокија ма мукх адава те спречинел ту те аве ки ленде. Амаре шеја на ваљани те овен скупа или модерна, него уредна, чиста хем пристојна.

• Кобор тано важно адава сар сием уравде кеда џаја ко состанокија?

• Кола начела водинена амен ко амаро урајбе хем изглед?

Ако проучинеја и Библија е Јеховаскере сведоконцар, шај трудинеја ту англедер те спремине о материјали со ка проучинен. Ка овел туке бут корисно ако исто адава кереја англедер те џа ко собраниска состанокија. Ако редовно кераја аѓаар ка овел амен најшукар резултатија.

Одлучин кеда хем коте ка проучине. Кеда туке најшукар те спремине ту? Дали тано адава рано сабајле, англедер те џа ки бути или раќате кеда о чхаве совена? Ако нашти побутер вакти те проучине, одлучин кобор шај хем ма мукх ништо те ачхавел ту таро адава. Роде туке мирно тхан проучибаске хем ачхав са о буќа со шај те сметинен ту, сар со и о радио, и телевизија хем о мобилно телефони. Адалеа со ка молине ту англедер те проучине, ка овел туке полокхе те мислине ко адава со читинеја тари Библија, а на ко тле проблемија (Филипјаните 4:6, 7).

Бележин о материјали хем спремин ту те де коментарија. Почмин аѓаар со ка хаљове башо со керела лафи и тема. Размислин башо наслов е статијакоро или е поглавјескоро, дикх сар секова поднаслов тано поврзимо е темаја, дикх о слике хем о пучиба башо повторување со сикавена о главна мисле. Тегани читин секова пасус хем роде о одговор башо дендо пучибе. Роде хем читин о денде стихија тари Библија, хем размислин сар тане поврзиме адалеа со читинеја ко пасус (Дела 17:11). Кеда ка аракхе о одговор, бележин некобор лафија или мисле ко пасус со ка поможинен ту те сетине ту ки лесте. Тегани, ко состанок, те мангљан шај те вазде то вас хем те де кратко коментари тле лафенцар.

Адалеа со ка проучине различна теме со ка овен ко секова состанок, ту ка шај духовно те барваљове библиска мисленцар (Матеј 13:51, 52).

• Кеда ка овел туке најшукар те спремине ту башо состанокија?

• Сар шај коркори те спремине ту те де коментарија ко состанок?

Панда ко пурано време, о Јехова мангља секоја фамилија те накхел време заедно, те шај те овел попаше е Јеховаја хем попаше сар фамилија (5. Мојсеева 6:6, 7). Адалеске е Јеховаскере сведокија секова курко одвојнена песке време сар фамилија башо Јехова — керена лафи башо духовна буќа кола со и потребна ленге. Чак ако сиан коркори, ту исто шај те одвојне време башо Девел аѓаар со ка проучине несави тема тари Библија со ту ка бирине.

Адава тано време те ове попаше е Јеховаја. ‚Овен попаше е Девлеа, хем ов ка овел попаше туменцар‘ (Јаков 4:8). Ка пенџара пошукар е Јехова кеда тари Библија сикљоваја побутер башо адава саво тано ов хем сар ов постапинела сине. Јекх локхо начин сар те почминен тумари Фамилијарно рат тано аѓаар со заедно ка читинен ко гласо дело тари Библија. Шај те читинен адава дело тари Библија со и дендо ко распоред ко Амаро живото хем служба — листија спремибаске адале куркеске. Сарине шај те читинен по јекх дело хем после те вакерен со сиклилен тари Библија.

Адава тано време те овел попаше и фамилија. О ром хем и ромни, исто аѓаар о родителија хем о чхаве, овена попаше јекх јекхеја кеда проучинена и Библија заедно. И Фамилијарно рат ваљани те овел радосно време кова со сарине едвај ка аџикерен. О родителија шај те биринен те керен лафи пле чхавенцар башо несаве буќа со ка одговоринен е чхавенге таро амаре публикацие, сар со и Стражарска кула или Разбудете се! или тари амари интернет-страница, jw.org. Шај те керен лафи башо несаво проблеми со иси е чхавен ки школа хем те поможинен ленге сар те икљон ко крајо леа. Исто аѓаар, шај те дикхен програма тари амари телевизија JW Broadcasting (tv.jw.org), хем пало адава керен лафи баши лате. Шај те вежбинен о гиља со ка гиљавен пе ко состанокија хем пало адава шај заедно те хан или те пиен нешто.

Акава посебно време со секова курко заедно дена е Јеховаске ка поможинел сариненге ки фамилија те уживинен џикоте проучинена и Библија, а о Јехова бут ка благословинел адава со керена (Псалм 1:1-3).

• Соске одвојнана време баши и Фамилијарно рат?

• Сар шај о родителија те керен те шај сарине те уживинен ки Фамилијарно рат?

Соске о мануша ко акала слике тане добором радосна? Ола тане ко јекх таро амаре конгресија. Сар со сине е Девлескере слугенге ко пурано вакти вакердо те кхеден пе трин пути ко берш, амен да едвај аџикераја те кхеда амен ко амаре конгресија (5. Мојсеева 16:16). Секова берш, иси амен трин конгресија: дуј покраинска конгресија кола тане по јекх диве хем регионално конгрес кова тано трин диве. Сави корист иси амен лендар?

Ола керена амаро духовно пхралипе панда позорало. Исто сар со о Израелција радосно славинена сине е Јехова ‚машкар о кхедиме мануша‘, амен да радосно славинаја ле ко амаре конгресија (Псалм 26:12; 111:1). Ки ленде иси амен прилика те запознајна хем те дружина амен амаре пхраленцар хем амаре пхењенцар таро различна собранија па чак таро јавера пхувја. Кеда иси пауза, амен адатхе заедно хаја маро хем уживинаја ки шукар атмосфера ко акава духовно настан (Дела 2:42). Адатхе шај те дикха о мангипе со спојнела са е пхрален ко цело сумнал (1. Петрово 2:17).

Ола поможинена аменге духовно те бајрова. О Израелција сине бут бахтале со шај сине ‚те хаљовен о лафија‘ тари Библија со сине ленге објасниме џикоте сине кхедиме заедно (Неемија 8:8, 12). Амен да ценинаја адава со сикљоваја тари Библија ко амаре конгресија. Секова конгрес иси ле библиско тема. Преку интересна говорија хем приказија, амен сикљоваја сар те кера е Девлескири волја. Охрабринела амен кеда шунаја башо адала со ачховена верна ко акава пхаро време. Ко регионална конгресија икерена пе драме колендар о настанија тари Библија овена аменге пореална, хем лендар бут сикљоваја. Ко секова конгрес, окола со заветинге пе е Јеховаске шај те крстинен пе ко пани.

• Соске сием добором радосна ко амаре конгресија?

• Сави корист шај те овел ту ако аљан ко конгрес?

Некобор диве англедер те мерел, о Исус вакерѓа: ‚Акава шукар хабери башо царство ка проповединел пе ко цело сумнал, башо сведоштво са е народонге, хем тегани ка авел о крајо‘ (Матеј 24:14). Сар ваљани те керел пе акава? Аѓаар со ка џал пе пало е Исусескоро пример со мукхља џикоте сине ки Пхув (Лука 8:1).

Џаја те проповедина е манушенге таро кхер ко кхер. О Исус сикавѓа пле ученикон те проповединен о шукар хабери таро кхер ко кхер (Матеј 10:11-13; Дела 5:42; 20:20). Е проповедникон таро прво веко сине лен подрачја коленде ваљани сине те проповединен (Матеј 10:5, 6; 2. Коринќаните 10:13). Исто сар ленде, амен да авдиве сием шукар организириме те проповедина, хем секоле собрание иси ле подрачје колесте со проповединела. Адава поможинела аменге те кера е Исусескири заповед те ‚проповедина е народоске хем темелно те сведочина‘ (Дела 10:42).

Џаја те проповедина сегде кај со иси мануша. О Исус денѓа аменге пример адалеа со проповединела сине е манушенге ко тхана кај со шај сине те аракхел лен, сар на пример, узо море или узо бунари (Марко 4:1; Јован 4:5-15). Амен да кераја е манушенцар лафи баши Библија ко секова тхан — ко улице, ко дуќанија, ко паркија или преку телефони. Исто аѓаар, секогаш кеда шај, проповединаја амаре комшиенге, колегенге ки бути, соучениконге или фамилијаке. Адалеске со сарине аѓаар проповединаја, милионија мануша ки цело Пхув шај те шунен и ‚шукар вест башо спасение‘ (Псалм 96:2).

Дали текнинела ту некасте каске со мангеа те вакере о шукар хабери башо е Девлескоро царство хем со ка анел ов ки иднина? Адава со џанеја ма икер ки туте. Вакер ле е јаверенге со посигате!

• Кова ‚шукар хабери‘ мора те овел проповедимо?

• Сар е Јеховаскере сведокија џана пало е Исусескоро пример башо проповедиба?

О лафи „пионери“ бут пути сикавела ки некасте кова со истражинела нево подрачје хем пхравела друмо е јаверенге те џан пало лескоро пример. О Исус сине сар пионери адалеске со сине бичхалдо ки Пхув те сикавел е манушен хем те пхравел ленге о друмо те спасинен пе (Матеј 20:28). Авдиве, адала со џана пало лескоро пример тане сар лесте аѓаар со накхавена кобор со шај побутер време те ‚керен ученикија‘ (Матеј 28:19, 20). Несаве шај те служинен ки јекх посебно служба која амен викинаја ла пионерско служба.

О пионери накхавела побутер време ко проповедибе. Са е Јеховаскере сведокија вакерена јаверенге о шукар хабери. Ама, дисаве планиринге пумаро време те шај те служинен сар општа пионерија, аѓаар со накхавена 70 саатија ки служба секова масек. Те шај те керен адава, бут лендар џана ки бути по некобор саатија ко диве или ко курко. А јавера тане бириме те служинен сар специјална пионерија ко тхана коте со ваљани побутер те проповединел пе. Ола накхавена 130 или побутер саатија ки служба секова масек. О пионерија мангена скромно те џивдинен хем иси лен доверба кај о Јехова ка грижинел пе ленге (Матеј 6:31-33; 1. Тимотеј 6:6-8). Окола со нашти те овен општа или специјална пионерија, ако мангена, шај те служинен сар помошна пионерија, аѓаар со ка џан ки служба 30 или 50 саатија ко масек.

О пионери служинела адалеске со мангела е Јехова хем е манушен. Исто сар о Исус, амен дикхаја кај о мануша бут хари џанена башо Девел хем башо лескере намере (Марко 6:34). Ама, амен џанаја буќа со шај те поможинен ленге акана хем те ден лен надеж баши пошукар иднина. Адалеске со мангела е манушен, о пионери мангела те дел побутер таро пло вакти хем сила те шај духовно те поможинел лен (Матеј 22:39; 1. Солуњаните 2:8). Адалеске со керела адава, лескири вера овела позорали, овела панда попаше е Девлеа хем тано бут бахтало (Дела 20:35).

• Сар ка објаснине со и пионери?

• Соске дисаве служинена сар пионерија?

О Теократско школујбе бут време тано знако колеа со пенџарѓона е Јеховаскере сведокија. Те шај најшукар те керен пли служба, иси посебна школе околенге со побутер време накхавена те проповединен башо Царство (2. Тимотеј 4:5).

Школа башо пионерија. Ко крајо таро прво берш тари пионерско служба, јекх општо пионери тано канимо те овел ки јекх школа со трајнела шов диве. Ој икерела пе ки најпаше дворана. Акаја школа поможинела е пионеренге те овен попаше е Јеховаја, пошукар те керен и служба, хем те ачховен понадари да пионерија.

Школа башо полновремена објавителија. Акаја школа трајнела дуј масек хем керди тани те школуњел е искусно пионерен, кола тане спремна те служинен ко тхана коте со иси потреба. Ола џана пало е Исусескоро пример, о најбаро Проповеднико со сине ки Пхув, хем вакерена: „Аке сиум! Бичхал ма ман!“ (Исаија 6:8; Јован 7:29). Те геле те служинен ко јавер тхан, тегани шај ка ваљани поедноставно те џивдинен. И култура, и клима хем о хајбе шај те овен бут појавер таро адава со и сикле. Чак шај ка ваљани те сикљовен неви чхиб. Ки акаја школа шај те џан прандиме хем бипрандиме пхраља хем пхења, со иси лен таро 23 џи ко 65 берш. И школа поможинела те овел лен духовна особине со ка ваљанен ленге ко ленгере доделбе хем ка сикавел лен сар пошукар те служинен е Јеховаске хем лескере организацијаке.

Школа Гилеад. Ки Хебрејско чхиб, о лафи „Гилеад“ тано поврзимо е лафеа „сведоштво“. Сар со почминѓа и школа Гилеад, таро 1943 берш, лате геле побутер таро 8.000 мисионерија кола со сине бичхалде те ден баро сведоштво ‚џи о најдур тхана ки пхув‘ хем сине бут успешна (Дела 13:47). Кеда амаре мисионерија ресле прво пути ко Перу, на сине нијекх собрание — акана иси побутер таро 1.000 собранија. Исто аѓаар, кеда о мисионерија почминге те служинен ки Јапонија, адари сине похари таро деш Сведокија — акана иси побутер таро 200.000 Сведокија. Акаја школа трајнела панџ масек хем ки лате хор проучинела пе и Библија. Адала со служинена сар специјална пионерија, мисионерија, со служинена ко подружнице, или тане надгледникија, шај те овен каниме ки Школа Гилеад. Пали акаја школа, ола шај бут те поможинен ко проповедибе хем ки организација.

• Ко со поможинела е пионерен и Школа башо пионерија?

• Кој шај те џал ки Школа башо полновремена објавителија?