Сар поможинена аменге о библиска начелија?

1. Соске ваљани некој те водинел амен ко амаро џивдипе?

О Јехова тано бут помудро амендар. Ов тано амаро Дад со бут мангела амен хем грижинела пе аменге. Кеда керѓа амен, лескири намера на сине те ова независна лестар (Еремија 10:23). Исто сар со јекхе тикне чхавеске ваљани водство таро родителија, аѓаар аменге да ваљани водство таро Девел (Исаија 48:17, 18). О библиска начелија дена амен водство кова со и поклон таро Јехова. Читин 2. Тимотеј 3:16.

Е Јеховаскере законија хем начелија сикавена амен сар најшукар те џивдина хем сар шај те добина вечно џивдипе. Адалеске со о Девел керѓа амен, ов заслужинела те ова благодарна башо лескоро водство. Читин Псалм 19:7, 11; Откровение 4:11.

2. Со и о библиска начелија?

Начело тано библиско чачипе со сикавела со мангела о Девел те кера ко бут ситуацие. А о закон важинела само ко денде ситуацие (5. Мојсеева 22:8). Ваљани хор те размислина те шај те хаљова сар јекх начело важинела ки денди ситуација (Изреки 2:10-12). На пример, и Библија вакерела кај о џивдипе тано поклон таро Девел. Акава начело шај те водинел амен џикоте сием ки бути, кеда сием кхере или џикоте џаја негде. Ако икераја ки годи кај о џивдипе тано поклон таро Девел, амен нане те чхива ки опасност амаро хем јаверенгоро џивдипе. Читин Дела 17:28.

3. Кола дуј начелија тане најбаре?

О Исус вакерѓа кола дуј начелија тане најбаре. О прво начело сикавела со и најважно ко џивдипа — те пенџара е Девле, те манга ле хем верно те служина леске. Акава начело ваљани те овел амен ки годи кеда анаја секоја одлука (Изреки 3:6). Адала со џивдинена според акава начело овена паше е Девлеа, чаче тане бахтале хем ка добинен вечно џивдипе. Читин Матеј 22:36-38.

О дујто начело поможинела аменге те ова ко мир јаверенцар (1. Коринќаните 13:4-7). Кеда икераја акава начело, амен постапинаја е манушенцар сар со постапинела ленцар о Девел. Читин Матеј 7:12; 22:39, 40.

4. Сар поможинена аменге о библиска начелија?

О библиска начелија сикавена саринен ки фамилија те манген пе (Колошаните 3:12-14). Ки Библија иси панда јекх начело со заштитинела е фамлиен, а адава тано кај о брако ваљани те овел трајно врска. Читин 1. Мојсеева 2:24.

Адалеске со џивдинаја сар со сикавела и Библија, сием материјално хем емоционално заштитиме. На пример, о газдија бут пути родена буќаке манушен со икерена о начела тари Библија со сикавена лен те овен чесна хем вредна (Изреки 10:4, 26; Евреите 13:18). И Библија, исто аѓаар, сикавела амен те ова задоволна кеда иси амен о буќа со ваљани џивдипаске хем амаро паше однос е Јеховаја те овел аменге поважно таро материјална буќа. Читин Матеј 6:24, 25, 33; 1. Тимотеј 6:8-10.

Адава со џивдинаја според о библиска начела шај те поможинел аменге те аракха амаро састипе (Изреки 14:30; 22:24, 25). На пример, адава со шунаја е Девлескоро закон те на маќова заштитинела амен таро лошна буќа хем насвалипе со шај те лен амаро џивдипе (Изреки 23:20). О Јехова мукхела те пија алкохол, ама умерено, а на те маќова (Псалм 104:15; 1. Коринќаните 6:10). О начелија таро Девел тане башо амаро шукарипе, ола поможинена амен те пазина на само ко амаре постапке него исто аѓаар ко амаре мисле (Псалм 119:97-100). Ама, о чачутне христијанија на икерена е Девлескере начелија само адалеске со ола тане башо ленгоро шукарипе. Ола икерена лен те шај те славинен е Јехова. Читин Матеј 5:14-16.