Фусноте
1. Сој тано о Баро Вавилон?
Котар џанаја кај „о Баро Вавилон“ претставинела са е ховавне религиен? (Откровение 17:5). Размислин башо акала буќа:
Влијајнела ко цело свето. Башо Баро Вавилон пишинела кај бешела упро пања со „претставинена буте народон“ хем кај „владинела упро царија ки пхув“ (Откровение 17:15, 18).
Нашти те овел ни о политичко ни о трговско систем. „О царија ки пхув“ хем „о трговција“ ка преживинен лескоро уништување (Откровение 18:9, 15).
Ко погрешно начин претставинела е Девле. О Баро Вавилон викинела пе блудница адалеске со паше соработинела е владенцар те шај те добинел паре хем јавера корисна буќа (Откровение 17:1, 2). Ов завединела е манушен таро са о нацие хем криво тано башо мерибе буте манушенгоро (Откровение 18:23, 24).
Иран тут ки лекција 13, точка 6
2. Кеда ка појавинел пе о Месија?
И Библија пророкујнѓа кај ка појавинел пе о Месија откеда ка накхен 69 курке. (Читин Даниел 9:25.)
Кеда почминѓе о 69 курке? Ко 455 берш а.а.е. Ко адава време о управители о Неемија ресља ко Ерусалим те обновинел хем палем те градинел и диз (Даниел 9:25; Неемија 2:1, 5-8).
Кобор време трајнѓе о 69 курке? Ко несаве библиска пророштвија јекх диве претставинела јекх берш (4. Мојсеева 14:34; Езекиел 4:6). Тегани, јекх курко претставинела ефта берша. Ко акава пророштво 69 курке претставинена 483 берша (69 курке по ефта диве).
Кеда завршинѓе о 69 курке? Ако гејнаја 483 берша почминдор таро 455 берш а.а.е., аваја џи ко 29 берш а.е.a Адава тано баш о берш кеда о Исус крстинѓа пе хем уло Месија! (Лука 3:1, 2, 21, 22).
Иран тут ки лекција 15, точка 5
3. Медицинска третманија коте со користинела пе о рат
Ко несаве медицинска третманија користинела пе о рат е пациентескоро. На пример, несаве мануша дена пло рат или складиринена ле те шај те овел користимо покасно џикоте трајнела и операција. Амен сар христијања на кераја адава (5. Мојсеева 15:23).
Сепак, иси несаве медицинска третманија кола сој тане прифатлива јекхе христијанеске. На пример, ки ленде вклучимо тано те керел пе крвно слика, дијализа, хемодилуција, кхедибе о клетке или те користинел пе машина башо срце или плуќа. Секој коркори мора те одлучинел сар ка користинел пе лескоро рат џикоте трајнела и операција или несави терапија или несаво медицинско испитување. Секова доктори користинела акала третманија ко различно начин. Адалеске, англедер те прифатине несави операција, медицинско испитување или терапија ваљани те дознајне сар точно ка користинел пе тло рат. Кеда ваљани те ане одлуке башо медицинска третманија коте со ка користинел пе тло рат, размислин башо акала пучиба:
Ако дело таро мло рат тано пренасочимо авријал таро мло тело хем и циркулација мле ратескири шај чак те овел чхинавди несаво време, дали мли совест ка дозволинел манге панда те дикхав ко акава рат сар дело мандар хем кај тегани на ваљани „те тхавдел ки пхув“? (5. Мојсеева 12:23, 24).
Дали мли библиско школујми совест ка мучинел ман ако џикоте трајнела несаво медицинско третмани икалела пе мандар дело таро рат, прочистинела пе, хем палем иранела пе ко мло тело?
Иран тут ки лекција 39, точка 3
4. Причине башо одвојбе
И Библија на советинела е роме хем е ромња те одвојнен пе. Исто аѓаар, ој јасно сикавела кај, чак ако некој одвојнѓа пе, адава на дела ле право те кхувел палем ко брако (1. Коринќаните 7:10, 11). Сепак, иси несаве ситуацие коте со јекх христијани шај ка одлучинел те одвојнел пе таро пло брачно партнери.
Намерно на грижинела пе: Јекх ром на мангела те грижинел пе пле фамилијаке ко материјално поглед, џи ко адава степен со лескере фамилија нане ла о основна буќа башо живото (1. Тимотеј 5:8).
Пхаро физичко малтретирибе: О брачно партнери тано добором насилно со анела ки опасност лакоро или лескоро састипе или живото (Галатите 5:19-21).
Целосно спречибе те служинел пе е Јеховаске: О ром или и ромни целосно спречинела пле брачно партнере те служинел е Јеховаске или чак силаја чхивела ле ко несаво начин те пхагел е Девлескере заповедија (Дела 5:29).
5. Празникија
Сар христијања амен на учествујнаја ко празникија кола со нане прифатлива е Јеховаске. Сепак, секова христијани мора те користинел пли библиско школујми совест кеда ваљани те анел одлуке сар ка постапинел ко одредена ситуацие кеда керела пе лафи башо празникија. Дикх несаве примерија башо адава.
Некој честитинела туке о празнико. Шај едноставно те вакере: „Ов састо“. Ако адава со честитинела туке мангела те џанел повише, шај те објаснине леске соске ту на славинеа о празнико.
Тло брачно партнери, кова со нане е Јеховаскоро сведоко, канинела тут те ове ко ручко или вечера е фамилијаја кеда иси несаво празнико. Ако тли совест дозволинела туке те џа, ту шај те објаснине тле брачно партнереске кај ако сине несаве паганска обичаија, ту нане те учествујне ко адава.
Тло газда тари бути дела тут парично бонус кеда иси празнико. Дали ваљани те одбине адава бонус? На секогаш. Дали ка прифатине или на, шај те зависинел таро адава сар тло газда дикхела ко адава бонус. Дали тло газда дикхела ко адава бонус сар дело таро празнико? Или, дали адалеа само мангела те сикавел кај ценинела тут сар шукар работнико?
Некој дела тут поклон кеда иси празнико. Окова со дела тут о поклон шај вакерела туке: „Џанава кај на славинеа о празнико, ама ме мангава те дав тут акава“. Шај адалеа само мангела те овел љубезно туја. Тари јавер страна, шај иси тут чувство кај ов адалеа мангела те испитинел тли вера хем те теринел тут те славине о празнико. Откеда ка размислине башо акава, ту ваљани те одлучине дали ка прифатине о поклон или на. Ко са амаре одлуке мангаја те овел амен чисто совест хем те ачхова верна е Јеховаске (Дела 23:1).
Иран тут ки лекција 44, точка 1
6. Заразна насвалипа
Адалеске со мангаја е манушен, амен бут пазинаја те на пренесина несаво заразно насвалипе е јаверенге. Адава кераја ле на само кеда сием сигурна кај сием насвале, него исто аѓаар чак кеда сумнинаја амен ко адава. Амен кераја адава адалеске со и Библија заповединела аменге: „Манг тле пашутне сар коркори тут“ (Римјаните 13:8-10).
Сар шај ко практично начин те икера амен ки акаја заповед? Ако некас иси заразно насвалипе, ов ваљани те избегинел физичко контакт е јаверенцар. На пример, адава значинела кај ов нане те дел пло вас кеда поздравинела пе е јаверенцар хем кај нане те гушинел пе хем те чуминел пе е јаверенцар. Ов на ваљани те хољанел ако некој на канинела ле ки песте кхере адалеске со мангела те заштитинел пле фамилија. Исто аѓаар, англедер те крстинел пе, ов ваљани те информиринел е координаторе таро старешинство баши пли ситуација. Тегани, ка керен пе о потребна подготовке те шај о јавера со исто ка крстинен пе те овен заштитиме. Исто аѓаар, ако некој мангела те почминел некасаја врска — а сине ки опасност те заразинел пе несаве заразно насвалипаја — тегани, ов ваљани доброволно те керел тести хем те проверинел дали тано насвало или на. Аѓаар ов ка сикавел кај грижинела пе е јаверенге, а на само песке (Филипјаните 2:4).
Иран тут ки лекција 56, точка 2
7. Несогласувања ко бизнис хем законска буќа
Бут проблемија башо финансиска буќа шај те избегинен пе ако керела пе писмено договор, чак ако адава касаја со кераја договор тано пхрал (Еремија 32:9-12). Сепак, понекогаш ка случинел пе машкар о христијања те појавинен пе тикне несогласувања. Ола ваљани те решинен адала несогласувања машкар песте, сигате хем ко мирно начин.
Сар ваљани те решинен пе сериозна проблемија, сар сој клеветибе или финансиско измама? (Читин Матеј 18:15-17.) О Исус денѓа амен трин чекорија кола со ваљани те следина:
1) Ола ваљани прво те трудинен пе те решинен о проблеми коркори машкар песте. (Дикх о стихо 15.)
2) Ако на успејнѓе те решинен о проблеми, ола шај те пучен те овен присутна јекх или дуј зрела христијања таро собрание те шај те поможинен. (Дикх о стихо 16.)
3) Ако о проблеми панда нане решимо, тегани шај те роден помош таро старешине. (Дикх о стихо 17.)
Ко повише ситуацие, о проблемија со иси амен амаре пхраленцар на ваљани те решина лен ко судо, соске адава анела лаџ е Јеховаске хем е собраниеске (1. Коринќаните 6:1-8). Сепак, ко несаве ситуацие о случај шај чаче ка ваљани те дел пе ко судо сар на пример, те добинел пе развод, те добинел пе старателство башо чхаве, алиментација, отштета тари несави осигурително компанија, те керел пе стечајно постапка хем те читинел пе тестаменти. Ако јекх христијани користинела акава законско право те шај ко мирно начин те решинел о случај, тегани на пхагела е Библијакоро совет.
Ако тано кердо несаво сериозно криминал сар на пример, силујбе, те злоупотребинен пе чхаве, те нападинел пе некас, баро чорибе или мударибе, тегани јекх христијани со пријавинела адава ко властија на пхагела е Библијакоро совет.
a Таро 455 берш а.а.е., џи ко 1 берш а.а.е., накхле 454 берша. Таро 1 берш а.а.е., џи ко 1 берш а.е., накхља јекх берш. (О берш 0 на постојнела.) Таро 1 берш а.е., џи ко 29 берш а.е., накхле 28 берша. Са вкупно накхле 483 берша.