ЛЕКЦИЈА 38
О живото — поклон со ваљани те ценине
О живото тано пхердо шуже буќенцар коленде со шај те уживина. Иако иси амен проблемија, сепак иси буќа кола со керена амен бахтале ко живото. Сар шај те сикава кај ценинаја о живото сар поклон таро Јехова? Хем која тани и најважно причина соске ваљани те ценина о живото?
1. Соске ваљани те ценина о живото?
Амен ваљани те ценина о живото адалеске со ов тано поклон таро амаро мангло Дад, о Јехова. Лестар „авела о живото“ соске ов створинѓа са сој џивдо (Псалм 36:9). „Ов тано адава со дела сариненге о живото, о дишибе хем са“ (Дела 17:25, 28). О Јехова дела амен са адава сој аменге потребно башо живото. Ама, ов на мангела само те живина него хем те уживина ко живото. (Читин Дела 14:17.)
2. Сар шај те сикава е Јеховаске кај ценинаја о живото?
Панда таро моменти кеда ти дај ачхили кхамни туја, о Јехова грижинела пе туке. Јекх Девлескоро слуга, о Давид, сине водимо таро Девел те вакерел: „Тле јакхја дикхле ман ко воги мле дајакоро“ (Псалм 139:16). Тло живото тано бут скапоцено е Јеховаске. (Читин Матеј 10:29-31.) Е Јехова ка дукхал бут ако некој мударела јавере или чак коркори песa (2. Мојсеева 20:13). Исто аѓаар, е Јехова ка дукхал бут ако бизи потреба чхиваја амаро или е јаверенгоро живото ки опасност. Ако аракхаја амаро хем е јаверенгоро живото, амен сикаваја кај ценинаја о живото сар скапоцено поклон.
ДОЗНАЈН ПОВИШЕ
Дикх ко кола начинија шај те сикаве кај ценинеа о живото сар поклон таро Девел.
3. Аракх тло састипе
Адалеске со ветинѓем е Јеховаске кај секогаш ка кера адава со ов родела, амен користинаја цело амаро живото те служина леске. Аѓаар, ко јекх симболично начин даја амаро тело сар жртва е Девлеске. Читин Римјаните 12:1, 2, а пало адава керен лафи башо акала пучиба:
Спрема акала стихија, соске ваљани те аракхе тло састипе?
Со мислинеа, сар шај ту те аракхе тло састипе?
4. Пазин ки тли хем ки јаверенгири безбедност
И Библија охрабринела амен те избегина буќа сој тане опасна амаре животоске. Дикх о ВИДЕОКЛИПИ те шај те дикхе несаве начинија сар те пазине ки безбедност.
Читин Изреки 22:3, а пало адава керен лафи башо акала пучиба. Сар шај те пазине ки тли хем ки јаверенгири безбедност...
кеда сиан кхере?
кеда сиан ки бути?
кеда спортујнеа?
кеда ту возинеа или некој јавер?
5. Ценин о живото е бебескоро со панда на бијандило
Ко јекх поетско начин о Давид вакерѓа кај о Јехова грижинела пе башо бебе кова сој панда е дајаке ко воги хем дикхела сар ов бајровела. Читин Псалм 139:13-17, а пало адава керен лафи башо акава пучибе:
Кеда почминела о живото ко е Јеховаскере јакхја — кеда јекх бебе тано зачнимо или кеда бијанѓовела?
О Јехова преку о закони со денѓа е Израелцонге заштитинела сине е кхамне џувлен хем е чхавен со панда на сине бијаме. Читин 2. Мојсеева 21:22, 23, а пало адава керен лафи башо акала пучиба:
Сар дикхела сине о Јехова ко адава ако некој ненамерно мударела сине јекхе бебе кова со панда на бијандило?
Со мислинеа, сар би дикхела о Јехова ки некасте ако ов намерно керела адава?b
Со мислинеа ту башо акава?
Понекогаш шај чак јекх џувли која со ценинела о живото те мислинел кај нане ла јавер избор освен те керел абортус. Читин Исаија 41:10, а пало адава керен лафи башо акава пучибе:
Ако несаве џувља иси ла притисок те керел абортус, кастар ваљани те родел помош хем соске?
НЕСАВЕ ШАЈ ВАКЕРЕНА: „Понекогаш о околностија тане асавке со е џувља нане ла јавер избор освен те керел абортус“.
Со уверинела тут кај о Јехова ценинела хем о живото е дајакоро хем е чхавескоро со панда нане бијамо?
СО СИКЛИЛЕМ
И Библија сикавела амен те манга, те ценина хем те аракха амаро хем е јаверенгоро живото, соске ов тано поклон таро Јехова.
Сар ка одговорине?
Со сикавела кај о Јехова ценинела о живото е манушенгоро?
Сар осетинела пе о Јехова кеда некој мударела некас јавере или коркори пес?
Со највише ценинеа ко живото?
ИСТРАЖИН
Сар шај те сикава е Јеховаске кај сием благодарна башо живото со денѓа амен сар поклон?
Дали о Девел ка простинел јекхе џувљаке која со керѓа абортус? Читин со вакерела и Библија башо акава пучибе.
Дикх сар е Девлескоро стави башо живото ваљани те влијајнел ко адава сави рекреација биринаја.
„’Екстремни спортови‘ — дали да се ризикува?“ (Разбудете се! таро 8 јануари 2001)
a О Јехова бут грижинела пе околенге сој тане пхаге вилеа (Псалм 34:18). Ов хаљовела и дукх хем о чувствија околенгере со мангена те мударен коркори пес хем мангела те поможинел ленге.
b Окола со англедер керѓе абортус на ваљани те осетинен пе претерано крива. О Јехова шај те простинел ленге. Башо повише информацие, дикх и статија „Што пишува во Библијата за абортусот?“ која со аракхљола ко дело „Истражин“ ки акаја лекција.