Со вакерела и Библија башо брако хем башо адава те на ове ко брако?

Ко несаве културе, о мануша мислинена кај некој нашти те овел бахтало ако нане ко брако. Ама, окола сој ко брако нане автоматски побахтале таро адала со нане ко брако. И Библија вакерела кај тано шукар хем те ове ко брако хем те на ове ко брако.

1. Кола тане несаве користија кеда некој нане ко брако?

И Библија вакерела: „Окова со кхувела ко брако керела шукар, ама окова со на кхувела ко брако керела панда пошукар“. (Читин 1. Коринќаните 7:32, 33, 38.) Ки која смисла окова со на кхувела ко брако „керела панда пошукар“? Јекх христијани со нане ко брако на ваљани те грижинел пе башо брачно партнери. Адава значинела кај ле иси ле побари слобода. Асавке пхраља хем пхења, шај те керен повише ки служба башо Јехова, на пример, аѓаар со ка селинен пе ки јекх јавер пхув те шај те проповединен о шукар хабери. А сој најважно, ола шај те накхавен повише време ко адава те овен попаше е Јеховаја.

2. Кола тане несаве користија кеда некој тано ко брако хем тано венчимо?

Исто аѓаар, о брако да анела посебна хем шуже буќа. И Библија вакерела: „Дујенге тано пошукар него јекхеске“ (Проповедник 4:9). Акала лафија посебно важинена е христијаненге кола со икерена пе ко библиска начелија башо брако. Дуј џене кола со венчинена пе англо закони дена завет кај ка манген пе, ка поштујнен пе хем кај ка грижинен пе јекх јекхеске. Адалеске ола осетинена пе посигурна ко пумаро брако, него таро дуј џене кола со живинена заедно, ама нане венчиме. Аѓаар, ленгоро брако ка овел јекх стабилно средина коте со шај те бајрарен пумаре чхавен.

3. Сар дикхела о Јехова ко брако?

Кеда о Јехова керѓа о прво брако, ов вакерѓа: „О мануш ка мукхел пле даде хем пле даја хем ка спојнел пе пле ромњаја“ (1. Мојсеева 2:24). О Јехова мангела о ром хем и ромни те манген пе хем те ачховен заедно са џикоте тане џивде. Ов дозволинела те развединен пе само ако јекх лендар керела прељуба. Ки асавки ситуација, о Јехова дела право е брачно партнереске кова со нане криво, те одлучинел дали ка развединел пе или наa (Матеј 19:9). О Јехова на дозволинела е христијаненге те овел лен повише тари јекх ромни (1. Тимотеј 3:2).

ДОЗНАЈН ПОВИШЕ

4. Шукар користин адава со на сиан ко брако

О Исус вакерѓа кај адава со некој нане ко брако шај те овел поклон (Матеј 19:11, 12). Читин Матеј 4:23, а пало адава керен лафи башо акава пучибе:

• Сар о Исус користинѓа адава со на сине ко брако те служинел пле Дадеске хем те поможинел е јаверенге?

О христијања со нане ко брако шај те овен бахтале ако исто сар о Исус шукар користинена пумаре околностија. Дикх о ВИДЕОКЛИПИ, а пало адава керен лафи башо акава пучибе:

ВИДЕОКЛИПИ: Окола со нане ко брако тане верна е Јеховаске (3:11)

• Кола шукар буќа шај те керен о христијања со нане ко брако?

Дали џанљан?

И Библија на вакерела ко кобор берш некој ваљани те кхувел ко брако. Ама, и Библија охрабринела е тернен те аџикерен са џикоте на накхела о време кеда почминена те појавинен пе ленге сексуална желбе хем кеда адала желбе тане најсилна. Пало адава периоди, ола ка шај пошукар те размислинел хем те анен помудра одлуке (1. Коринќаните 7:36).

5. Мудро бирин тле брачно партнере

Те бирине туке брачно партнери тани јекх таро најважна одлуке со ваљани те ане. Читин Матеј 19:4-6, 9, а пало адава керен лафи башо акава пучибе:

• Соске јекх христијани на ваљани те сиѓарел те кхувел ко брако?

И Библија шај те поможинел туке те џане саве особине ваљани те роде ко тло идно брачно партнери. Најважно тано те роде туке брачно партнери со мангела е Јехова.b Читин 1. Коринќаните 7:39 хем 2. Коринќаните 6:14, а пало адава керен лафи башо акала пучиба:

• Соске ваљани те кхува ко брако само некасаја со служинела е Јеховаске?

• Со мислинеа, сар ка осетинел пе о Јехова ако кхуваја ко брако некасаја со на служинела леске хем на мангела ле?

6. Дикх ко брако сар о Јехова со дикхела

Ко пурано Израел, несаве рома развединена пе сине таро пумаре ромња таро себична причине. Читин Малахија 2:13, 14, 16, а пало адава керен лафи башо акава пучибе:

• Соске о Јехова мрзинела кеда о мануша развединена пе тари било која јавер причина освен тари прељуба?

Дикх о ВИДЕОКЛИПИ, а пало адава керен лафи башо акава пучибе:

ВИДЕОКЛИПИ: О брако — трајно врска (4:30)

• Ако сиан ко брако некасаја со на служинела е Јеховаске, со шај те кере те шај тло брако те овел бахтало?

7. Икер е Јеховаскере мерилија башо брако

ВИДЕОКЛИПИ: Ту шај те икере е Јеховаскере мерилија башо брако (4:14)

Читин Евреите 13:4, а пало адава керен лафи башо акала пучиба:

• Со мислинеа, дали е Јеховаскере мерилија башо брако тане превише пхаре те икерен пе? Соске мислинеа аѓаар?

Ко бут пхувја и влада родела таро пле граѓања законско те регистриринен пумаро брако или пумаро развод. О Јехова очекујнела таро пле слуге те поштујнен адала законија. Читин Тит 3:1, а пало адава керен лафи башо акава пучибе:

• Ако сиан ко брако, дали сиан законско венчимо тле партнереа?

СО СИКЛИЛЕМ

Бизи разлика дали сиан ко брако или на, ако икереа тут ко е Јеховаскере мерилија ка ове бахтало хем задоволно. Солдуј буќа тане поклон таро Јехова.

Сар ка одговорине?

• Сар шај некој најшукар те користинел адава со нане ко брако?

• Соске и Библија вакерела те кхува ко брако само некасаја со служинела е Јеховаске?

• Спрема и Библија, која тани и единствено оправдано причина башо развод?

ИСТРАЖИН

Со значинела те кхуве ко брако „само ко Господари“?

„Прашања од читателите“ (Стражарска кула таро 1 јули 2004)

Дикх таро со јекх пхрал мора сине те откажинел пе хем сар о Јехова денѓа ле берекети башо адава.

Надинава ман сине кај ој ка прифатинел о чачипе (1:56)

Башо кола буќа ваљани некој те размислинел англедер те одлучинел те развединел пе или те одвојнел пе таро пло брачно партнери?

„Поштујн о брако сар поклон таро Девел“ (Стражарско кула таро декември 2018)