Писмо таро Водечко тело

Мангле пхраљален хем пхењален,

О мангипе спрема о Јехова хем о мануша поттикнинела амен те кера адава сој пишимо ки Библија: „Џан хем керен ученикија таро мануша таро са о народија, хем крстинен лен“ (Мат. 28:19, 20; Мар. 12:28-31). О несебично мангипе шај те влијајнел упро окола со исправно дикхена ко вечно живото (Апо. 13:48).

Англедер, концентриринаја амен сине те памтина о презентацие хем те да публикацие. Акана ваљани те трудина амен те ова пошукар ко керибе лафи е манушенцар. Мангаја те сикава ленге мангипе адалеа со ка кера лафи башо теме со интересинела лен. Адава значинела кај ваљани те прилагодина амен хем шукар те размислина башо со секиринена пе хем со интересинела лен. Сар акаја брошура ка поможинел амен те кера адава?

Ки акаја брошура иси 12 лекцие кола со ка поможинен аменге те овен амен особине со ваљанена аменге те шај те сикава мангипе хем те поможина е манушенге те овен е Христосескере ученикија. Секоја лекција тани темелими ко библиско извештај ко кова со о Исус или јавер христијани таро прво веко сикавѓе несави особина ки служба. Амари цел нане те памтина презентацие него те рода начинија сар те сикава кај мангаја е манушен. Иако секоја особина тани важно баши секоја гранка тари амари служба, ка дикха сар несаве особине тане посебно важна кеда почминаја разговорија, кеда кераја повторна посете или кеда водинаја библиска курсија.

Џикоте разглединеа секоја лекција, шукар размислин сар шај те сикаве адаја особина кеда кереа лафи е манушенцар ко тхан коте со живинеа. Трудин тут те бајраре тло мангипе спрема о Јехова хем о мануша. Адава ка поможинел туке повише таро било со јавер те исполнине тли цел те поможине е манушенге те овен е Исусескере ученикија.

Бут ценинаја и чест со шај заедно те соработина туменцар (Соф. 3:9). О Јехова нека благословинел тумен понадари да џикоте сикавена е манушенге мангипе хем поможинена лен те овен е Исусескере ученикија!