Дали е Девлескоро Лафи сине менимо?

Несаве мануша пучена пе дали е Девлескоро Лафи сине менимо. О пекамбери о Исаија вакерѓа кај е Девлескоро Лафи „ачховела засекогаш“ (Исаија 40:8). Соске шај те ова сигурна кај нане менимо?

Е Девле иси ле моќ те аракхел пло Лафи хем те на дозволинел те овел менимо. На пример, е Девлескере пекамберија пишинѓе лескере лафија ко материјалија со на трајнена сине бут време. Те шај те на нашавѓовел адава, сине мануша со внимателно препишинена сине е Девлескоро Лафи. Ола гејнена сине секоја буква таро тексти те шај те овен сигурна кај ништо на додајнѓе, променинѓе или икалѓе. Сепак, адалеске со на сине совршена, несаве лендар керѓе тикне грешке. Ама, адала грешке на менинѓе и смисла таро оргинално тексти.

СОСКЕ ШАЈ ТЕ ОВА СИГУРНА КАЈ Е ДЕВЛЕСКОРО ЛАФИ СО ИСИ АМЕН АВДИВЕ ТАНИ И ОРИГИНАЛНО ПОРАКА ТАРО ДЕВЕЛ?

Постојнена бут копие таро пуране свитокија таро е Девлескоро Лафи. Ако ки несави копија приметинела пе чак најтикни разлика, шај те спорединел пе јавере копиенцар те шај те дикхел пе коте тани керди и грешка. Башо повише информацие дикх и статија „Дали и Библија сине меними?“ ки jw.org.

На пример, размислин башо пуране свитокија кола со аракхле лен несаве бедуинија ко пештере паше узо Мртво Море ко 1947 берш. Акала свитокија, коленде со иси делија таро е Девлескоро Лафи, тане пуране повише таро 2.000 берш. О експертија спорединѓе акала свитокија е Девлескере Лафеа со иси амен авдиве. Со дознајнѓе?

О изучувачија откринѓе кај о авдисутно тексти ко е Девлескоро Лафи тано исто сар о оригинална свитокија.a Акава сикавела кај адава со читинаја авдиве ко е Девлескоро Лафи тани е Девлескири порака. Шај те ова сигурна кај о Девел грижинѓа пе лескири порака те ачховел исто џи авдиве.

Адалеске шај те овел амен целосно доверба кај адава со читинаја ко е Девлескоро Лафи тано точно. Акана, те дикха со откринѓе о пекамберија башо Девел.