Понадари да молин тут баши е Девлескири милост

О Девел денѓа е манушенге јекх посебно поклон — и способност те комунициринен леа хем те вакерен леске пле чувствија ки молитва. О пекамбери о Даути (Давид) вакерѓа: „Ту сиан адава со шунела о молитве, ки туте авела секова мануш“ (Псалм 65:2). Ама сар ваљани те молина амен те шај о Девел те шунел амаре молитве хем те дел амен берекети?

МОЛИН ТУТ ПОНИЗНО ХЕМ ТАРО ВИЛО

Адава со ка молине тут тле лафенцар ка поможинел туке те вакере леске са со пашљола туке ко вило, јавере лафенцар те вакере леске сар осетинеа тут (Псалм 62:8). О Семоќно Девел ценинела о искрена молитве со авена таро вило.

КОРИСТИН Е ДЕВЛЕСКОРО ЛИЧНО АНАВ

Иако е Девле иси ле бут титуле, иси ле само јекх анав. Ко е Девлескоро Лафи пишинела: „Ме сиум о Јехова. Адава тано мо анав“ (Исаија 42:8). О анав Јехова појавинела пе околу 7.000 пути ко е Девлескоро Лафи. Бут пекамберија користинена сине е Девлескоро анав кеда молинена пе сине леске. О Ибрахими вакерѓа леске: „Молинава тут Јехова... мукх ман те вакерав [туке] панда нешто“ (1. Мојсеева 18:30). Амен да ваљани те користина е Девлескоро анав, Јехова, кеда молинаја амен.

МОЛИН ТУТ КИ ТЛИ ЧХИБ

Бизи разлика ки која чхиб кераја лафи, о Девел хаљола амаре мисле хем чувствија. Лескоро Лафи уверинела амен: „О Девел нане пристрасно, него ов тари секоја нација прифатинела околе со дарала лестар хем керела адава сој праведно“ (Дела 10:34, 35).

Ама, те шај те добина берекетија таро Девел, нане доволно само те молина амен. Ко следна статие ка дикха со јавер ваљани те кера.