Пучиба таро читателија

Дали о лафија таро апостол Павле со аракхљона ко 1. Коринќаните 15:29 значинена кај несаве христијања ко адава време крстинена пе сине башо адала со више муле?

На. Ни ки Библија ни ко историска лила на читинаја башо нешто асавко.

Спрема о начин сар тано преведимо акава стихо ко бут Библие несаве мислинена кај ко е Павлескоро време несаве крстинена пе сине ко пани башо муле. На пример ко јекх превод пишинела: „Соске крстинена пе башо муле ако нане воскресение е муленге?“ (Радосна вест).

Ама, дикх со вакерѓе дуј библиска изучувачија. Јекх лендар о Грегори Локвуд вакерѓа кај нане ни библиско ни историско доказ кај о мануша крстинена пе сине башо муле. Нешто слично пишинѓа о професори Гордон Фи. Ов вакерѓа кај нане ни јекх пример, ни ки Библија ни ки историја башо асавко крштевање. Акава крштевање на спомнинела пе ко нево завет хем нане нисаво доказ кај о прва христијања крстинена пе сине ко асавко начин. О исто шај те вакерел пе башо цркве со сине формириме кратко пало мерибе е апостоленгоро.

И Библија вакерела кај е Исусескере ученикија ваљани сине те поможинен е манушенге таро са о народија те овен лескере ученикија, те крстинен пе хем те сикавен лен те икерен са со заповединѓа ленге (Мат. 28:19, 20). Англедер некој те крстинел пе ваљани сине те сикљол башо Јехова хем башо лескоро Чхаво, те овел ленге послушно хем те сикавел вера ки ленде. Некој со више муло нашти сине те керел акала буќа, а ни јекх џивдо христијани нашти сине те керел адава башо окова со муло (Проп. 9:5, 10; Јован 4:1; 1. Кор. 1:14-16).

Тегани со мангља те вакерел о Павле?

Несаве христијања вакерена сине кај нане воскресение (1. Кор. 15:12). Ама, о Павле вакерѓа кај адава тано погрешно размислибе. Ов вакерѓа ленге кај секова диве сине ки опасност те мерел. Бут пути кеда аракхлило ко опасна ситуацие, ов сине уверимо кај откеда ка мерел ка овел воскреснимо сар духовно личност исто сар со сине о Исус (1. Кор. 15:30-32, 42-44).

О Коринќања ваљани сине те хаљовен кај сарине сој тане помазаникија ваљани те трпинен неволје хем те мерен англедер те воскреснинен. Окола сој тане „крстиме ко Христос Исус“ крстиме тане ко лескоро мерибе да (Рим. 6:3). Исто сар о Исус ола да ваљани сине те овен мучиме хем те мерен хем пало адава те овен воскресниме ко небо.

Повише таро дуј берш откеда крстинѓа пе ко пани, о Исус вакерѓа дује пле апостоленге: „Ка крстинен тумен е крстибаја колеа со ме крстинава ман“ (Мар. 10:38, 39). О Исус тегани на мислинѓа ко крстибе ко пани, него ко симболично крстибе ко мерибе. Ов џанља кај адалеске со ка ачховел верно е Јеховаске ка мора те мерел. О апостол Павле пишинѓа е помазаниконге кај ола ваљани те циден муке заедно е Исусеа те шај те овен прославиме заедно леа (Рим. 8:16, 17; 2. Кор. 4:17). Спрема адава, ола да ваљани сине те мерен те шај те овен воскресниме те живинен ко небо.

Значи о точно превод башо адава со вакерѓа ле о Павле тано: „Ако нане аѓаар, тегани ко со ка шај те надинен пе окола кола со крстинена пе те шај те мерен? Ако о муле чаче на воскреснинена, соске тегани крстинена пе те шај те мерен?“