Јекх пурано пророштво со влијајнела упри туте

1. Со керѓа о Јехова одма откеда о Адам хем и Ева грешинѓе? (1. Мојсеева 3:15).

ОДМА откеда о Адам хем и Ева грешинѓе, о Јехова денѓа надеж ленгере потомцонге преку јекх важно пророштво. Адава пророштво тано пишимо ки 1. Мојсеева 3:15. (Читин.)

2. Соске акава пророштво тано нешто посебно?

² Акава пророштво појавинела пе ко прво лил тари Библија. Ама ов тано посебно адалеске со са о јавера да библиска лила тане поврзиме леа. Исто сар о лепако со спојнела са о листија ко јекх лил, аѓаар о пророштво тари 1. Мојсеева 3:15 поврзинела и содржина таро секова библиско лил ко јекх хабери, а адава тано кај о Девел ка бичхалел Спасители кова со ка уништинел е Сатана хем са лескере следбеникон.b Адава ка овел баро берекети сариненге кола со мангена е Јехова!

3. Башо со ка кера лафи ки акаја статија?

³ Ки акаја статија, ка добина одговор ко следна пучиба поврзиме е пророштвоја тари 1. Мојсеева 3:15: Кој тане спомниме ко адава пророштво? Сар исполнинѓа пе акава пророштво? Хем сар иси амен корист лестар?

КОЈ ТАНЕ СПОМНИМЕ КО ПРОРОШТВО?

4. Кој тано о „сап“ хем котар џанаја адава?

⁴ Ки 1. Мојсеева 3:14, 15 тане спомниме о „сап“, о „потомство“ е сапескоро, и „џувли“ хем о „потомство“ е џувљакоро. И Библија поможинела аменге те хаљова кас претставинена ола.c Прво те дикха кој тано о сап. Јекх дословно сап нашти сине те хаљовел со вакерѓа о Јехова ки Еденско градина. Значи о Јехова сигурно вакерѓа адаја осуда некаске со шај сине те хаљовел адава. Каске? Таро Откровение 12:9 јасно дикхаја кој тано о сап. Адатхе аменге откримо кај о „најпурано сап“ тано о Сатана о Бенг. Ама кој тано о потомство е сапескоро?

5. Кој тано о потомство е сапескоро?

⁵ Понекогаш и Библија користинела о лафи потомство ки симболично смисла те шај те опишинел околен со размислинена хем постапинена сар пумаро симболично дад. Значи ко потомство е сапескоро тане вклучиме духовна суштествија хем о мануша кола со слично сар о Сатана противинена пе е Јеховаске хем лескере народоске. Адала тане о ангелија со мукле пли задача ко небо ко е Ноескере диве хем са о лошна мануша кола со понашинена пе сар пумаро дад о Бенг (1. Мој. 6:1, 2; Јован 8:44; 1. Јов. 5:19; Јуда 6).

6. Соске и Ева нашти те овел „и џувли“ таро пророштво?

⁶ Акана те дикха кој тани „и џувли“. Акаја џувли на сине и Ева. Котар џанаја адава? Те дикха само јекх причина. О пророштво вакерела кај о потомство е џувљакоро ка „згмечинел“ е сапескоро шеро. Сар со дикхлем, о сап тано о лошно ангели о Сатана хем адалеске нијекх несовршено мануш со авела тари Ева нашти те уништинел ле. Тегани сар ка овел уништимо о Сатана?

7. Спрема Откровение 12:1, 2, 5, 10, кој тани и џувли сој спомними ки 1. Мојсеева 3:15?

⁷ О последно лил тари Библија откринела аменге кој тани и џувли сој спомними ки 1. Мојсеева 3:15. (Читин Откровение 12:1, 2, 5, 10.) Акаја џувли нане тари пхув. Тело лакере пре тани и месечина хем иси ла круна ко шеро таро 12 ѕвезде. Ој бијанела јекхе посебно чхаве — е Девлескоро Царство. Адалеске со о Царство тано ко небо, значи и џувли да мора те овел ко небо. Ој претставинела о небесно дело тари е Јеховаскири организација колате сој о верна ангелија (Гал. 4:26).

8. Кој тано о главно дело таро потомство е џувљакоро, хем кеда појавинѓа пе? (1. Мојсеева 22:15-18).

⁸ Е Девлескоро Лафи исто аѓаар поможинела аменге те открина кој тано о главно дело таро потомство е џувљакоро. Акава потомство ваљани сине те авел таро Авраам. (Читин 1. Мојсеева 22:15-18.) Баш сар со вакерѓа о пророштво, о Исус сине потомцо таро адава верно мануш (Лука 3:23, 34). Ама о потомство ваљани те овел сине бут помоќно таро обично мануш соске ов ваљани сине те уништинел е Сатана. Адалеске, кеда е Исусе сине ле 30 берш ов сине помазимо свети духоја. Кеда сине помазимо, о Исус уло о главно дело таро потомство е џувљакоро (Гал. 3:16). Откеда муло хем воскреснинѓа, о Девел денѓа ле „слава хем чест“ хем „цело власт ко небо хем ки пхув“ исто аѓаар денѓа ле и власт те уништинел о буќа со керѓа о Бенг (Евр. 2:7; Мат. 28:18; 1. Јов. 3:8).

9-10. а) Кој тане исто аѓаар дело таро потомство е џувљакоро, хем кеда овена дело таро потомство? б) Со ка дикха акана?

⁹ Ама освен о Исус, јавера да ка овен дело таро потомство е џувљакоро. О апостол Павле откринѓа кој тано акава дело таро потомство кеда вакерѓа е помазиме христијаненге кола со сине хем Евреија хем таро јавера нацие: „Ако припадинена е Христосеске, тегани сиен е Авраамескоро потомство, наследникија спрема јекх ветување“ (Гал. 3:28, 29). Јекх христијани овела дело таро потомство е џувљакоро кеда о Јехова помазинела ле свети духоја. Значи, ко потомство тане вклучиме о Исус Христос хем о 144.000 кола со ка владинен леа заедно (Отк. 14:1). Сарине ола трудинена пе те размислинен хем те постапинен сар пумаро Дад, о Јехова.

¹⁰ Акана откеда џанаја кој тане адала сој спомниме ки 1. Мојсеева 3:15, те дикха со више керѓа о Јехова те шај те исполнинел акава пророштво хем сар адава користинела аменге.

САР ИСПОЛНИНЕЛА ПЕ О ПРОРОШТВО?

11. Ки сави смисла сине о потомство е џувљакоро кицимо „ки пета“?

¹¹ Спрема о пророштво тари 1. Мојсеева 3:15, о сап ваљани те кицинел е џувљакере потомство „ки пета“. Акава исполнинѓа пе кеда о Сатана користинѓа е Евреен хем е Римјанен те мударен е Девлескере Чхаве (Лука 23:13, 20-24). Исто сар кеда некој тано повредимо ки пета хем несаво време нашти те пхирел, аѓаар о Исус да несаво време нашти сине те керел ништо соске сине трин диве муло (Мат. 16:21).

12. Сар хем кеда ка овел згмечимо е сапескоро шеро?

¹² О пророштво тари 1. Мојсеева 3:15 сикавела кај о Исус нашти сине те ачховел ко гробо. Соске на? Спрема о пророштво, о потомство ваљани сине те згмечинел е сапескоро шеро. Акава значинела сине кај е Исусескири пета ваљани сине те сасљол. Хем чаче уло аѓаар! О трито диве пало лескоро мерибе о Исус сине воскреснимо хем сине леске дендо бесмртно живото ко небо. Ко време со одрединѓа ле о Девел, о Исус ка уништинел е Сатана (Евр. 2:14). О Христос хем окола со владинена заедно леа ка уништинен са е Девлескере душманен — е сапескере потомствоd (Отк. 17:14; 20:4, 10).

САР КОРИСТИНЕЛА АМЕНГЕ АКАВА ПРОРОШТВО?

13. Сар користинела аменге адава со исполнинела пе акава пророштво?

¹³ Ако сиан е Девлескоро слуга, тегани иси тут корист таро адава со исполнинела пе о пророштво. Кеда о Исус ало ки пхув сар мануш ов ко совршено начин сикавѓа пле Дадескири личност (Јован 14:9). Адалеске, преку лесте шај сине те запознајна хем те заманга е Јехова. Исто аѓаар бут користинена аменге е Исусескере сикљојба хем о начин сар водинела о христијанска собранија авдиве. Ов сикавѓа амен те живина ко начин кова со ка поможинел аменге те кера е Јеховаскири волја. Хем адалеске со о Исус сине кицимо ки пета хем муло, саринен амен иси амен корист таро адава. Сар? Откеда о Исус воскреснинѓа, о Јехова прифатинѓа пле Чхавескири совршено жртва која со чистинела амен таро са амаре гревија (1. Јов. 1:7).

14. Котар џанаја кај о пророштво со денѓа ле о Јехова ки Еденско градина на исполнинѓа пе одма? Објаснин.

¹⁴ О пророштво со вакерѓа ле о Јехова ки Еденско градина сикавела кај ваљани сине те накхел несаво време те шај целосно те исполнинел пе. Ваљани сине те накхел време те шај е џувља те овел ла потомство, те шај о Сатана те кхедел пле следбеникон хем те шај те овел душманлуко машкар адала дуј групе. Бут поможинела аменге адава со хаљоваја акава пророштво соске предупрединела амен кај о свето колеа со владинела о Сатана ка мрзинел е Јеховаскере слуген. Покасно, о Исус денѓа слично предупредување пле учениконге (Мар. 13:13; Јован 17:14). Посебно ко последна 100 берш дикхлем сар исполнинела пе акава дело таро пророштво. Сар?

15. Соске о свето са повише мрзинела амен, ама соске на ваљани те дара таро Сатана?

¹⁵ Кратко откеда о Исус уло Цари ко е Девлескоро Царство ко 1914 берш, о Сатана сине фрдимо таро небо теле ки пхув. Хем акана нашти више те иранел пе ко небо хем аџикерела те овел уништимо (Отк. 12:9, 12). Ама ов на бешела, ов тано бут хољамо хем икалела пли холи упро е Девлескоро народо (Отк. 12:13, 17). Адалеске о свето са повише хем повише мрзинела е Девлескере народо. Ама на ваљани те дара таро Сатана хем таро лескере следбеникија. Наместо адава, ваљани те ова увериме исто сар о апостол Павле кова со пишинѓа: „Ако о Девел тано аменцар, тегани кој ка овел против аменде?“ (Рим. 8:31). Шај те овел амен целосно доверба ко Јехова соске сар со дикхлем, побаро дело таро пророштво со аракхљовела ки 1. Мојсеева 3:15 више исполнинѓа пе.

16-18. Сави корист сине е Кертисе, е Урсула хем е Џесика таро адава со халиле о пророштво тари 1. Мојсеева 3:15?

¹⁶ Е Јеховаскоро ветување со аракхљовела ки 1. Мојсеева 3:15 шај те поможинел аменге те издржина било саво пхарипе. О Кертис кова со служинела сар мисионери ко Гуам вакерела: „Понекогаш случинѓе пе манге буќа кола со керѓе манге пхаро те ачховав верно е Јеховаске. Ама адава со хор размислинава сине башо пророштво тари 1. Мојсеева 3:15 поможинѓа манге те на нашавав ми доверба ко мло небесно Дад“. О Кертис едвај аџикерела о диве кеда о Јехова ка анел крајо са амаре мукенге.

¹⁷ Јекх пхен тари Германија со викинела пе Урсула вакерела кај адава со халили о пророштво тари 1. Мојсеева 3:15 поможинѓа лаке те уверинел пе кај и Библија тани таро Девел. Бут влијајнѓа упри лате адава со халили сар са о јавера пророштвија тане поврзиме акале пророштвоја. Ој исто аѓаар вакерела: „Кеда дознајнѓум кај о Јехова одма керѓа нешто те шај те дел амен надеж, адава керѓа панда повише те замангав ле“.

¹⁸ И Џесика, јекх пхен тари Микронезија, вакерела: „Панда шај те сетинав ман сар осетинава ман сине кеда халиљум кај аракхљум о чачипе! Адава со исполнинела пе о пророштво тари 1. Мојсеева 3:15 поможинѓа манге те дикхав кај о муке со цидаја лен авдиве нане дело тари е Јеховаскири намера аменцар. Акава пророштво исто аѓаар уверинѓа ман кај те служинел пе е Јеховаске тано о најшукар живото со шај те овел амен авдиве а панда повише ки иднина“.

19. Соске шај те ова сигурна кај о последно дело таро пророштво ка исполнинел пе?

¹⁹ Сар со дикхлем, о пророштво тари 1. Мојсеева 3:15 панда исполнинела пе. О потомство е џувљакоро хем о потомство е сапескоро тане откриме. О Исус, о главно дело таро потомство е џувљакоро, састило тари пли рана ки пета хем акана тано моќно, бесмртно Цари. Акана о Јехова биринѓа скоро саринен со ка владинен лескере Чхавеа упре ко небо. Адалеске со о прво дело таро пророштво исполнинѓа пе, шај те ова сигурна кај о последно дело — те згмечинел пе е сапескоро шеро — исто аѓаар ка исполнинел пе. Кобор ка ова бахтале кеда о Сатана ка овел уништимо. Џи тегани ма те откажина амен. Шај те овел амен доверба ко амаро Девел. Преку е џувљакоро потомство, ов ка дел бут берекетија са е народонге ки пхув (1. Мој. 22:18).