Пучиба таро читателија

Со мислинѓа о Павле кеда вакерѓа „сиум сар чхаво кова со предвреме бијандило“? (1. Коринќаните 15:8)

Спрема 1. Коринќаните 15:8, о Павле вакерѓа: „А сар последно појавинѓа пе манге да, адалеске сиум сар чхаво кова со предвреме бијандило“. Акате, о Павле керела лафи баши ситуација кеда ки визија дикхља е Исусе ки лескири небесно слава. Англедер, мислинаја сине кај те шај те дикхел е Исусе ки небесно слава, е Павлеске сине денди чест те бијанѓовел, или те воскреснинел, ко духовно живото веконцар англедер те почминел асавко воскресение. Ама откеда пошукар проучинѓа пе акава стихо дикхлем кај иси потреба те кера промена ко амаро објаснување.

Тегани со мислинѓа о Павле кеда вакерѓа „сиум сар чхаво кова со предвреме бијандило“? Иси некобор објаснувања.

Ов уло е Исусескоро ученико таро јекх пути хем сине шокиримо кеда случинѓа пе адава. Кеда некој бијанѓовела предвреме адава бут пути случинела пе изненадено. Џикоте о Савле — кова со покасно уло пенџардо сар Павле — џала сине ко Дамаск те прогонинел е христијанен, ов на очекујнѓа те дикхел ки визија е воскресниме Исусе. Адава со о Павле уло е Исусескоро ученико на изненадинѓа само лесте него хем е христијанен тари адаја диз колен со планиринѓа те прогонинел. Акава со случинѓа пе е Павлеске бут шокиринѓа ле. Пало адава ов несаво време нашти сине те дикхел (Дела 9:1-9, 17-19).

Ов уло е Исусескоро ученико „ко погрешно време“. О оргинално грчко лафи сој преведимо сар „бијамо предвреме“, шај исто аѓаар те превединел пе сар „бијамо ко погрешно време“. Јекх јавер библиско превод акава стихо превединела ле аѓаар: „Сар ка пхене бијандиљум ко време кеда никој на очекујнела сине“. Ко време кеда о Павле уло е Исусескоро ученико, о Исус више иранѓа пе ко небо. О Павле ко претходна стихија спомнинела буте џенен кола со дикхле е воскресниме Исусе англедер те џал ко небо, ама ле на сине ле адаја прилика (1. Кор. 15:4-8). Ама о Исус денѓа ле адаја прилика кеда појавинѓа пе леске, иако сар те пхене сине „ко погрешно време“.

Ов ко јекх скромно начин керѓа баши песте лафи. Спрема несаве истражувачија, акале лафенцар о Павле шај сине критизерско спрема песте. Ако о Павле мислинѓа ко адава, тегани ов признајнѓа кај на заслужинела те овел апостоли. Уствари, ов вакерѓа: „Соске, ме сиум најтикно таро апостолија хем на заслужинава те овав викимо апостоли, соске ме прогонинава сине е Девлескоро собрание. Ама, о Девел сикавѓа манге шукарипе со на заслужинава ле хем адалеске сиум апостоли“ (1. Кор. 15:9, 10).

Значи, веројатно о Павле мангља те пхенел кај о Исус појавинѓа пе леске изненадено, кај уло е Исусескоро ученико ко време кеда никој на очекујнѓа или кај ов на заслужинела сине асавки визија. Бизи разлика со мангља те вакерел, јасно тано кај ов бут ценинѓа адава со случинѓа пе леске. Адава сине леске јекх таро најбаре доказија кај о Исус воскреснинѓа. Адалеске ни хари на чудинела амен адава со кеда проповединела сине башо е Исусескоро воскресение, ов често спомнинела сине адаја визија со дикхља ла (Дела 22:6-11; 26:13-18).