Емоционално састипе — проблеми ко цело свето
„Секогаш осетинава ман секиримо, чак кеда нане нисави причина башо адава.“
„Кеда осетинава ман шукар, адава почминела те даравкерел ман, соске џанава кај ако сиум среќно, пало адава ка овав тажно.“
„Трудинава ман те мислинав само башо авдисутно диве. Ама, понекогаш таро јекх пути осетинава ман секиримо башо бут јавера буќа.“
Акала тане изјаве таро мануша кола со иси лен проблемија емоционално састипаја. Дали ту да осетинѓан тут некогаш аѓаар? Или, шај џанеа некас со боринела пе асавке проблемеа?
Ов сигурно кај на сиан коркори. Бут џене авдиве, или несаве таро ленгере пашутне, боринена пе емоционално насвалипаја.
Џанаја кај живинаја ко „бут пхаро време“ кова со анела аменге бут проблемија (2. Тимотеј 3:1). Спрема јекх истражување, отприлика секова офтото мануш ко свето, боринела пе несаве психичко насвалипаја. Ко 2020 берш, и пандемија КОВИД-19, керѓа о број околенгоро со иси лен анксиозност те бајрол 26 посто повише него со сине ко 2019 берш. А о број околенгоро со иси лен пхари депресија, барило 28 посто.
Иако тано шукар те џанел пе кобор мануша боринена пе асавке проблемеа, сепак панда пошукар тано те џана со шај те кера амен хем амаре пашутне те шај те осетина амен кобор со шај пошукар.
Сој тано емоционално или психичко састипе?
Кеда некој тано емоционално или психичко састо, ов осетинела пе шукар хем шај те функциониринел шукар. Исто аѓаар, шај те икљовел ко крајо е секојдневно стресеа, те керел шукар пли бути хем те осетинел пе задоволно таро живото.
О емоционално насвалипе...
НА АВЕЛА таро лична слабостија.
ТАНО здравствено проблеми кова со влијајнела бут јекхе манушеске ко чувствија, ко размислибе хем ко понашибе.
Бут пути керела е манушеске пхаро те овен ле амала, хем те икљовел ко крајо е секојдневна проблеменцар.
На биринела е манушескере берша, култура, раса, религија, кобор бари школа иси ле или ки сави економско состојба тано.
Помош кеда иси проблемија е емоционално састипаја
Несаво мануш шај таро јекх пути те почминел те понашинел пе појавер, те совел похари или повише, те хал бут повише или похари таро англедер или те почминел те осетинел пе вознемиримо или тажно. Ко асавко случај асавко мануш ваљани те џал ко доктори те шај те хаљовел која тани и причина башо проблеми хем сар шај те решинел ле.
О најмудро мануш кова со некогаш живинѓа, о Исус Христос, вакерѓа: „Е састе манушенге на ваљани доктори, него е насваленге“ (Матеј 9:12). Окола со боринена пе асавке насвалипаја хем со добинена медицинско терапија шај бут те тикњарен о симптомија хем адава шај те поможинел ленге те овел лен пошукар хем исполнимо живото. А ако о симптомија тане сериозна хем трајнена повише време, тегани ка овел мудро со посигате те родел пе помош.a
Иако и Библија нане медицинско прирачнико, ки лате иси корисна советија башо амаро емоционално састипе. Мангаја те охрабрина тут те дикхе о следна статие коленде керела лафи башо адава сар и Библија шај те поможинел аменге те икљова ко крајо е проблеменцар со анела о емоционално насвалипе.
a И Стражарско кула на препорачинела несаво посебно медицинско третмани. Секој лично ваљани те дикхел саве опцие иси ле англедер те анел несави одлука.