2 | Утеха таро е Девлескоро Лафи
И БИБЛИЈА ВАКЕРЕЛА: „Са со сине пишимо англедер, пишимо тано баши амари поука, хем иси амен надеж соске е Девлескоро лафи дела амен утеха хем поможинела амен те издржина“ (РИМЈАНИТЕ 15:4).
Со значинела акава
О утешна мисле со авена таро е Девлескоро Лафи дена амен сила хем поможинена амен кеда почминаја те размислина ко негативно начин. Исто аѓаар, е Девлескоро Лафи дела амен надеж кај панда хари нане те овел емоционално дукх.
Сар шај акава те поможинел аменге
Сарине амен понекогаш шај те осетина амен вознемириме или те ова тажна. Ама окола со иси лен депресија или анксиозност шај цело време те осетинен пе аѓаар. Сар шај и Библија те поможинел амен?
Ки Библија иси бут позитивна мисле коленцар шај те менина о негативна (Филипјаните 4:8). Ој чаче шај те пхерел амари годи утешна мисленцар кола со смиринена амен хем поможинена аменге те контролирина амаре чувствија (Псалм 94:18, 19).
И Библија шај те поможинел аменге те чхинава те размислина кај на врединаја (Лука 12:6, 7).
Бут библиска стихија уверинена амен кај на сием коркори хем кај о Девел, амаро Створители, целосно хаљовела сар осетинаја амен (Псалм 34:18; 1. Јованово 3:19, 20).
И Библија ветинела кај о Девел ка косел са о мисле со дукхавена амен (Исаија 65:17; Откровение 21:4). Кеда мучинена амен мисле или чувствија со вознемиринена амен акава ветување шај те дел амен сила те издржина.