4 | И Библија дела практична советија

Со значинела акава

И Библија нане медицинско прирачнико, ама ој дела практична хем корисна советија. Лакере советија шај те поможинен околенге со иси лен емоционална проблемија. Те дикха несаве примерија.

Сар шај акава те поможинел аменге

„Е састе манушенге на ваљани доктори, него е насваленге“(МАТЕЈ 9:12).

И Библија вакерела кај некогаш шај ка ваљани аменге помош таро докторија. Буте џенен со иси лен психичка проблемија, поможинѓа ленге бут со родинѓе медицинско помош хем аѓаар дознајнѓе точна информацие башо пло насвалипе.

„О телесно вежбибе иси ле несави корист“ (1. ТИМОТЕЈ 4:8).

Адава со ка одвојне време хем ка трудине тут те овен тут шукар навике, ка поможинен туке те овел тут пошукар емоционално састипе. Ко адава тано вклучимо те вежбине редовно, те ха здраво хем доволно те сове.

„О радосно вило тано шукар иљачи, а о пхаго вило лела и сила е манушескири“(ИЗРЕКИ 17:22).

Адава со ка читине охрабрувачка библиска стихија хем ка чхиве туке разумна целија кола со шај те исполнине лен, шај те поможинен тут те ове среќно. Ако концентриринеа тут ко шукар буќа ко живото хем надинеа тут кај о буќа ка овен пошукар ки иднина, адава ка поможинел тут те ачхове емоционално стабилно џикоте боринеа тут тле психичко насвалипаја.

„И мудрост тани околенде сој скромна“(ИЗРЕКИ 11:2).

Шај ка хаљове кај нашти те успејне коркори те кере са со мангеа, адалеске спремно прифатин помош таро јавера. Тле амала хем тли фамилија веројатно мангена те поможинен туке ама шај на џанена сар. Вакер ленге со конкретно шај те поможинел тут. Ма очекујн те керен бут буќа баши туке хем секогаш ов благодарно башо адава со поможинена тут.

Сар поможинена о практична советија тари Библија

„Осетинѓум нешто кај нане манцар шукар хем адалеске гељум ко доктори. О доктори вакерѓа сој манге. Адава поможинѓа ман пошукар те хаљовав мли ситуација хем те дознајнав со ваљани те керав те шај пошукар те грижинав ман башо мло састипе“ (Никол,a кола со иси ла биполарно растројство).

„Халиљум кај адава со редовно читинава и Библија ме ромњаја, поможинела ман секова диве те почминав позитивна мисленцар кола со изградинена. Бут пути, ко диве кеда манге пхаро, несаво конкретно стихо охрабринела ман“ (Питер, коле со иси ле депресија).

„На сине манге локхо те вакерав е јаверенге солеа боринава ман соске бут лаџава сине. Јекх сочувствително паше амалин внимателно шунѓа ман хем пробинѓа те хаљовел сар осетинава ман. Ој чаче поможинѓа ман те осетинав ман пошукар хем те џанав кај на ваљани те боринав ман коркори акалеа“ (Џи ју, кола со иси ла проблеми хајбаја).

„И Библија поможинела ман те овав урамнотежено хем разумно кеда керела пе лафи баши бути хем башо одмор. Лакири мудрост поможинела ман те икљовав ко крајо е емоционално проблеменцар коленцар со боринава ман“ (Тимоти, коле со иси ле проблеми мисленцар кола со керена те овел бут вознемиримо).